ފެނާއި ނަރުދަމާގެ ހިދުމަތް ދޭ ގައުމީ ކުންފުނި މާލެ ވޯޓާ އެންޑް ސްވެރެޖް ކޮމްޕެނީ (އެމްޑަބްލިޔުއެސްސީ)އިން 400 މިލިއަން ރުފިޔާގެ ބޮންޑެއް ވިއްކަން ރާއްޖޭގެ ހިއްސާގެ ބާޒާރު، މޯލްޑިވްސް ސްޓޮކް އެކްސްޗޭންޖުގައި ހުޅުވާލައިފި އެވެ.
ދުއިސައްތަ މިލިއަން ރުފިޔާގެ ބޮންޑަކަށް އިންވެސްޓުކުރުމަށް އެމްޑަބްލިއުއެސްސީގެ ވިޔަނި ޕޯޓަލް މެދުވެރިކޮށް މިހާރު ހުޅުވާލާފައިވާއިރު، މި ބޮންޑު އިންވެސްޓުކުރާ ފަރާތްތަކަށް ފަސް އަހަރު ތެރޭ އަހަރަކު 7.5 އިންސައްތައިގަ އިންޓްރެސްޓް ލިބޭނެ ކަމަށް ފަސްޓް ނޭޝަނަލުން ބުނެފައިވެ އެވެ.
ޖަޕާނުގެ މަޝްހޫރު ހިޓާޗީ ކުންފުނީގެ 20 ޕަސަންޓު ހިއްސާ އޮންނަ އެމްޑަބްލިޔުއެސްސީން މި ބޮންޑު ވިއްކުމުގެ މައިގަނޑު މަގުސަދަކީ، އެ ކުންފުނިން ހިންގާ މަޝްރޫއުތަކާއި ވިޔަފާރިތަކަށް ފައިނޭންސް ހޯދުން ކަމަށް ބުނެފައިވެ އެވެ.
އޭގެތެރޭގައި، ފެނާއި ނަރުދަމާގެ ޚިދުމަތަށް ބޭނުންވާ އިންވެސްޓުމަންޓުތަކާއި މިހާރު އަތޮޅުތަކުގައި ކުރިއަށް ގެންދާ ނަރުދަމާގެ މަޝްރޫއުތައް އަވަސްކުރުމުގެ އިތުރުން، ކުންފުނިން އުފައްދާ ބައެއް ސާމާނުގެ ވިޔަފާރި ފުޅާ ކުރުން ހިމެނޭ ކަމަށް ބުނެފައިވެއެވެ.
