މި ސަރުކާރުން ވެރިކަމާ ހަވާލުވިފަހުން ކަންކަން ރަނގަޅު ކުރުމަށް އެކަށީގެންވާ މުއްދަތެއް ދެވިއްޖެ ކަމަށާއި ސަރުކާރުން ކަން ކުރަމުންދާ ގޮތް ބަލައި, ޖަވާބުދާރީކުރުވަން ޕާޓީތަކުން މަސައްކަތް ފަށަން ވެއްޖެކަމަށް ރައްޔިތުންގެ މަޖިލީހުގެ ކުރީގެ މެންބަރު މުޙައްމަދު ޝިފާޒް ވިދާޅުވެއްޖެއެވެ.
ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުން ޝިފާޒް މިރޭ ވިދާޅުވީ، މި ސަރުކާރުން ވެރިކަމަށް އައީ ކަންތައްތަކެއް ރަނގަޅު ކުރާނެކަމަށް ބުނަމުން ކަމަށެވެ. އަދި އެކަން ކުރޭތޯ ބެލުމަށް 1 އަހަރުގެ މުއްދަތެއް އެއީ އެކަށީގެންވާ މުއްދަތެއްކަމަށް ގަބޫލު ކުރައްވާކަމަށް ވިދާޅުވިއެވެ.
ނަމަވެސް އޭނާ ވިދާޅުވީ، ފެނިގެން ދަނީ ވައުދުވީ ގޮތާ ޚިލާފަށް ކަންތައްތައް ވެގެންދާ ތަން ކަމަށެވެ. ޚާއްޞަ ގޮތެއްގައި މާލީ ކަންކަމުގައި ސަރުކާރުން ކަންކަން ފޮރުވަން މަސައްކަތް ކުރާތީ އެކަމަށް ޝިފާޒް ވަނީ ފާޑުވިދާޅުވެފައެވެ.
ކުރީ ސަރުކާރުގައި ރައީސް އޮފީހުގެ ވަޒީރުކަން ވެސް ކުރެއްވި ޝިފާޒު ވިދާޅުވީ، 30 މިލިއަން ރުފިޔާއަށް ވީގޮތެއް ނުބުނެ މިހާރު ސަރުކާރުން މަސައްކަތް ކުރަމުން ދަނީ އިތުރަށް އަނެއްކާ ވެސް ޚަރަދުކުރުމަށް ކަމަށެވެ. އަދި އެ 30 މިލިއަން ރުފިޔާއަށް ވީގޮތެއް ސާފުކޮށްނުދީ ކުރިއަށް ދާނަމަ ރައްޔިތުން ވަގަށް ވެސް ގޮވާނެކަމަށް ވިދާޅުވިއެވެ.
އޭނާ ވިދާޅުވީ، ސަރުކާރުން ވައުދުވީ ކަންކަން ކުރަމުންދާގޮތް ބެލުމުގެ އެންމެ ބޮޑު ޒިންމާ އޮތީ އިދިކޮޅު ސިޔާސީ ޕާޓީތަކަށް ކަމަށެވެ. އަދި މަޖިލީހުގެ ތެރެއިން ޖަވާބުދާރީ ނުކުރެވޭނަމަ މުޒާހަރާއަށް ނުކުމެގެން ވެސް ސަރުކާރު ޖަވާބުދާރީކުރުވުމަކީ ކުރަންޖެހޭ ކަމެއްކަމަށް ވިދާޅުވިއެވެ. އޭނާ ވިދާޅުވީ، އޭނާ ނިސްބަތްވާ ޑިމޮކްރެޓްސް އެކަމަށް އޮންނާނީ ތައްޔާރަށް ކަމަށެވެ.
