އަހަރެމެންގެ ތެރެއިން ގިނަބައަކަށް ކޮންމެ ދުވަހަކުހެން ތަފާތު މައްސަލަތައް ކުރިމަތިވެއެވެ. އެއިގެ ތެރޭގައި ބަލިމަޑުކަމާއި އަތްމަތިދަތިވުމާއި ކުރިމަތިވާ ކަންތައްތަކުގެ ސަބަބުން ހިތްދަތިކަން ލިބުން ފަދަ ތަފާތު ޙާލަތުތައް މެދުވެރިވެއެވެ.
މިފަދަ ކޮންމެ ތަކްލީފެއް ނުވަތަ މުޞީބާތެއް ކުރިމަތިވި ނަމަވެސް ސަޖިދަކުރުން ގިނަކުރާށެވެ. މާނައަކީ ސުންނަތް ނަމާދުތައްކުރުން ގިނަކުރާށެވެ. އަދި އެނަމާދުތަކުގެ ސަޖިދަ ދިގުކޮށްލާށެވެ. މާނައަކީ ސަޖިދައިގައި ކިޔަންޖެހޭ ތަސްބީޙް ނުވަތަ ޛިކުރު ކިޔުމަށްފަހު އެދޭ ކަންކަމުގެ ވާހަކަ ﷲ ތަޢާލާގެ ޙަޟްރަތުގައި ދަންނަވައި ދުޢާކުރާށެވެ. އެކަމަށް ވަޤުތުކޮޅެއް ހޭދަކުރާށެވެ!
މިބުނި މަގުން ޢަމަލުކުރުމުން ޙައްލެއް ނުލިބުނު މީހަކު ހުރިނަމަ ނިކަން އެކަން ބަޔާންކޮށް ބުނެބަލާށެވެ! އެދޭ ކޮންމެ ކަމެއް ވަގުތުން ޙާޞިލުނުކުރެވިދާނެއެވެ. ބައެއް ކަންކަން އަވަހަށް ޙާޞިލުވެދާނެއެވެ. އަނެއްބައި ކަންކަން ހިންމަވައި ދެއްވަވަން ވަޤުތު ނަގައިފާނެއެވެ. އެއީ އެކަން ހިނގަމުންދާނެ ގޮތެވެ.
ޔަޤީންކުރަންވީ ކަމަކީ ކާމިޔާބީއަކީ ކެތްތެރިންގެ ޙައްޤެއްކަމެވެ. ކެތެރިވުމުން ކާމިޔާބުވާނެ ކަމެވެ.
–އިސްލާމީ ތިލަފަތުގެ ދަރުސަކުން
ރަސޫލް (ﷺ) ޙަދީޘްފުޅުކުރައްވަވާފައިވެއެވެ. ”އިންސާނާ އާއި އޭނާ ހައްދަވައި ގެންގުޅުއްވަވާ އިލާހް (ﷲ ތައާލާ) އާއި އެންމެ ބޮޑަށް ކުއްތަންވެވޭ ވަގުތަކީ ސަޖިދައިގައި އެމީހަކު އޮންނަ ވަގުތެވެ. އެ ވަގުތު ތިއަބައިމީހުން ގިނަގިނައިން ދުޢާކުރާށެވެ!“ ވީމާ ސަޖިދައިގައި އޮންނަ ވަގުތު ﷲ ތަޢާލާއަށް ގިނަގިނައިން ދުޢާކުރުމަކީ ވަރަށް ބޭނުންތެރި އަދި ވަރަށް މުހިންމު ކަމެކެވެ.
ފަރުޟު ނަމާދުތަކުގައިވެސް އަދި ސުންނަތް ނަމާދުތަކުގައި ވެސް ސަޖިދައިގައި ކިޔަން ޖެހޭ ތަސްބީހައިގެ އިތުރުން ދުޢާކުރެވޭނެއެވެ. އަދި ތަސްބީޙްތައްވެސް ކިޔޭނެއެވެ. އެކަނިހުރެ ނަމާދުކުރާއިރު ސަޖިދައިގައި ވަގުތު ދިގުކުރެވޭނެއެވެ. އެވަގުތުގައި ދުޢާކޮށް ތަސްބީޙަ ކިޔުން ގިނަކުރާށެވެ! އެއީ ދުޢާ ޢިޖާބަކުރައްވަވާ މަޤާމެކެވެ.
ކީރިތިނ ޤުރްއާނުގައާއި ރަސޫލް (ﷺ)ގެ ސުންނަތުގައި ވާރިދުވެފައިވާ ދުޢާތައް ކުރެވޭނެއެވެ.
ސުންނަތް ނަމާދުތަކުގައި، ތަރާވީޙް ނަމާދުގައި، ދަމުނަމާދުގައި ސަޖިދައިގައި ތިމާގެ އަމިއްލަ ނަފްސަށާއި މައިންބަފައިންނަށާއި ޢާއިލާގެ މީހުންނަށް ގިނަގިނައިން ދުޢާކުރެވޭނެއެވެ. އެކަންކުރާށެވެ!
ނަމަވެސް ރުކޫޢުގައި ދުޢާކުރުމެއް ނެތެވެ. އޮތީ ﷲ ތަޢާލާ މަތިވެރިކުރުމެވެ. ﷲ އަށް މަދަހަ ޘަނާ އާއި ތަޢްރީފް ދެންނެވުމެވެ.
