ތުރުކީވިލާތާއި އީރާން އަދި ރަޝިޔާއިން ސިއްރިޔާތުގައި ޔަހޫދީ އިޒްރޭލަށް ހަމަލާ ދިނުމަށްޓަކައި ރާވަމުން ދާކަމަށް ޔަހޫދީ ޓީވީ ޗެނަލަކުން ހާމަކޮށްފިއެވެ.
ފާޅުގައި ތުރުކީގެ ރައީސް ތައްޔިބު އުރުދުޣާން ވަނީ މީގެ ކުރިން ވެސް ޔަހޫދީ އިޒްރޭލަށް ހަމަލާ ދޭން ޖެހިދާނެކަމަށް ވިދާޅުވެ އެކި އެކި ޕޯޑިއަމްތަކުގައި ތަކުރާރުކޮށް ވާހަކަ ދައްކަވާފައެވެ. ޔަހޫދީން ލުބުނާނާ ފަލަސްޠީނަށް ހަމަލާދިނުމަށްފަހު ދެން އަންނާނީ ތުރުކީ އާއި ދިމާލަށް ކަމަށް ބުނެ ތައްޔިބު އުރުދުޣާން ވަނީ އެކި ފަހަރުމަތިން ވާހަކަފުޅު ދައްކަވާފައެވެ.
ތުރުކީވިލާތުން ވަނީ ވަރަށް ފަހުން ބޮޑު އަސްކަރީ ތަމްރީންތަކެއް ވައިގެ މަގުންނާއި އެއްގަމު މަގުން ކުރިއަށް ގެންގޮސްފައެވެ. ޔަހޫދީ ޓީވީ ޗެނަލުން ހާމަކުރިގޮތުގައި ހަމާސްގެ އިސް ލީޑަރު ޔަހުޔާ ސިންވާރު ސަހީދުކޮއްލުމުން އުރުދުޣާން ހުރީ ވަރަށް ރުޅިގަދަވެފައި ކަމުގައެވެ.
ތުރުކީވިލާތް ނޭޓޯއިން ވަކިވެ ބުރިކްސް އާއި ގުޅުމަށް ތައްޔާރުވާ ވާހަކަތަކެއްވެސް އަންނަނީ ވަރަށް އަޑު ހަރުކޮށް ދެކެވެމުންނެވެ. ތުރުކީ އަކީ ނޭޓޯގެ މެންބަރު ގައުމެއްގެ އިތުރުން އެމެރިކާ ފިޔަވައި ނޭޓޯގެ ދެވަނައަށް އެންމެ ބޮޑު އަސްކަރިއްޔާއެވެ. ތުރުކީ އަކީ ޒަމާނީ ހަތިޔާރު އުފައްދާ ވިއްކަމުންދާ ގައުމެކެވެ. އަދި ސަރަހައްދުގެ ބޮޑު ބާރެކެވެ. އަނެއްކޮޅުން ރަޝިޔާގެ މަނަވަރުތަކެއް އީރާނުގެ ތެހެރާނަށް ވަނީ ބަނދަރު ކޮށްފައެވެ.
ހުޅަނގުގެ ހަބަރުތައް ބުނާގޮތުގައި އެއީ ޔަހޫދީ އިޒްރޭލުން އީރާނަށް ހަމަލާ ދޭނެކަން ޔަގީންވުމުން ރަޝިޔާއިން އީރާނު ދިފާއު ކުރުމަށްޓަކައި ފޮނުވާފައިވާ އަސްކަރީ އުޅަނދުތަކެއް ކަމުގައެވެ. އީރާނަށް މިހާރު ވަނީ ރަޝިޔާގެ އެންމެ ޒަމާނީ ފެންވަރުގެ ހަނގުރާމަމަތީ ހެލިކޮޕްޓަރުތަކާއި ފައިޓަރ ޖެޓުތަކުގެ ސިޕްމަންޓެއް އެތެރެކޮއްފައެވެ. އޭގެ ތެރޭގައި su 35s އާއިMI-28 ހެލިކޮޕްޓަރުތަކާއި Yak-130 މަރުކާގެ ޓުރެއިނިންގު ޖެޓްތަކެވެ. މިހާރު މެދުއިރުމަތީގައި ބޮޑު ހަނގުރާމައެއް ފެށިދާނެ ކަމުގެ ބިރު އަންނަނީ ބޮޑުވަމުންނެވެ.
މަސްރަހު ދިރާސާކުރައްވާ ގިނަ ފަރާތްތަކުން ބުނާގޮތުގައި ދުނިޔޭގެ 3ވަނަ ބޮޑު ހަނގުރާމަ ފެށެން ދެން މާ ގިނަދުވަހެއް ނެތްކަމުގައެވެ.
