އަހަރެން ނޫން މީހަކު އުޅޭ ހެއްޔެވެ؟ އަހަރެން ނޫނީ ކަރާމާތެއް އޮތީ ކާކުގެ ހެއްޔެވެ.
އަހަރެން މިހިރީ ކިޔަވައިގެންނެވެ. އެންމެ މަތީ ފާސް ނަގައިގެންނެވެ. އަހަރެން ކިޔެވީ ދުނިޔޭގެ އެންމެ މަތީ ޔުނިވަރސިޓީންނެވެ. އަހަރެން ނޫން މީހަކަށް މަތީ ފާހެއްވެސް، ސަނަދެއްވެސް ނުނެގޭނެއެވެ.
☐ އަހަރެން މިއީ އެންމެ މޮޅަށް ވާހަކަ ދައްކާ މީހާއެވެ. އަހަރެންނަށްވުރެ ބާރަށް ވާހަކަ ދެއްކޭނެ މީހަކުވެސް ނުހުންނާނެއެވެ. އަހަރެންނަށްވުރެ އެހެން މީހުންނަށް ހަޖޫޖެހޭނެ މީހަކުވެސް ނުހުންނާނެއެވެ. މަލާމާތްކުރެވޭނެ މީހަކުވެސް ނުހުންނާނެއެވެ. އަހަރެން ނޫން މީހަކަށް ވާހަކަ ދައްކާކަށް ނޭނގޭނެއެވެ.
އަހަރެންނަކީ އެންމެ އޮމާންކޮށް އެންމެ ފަޞާޙަތްތެރިކޮށް އިނގިރޭސިން ވާހަކަދެއްކޭ މީހާއެވެ. އަހަރެންނަށް އިނގިރޭސި ބަސް ފެންފަދައެވެ. އަހަރެން ދައްކާ ކޮންމެ ވާހަކައެއްވެސް ދޮން މީހުންނަށް ކަމުދާނެއެވެ. އަހަރެން ވާހަކަދައްކާނީ އެއްވެސް ކުށެއް ނެތިއެވެ. އަހަރެން ދައްކާ ވާހަކައަކަށް ބޭރު މީހުން ހަޖޫ ނުޖަހާނެއެވެ. އަހަރެން ނޫނީ އިނގިރޭސީން ވާހަކަދައްކަން އެނގޭ މީހަކު ނޫޅޭނެއެވެ.
އަހަރެންނަކީ އިޤްތިޞާދީ މާހިރެކެވެ. އަހަރެން ވާނީ ކާމިޔާބު ކަމާއެކު ވިޔަފާރިތައް ކޮށްފައެވެ. އެވިޔަފާރީގައި ގޯހެއް ނުހިނގާއެވެ. އެއްވެސް ކޮރަޕްޝަނެއް ނުހިނގައެވެ. ކޮރަޕްޝަނެއް ހިނގިއަސް އެއީ އަހަންނަށް އެނގިގެން ހިނގާފައި އޮތް ކަމެއް ނޫނެވެ. އެކަމުގެ ޒިންމާ އަހަރެން ނަގާކަށް ނުޖެހޭނެއެވެ. އަހަރެންނަށް އިޤްތިޞާދު ފެންފަދައެވެ. އެތަކެއް ކުންފުނިތަކެއް އަހަރެން ވާނީ ކޮޅަށް ޖަހާފައެވެ. އަހަރެން ކުރި ގޮތަށް އެހެން އެއްވެސް މީހަކަށް ކުންފުނިތަކެއް ނުހިންގޭނެއެވެ. އެކަމަށް ޤާބިލު މީހަކުވެސް ނުހުންނާނެއެވެ. އަހަރެން ނޫނީ އިޤްތިޞާދު އެނގޭ މީހަކު ނުހުންނާނެއެވެ.
އަހަރެންނަކީ އެންމެ މޮޅަށް ވެރިކަން ކުރި މީހާއެވެ. އަހަރެން ވެރިކަން ކުރީ އެނގިގެންނެވެ. އަހަރެން ނޫނީ ތަރައްޤީ ކުރެވޭނެ ވެރިއަކުވެސް ދެން ނާންނާނެއެވެ. ތަރައްޤީގެ ހުރިހާ މަޝްރޫޢެއް ހިންގީ އަހަރެންނެވެ. ވަޒީރުންނަށް އެނގޭ އެއްވެސް ކަމެއް ނެތެވެ. އަހަރެން ނޫޅުނު ނަމަވެސް އެއްވެސް މަޝްރޫއެއް ނުހިންގުނީހެވެ.
އަހަންނަކީީ ރައީސެވެ. ދެން ތިބޭނީ ރައީސުންނެއް ނޫނެވެ. ދެން ރައީސެއް ހުއްޓަސް ރައީސްގެ ނަމުން އަހަރެން މުޚާޠަބެއް ނުކުރާނަމެވެ. އެހެން މީހެއްގެ ކިބައިގައި ރައީސް ކަމުގެ ކޮލިޓީއެއް ނުހުންނާނެއެވެ. އަހަރެން ނުދިންނަމަ، އެހެން މީހަކަށް ރައީސް ކަމެއް ވެސް ނުލިބޭނެއެވެ. ރައީސްކަން ކުރަން ވާނީވެސް އަހަރެން ބުނާ ގޮތަށެވެ. އަހަރެން އަންގާ ގޮތަށެވެ. އެނޫން ގޮތަކަށް ވެރިކަން ކުރަން ހިފައިފިނަމަ، މަޑަކުން ނުހުންނާނަމެވެ. ކިޔުނުހާ އެއްޗެއް ވިއްޔާ ކިޔާނަމެވެ. ހަޖޫ ޖަހާނަމެވެ. މަލާމަތްކުރާނަމެވެ. ދޮގު ހަދަހަދައިގެންވެސް ވާހަކަތައް ފަތުރާނަމެވެ. އޮޅުވާލެވެން އޮތް ހާ ގޮތަކުން އޮޅުވާލައި ރައްޔިތުންގެ ބޮލަށް ސަވާރުވާނަމެވެ. ވެރިކަން ބަލިކަށިކުރެވެން އޮތްހާ ކަމެއް ކުރާނަމެވެ. ކިޔެން އޮތްހާ އެއްޗެއް ކިޔާނަމެވެ. އަހަންނަށްވުރެ ބޮޑަށް ދޮގުހަދައި އޮޅުވާލެވޭނެ މީހަކު ނުހުންނާނެއެވެ.
އަހަރެންނަކީ މޮޔައެއް ކަމަށް ހީކުރިއަސް ވަރިހަމައެވެ. އަހަރެންނަށް ވާގިވެރިވާން ދެތިން މީހުން ތިއްބަސް ކިޔާ އެއްޗެއް ކިޔާނަމެވެ. ކޮޅަށް ނުހުރެވެންޏާ އިށީންދެ އިނދެގެންވެސް ކިޔާނަމެވެ. ފަރުވާލެއް ނެތެވެ. އަހަރެން ކުރާނެ އިތުރު ކަމެއް ނެތެވެ. ފައިސާ އެބަހުއްޓެވެ. މުދަލާއި އުސް ބިނާ އެބަހުއްޓެވެ. ހާސްވާންވީ ކޮން ކަމަކާ ހެއްޔެވެ؟
ތަކުރާރުކޮށް ވެރިއެއްގެ ގޯސް ވާހަކަ ދައްކާނަމަ، އެ ކަން ޤަބޫލު ކުރާ މީހުން އިތުރުވާނެއެވެ. މި ވިސްނުން ބަދަލެއް ނުކުރެވޭނެއެވެ. މި ޢަޒުމެއް ނުގުޑާނެއެވެ. އަމާޒު ޔަޤީނެވެ. ދެންވެސް ކާމިޔާބު ވާނީ އަހަރެންނަށެވެ. އަހަރެންގެ ބަސް އަހާ އެންމެން އަހަރެން ބުނާހާ އެއްޗެއް ޤަބޫލު ކުރާންވާނެއެވެ. އިސްތިއުފާދޭން އަންގައިފިއްޔާ އިސްތިޢުފާވެސް ދޭންޖެހޭނެއެވެ.
އަހަރެން މިދައްކަނީ ޙައްޤު ބަހެވެ. އިއްޔެ ސާރިދޯޅަށް ގޮވިޔަސް މިއަދު ފުއްލާއަކަށްވެސް ވެދާނެއެވެ. އެ މާޒީ ބަދަލުވެދާނެއެވެ. މިއަދަކީ މިއަދެކެވެ. އިއްޔެއަކީ އިއްޔެއެވެ. މިއަދު އަހަންނަށް ކާމިޔާބެއް ލިބެން އޮތީ ކުރިން ގޯސްވި މީހާގެ ބޮލަށްވެސް ސަވާރުވާން ރޮކެޓެއް ފޮނުވާލައިގެންނެވެ.
ޒަމާނަށް ބަދަލު އައި ކަމަށް ބަޔަކު ހީކުރަނީއެވެ. މި ޖީލަކަށް ކަމެއް ކުރާކަށް ނޭނގޭނެއެވެ. އަހަރެން ގެންގުޅު މީހުންނަށް ކަމެއް ކުރަން އޭރު އެނގުނަސް މިހާރު އެމީހުންނަކަށް އެއްކަމެއްވެސް ކުރާކަށް ނޭނގޭނެއެވެ. އޭރު އެއީ ވަރުގަދަ ވަޒީރުން ކަމަށް ވިޔަސް މިއަދު އެއީ ވަރުނެތް ވަޒީރުން ތަކެކެވެ. އެމީހުންނަށް ޤައުމު ހިންގާކަށް ނޭނގޭނެއެވެ.
”މަ“ ނޫން މީހަކަށް ނޭނގޭނެއެވެ. މި ބުނަނީ ހަރުއަޑުންނެވެ. ”މަ“ ނޫން މީހަކަށް އެއް ކަމެއްވެސް ކުރާކަށް ނޭނގޭނެއެވެ. ރައީސް ކަމެއް ވެސް ނުކުރެވޭނެއެވެ. ޤައުމެއްވެސް ނުހިންގޭނެއެވެ.
”މަ“ށަށް މިހެން މި ވިސްނެނީ ކީއްވެ ހެއްޔެވެ؟؟ އަންތަރީސް ވެއްޖެއެވެ. މިއީ ހާދަހާވާ ދެރަކަމެކެވެ. މަށަކީ ދައުލަތް ދަވާލައިގެން އަމިއްލައެކައުން ފުރާލިމީހާވެސްކިޔާއުޅެއެވެ.
