އިމިގްރޭޝަން ގާނޫނާ ގުޅޭގޮތުން ފޮރިން މިނިސްޓްރީގެ ސްޓޭޓް މިނިސްޓަރު އަދި ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިން ކުރެއްވި ޕޯސްޓާ އެކު، އޭނާ އަށް ސޯޝަލް މީޑިއާގައި މަރުގެ އިންޒާރު ދީފި އެވެ.
އިމިގްރޭޝަންގެ ގާނޫނާ ހިލާފަށް، ވިސާ ނެތި ތ. ވޭމަންޑޫގައި ދިރިއުޅޭ ފްރާންސް އާއިލާގެ މައްސަލައާ ގުޅިގެން މުހުތާޒް އިއްޔެ އެކްސްގައި ކުރެއްވި ޕޯސްޓެއްގައި ވިދާޅުވީ، އިމިގްރޭޝަން ގާނޫނު ހަދާފައި ވަނީ ރާއްޖޭގެ ދާހިލީ ހަމަޖެހުމާއި ދިވެހިންގެ މަސްލަހަތާއި ހަމަޖެހުމަށް އިސްކަންދީގެން ކަމަށެވެ.
ހިޖުރަކުރާ މީހުންނަށް ރާއްޖޭގައި ރައްކާތެރިކަން ދިނުމަށް އެ ގާނޫނުގައި ހުއްދަ ކޮށްފައި ނުވާތީ، ޖަޒުބާތީ ފިކުރުތަކާ ދުރުވެ، ގާނޫނީ ވެރިކަމަށް ޖާގަ ދިނުން ބުއްދިވެރި ކަމަށް އޭނާ ވިދާޅުވި އެވެ.
އެކަމަކު، ކޮން ބައެއް ކަމެއް ނޭނގޭ ބަޔަކު ހިންގާ ސޯޝަލް މީޑިއާ އެކައުންޓުތަކުން މުހުތާޒަށް ވަނީ މަރުގެ އިންޒާރު ދީފަ އެވެ. ”ޓޮނީ މޮންޓަނާ“ ނަމަކަށް ކިޔާ އެކައުންޓަކުން މުހުތާޒަށް އަމާޒުކޮށް ހަޑި ހުތުރު ބަހުން ވެސް ރައްދު ދިނެވެ.
އޭނާ ބުނީ، އިސްކުރާނީ ހަތް އުޑު މަތިން ބާވައިލެއްވި އިލާހީ ގާނޫނު ކަމަށާއި އެ ގާނޫނުގައި އޮންނަ ގޮތުން ނަމަ އެ ކަހަލަ ޖާހިލުން ކަރު ކަނޑާލުން ވެސް ހުއްދަ ކަމަށެވެ.
”މިއީ އެއް އުއްމަތެއް ކަން ހަނދާން ކުރާތި،“ އެކްސްގައި ބުންޏެވެ.
މުހުތާޒު ޓެގްކޮށް ކުރި ޕޯސްޓެއްގައި ވަނީ ލޭއޮހޮރުވާލަން ވެސް ފަސްނުޖެހޭ ކަމަށް ބުނެ އިންޒާރު ދީފަ އެވެ.
ވިސާ ނެތި ރާއްޖޭގައި ދިރިއުޅޭތާ 12 އަހަރުވެފައިވާ އާއިލާގެ ވާހަކަ މިދިޔަ އާދިއްތަ ދުވަހު ”މިހާރު“ ގައި ރިޕޯޓުކުރުމުން، އެ މީހުންނަށް ރާއްޖޭގެ ރަށްވެހިކަން ނުވަތަ ވިސާ ހޯދުމަށް އެދި ބައެއް މީހުން ވަނީ ގޮވާލައިފަ އެވެ.
ނަމަވެސް އިމިގްރޭޝަން ކޮންޓްރޯލާ މުހައްމަދު ޝަމްއާން ވަހީދު އެ ދުވަހު ”އެކްސް“ގައި ވިދާޅުވީ ގާނޫނާ ހިލާފަށް ދިރިއުޅޭ އާއިލާގެ މައުލޫމާތު ”އިމިގްރޭޝަން ވޮޗް“ އަށް ލިބުނީ މިދިޔަ ޖުލައި 18 ގައި ކަމަށެވެ. އެ މައްސަލަ ބެލުމަށް ފަހު މިދިޔަ އޮކްޓޯބަރު 23 ގައި އެ އާއިލާގެ އިސް މީހާ އިމިގްރޭޝަނަށް ހާޒިރުކޮށްފައިވާ ކަމަށް ވެސް ވިދާޅުވި އެވެ.
”އެ ފަރާތްތަތަކުގެ ޕާސްޕޯޓުގެ މުއްދަތު ހަމަވެފައިވާތީ މި އާއިލާ ރާއްޖެއިން ފުރުވާލުމަށް ބޭނުންވާ ޓްރެވެލް ޑޮކިއުމަންޓު ހޯދުމުގެ މަސައްކަތް މިނިސްޓްރީ އޮފް ފޮރިން އެފެއާޒާ ގުޅިގެން މި އިދާރާއިން ކުރަމުންދާ ކަމުގައި ދަންނަވަމެވެ،“ ޝަމްއާން ވިދާޅުވި އެވެ.
އޭނާ ވިދާޅުވީ އެ މީހުންގެ ޓްރެވެލް ޑޮކިއުމަންޓް ލިބުނުހާ އަވަހަކަށް ފުރުވާލާނެ ކަމަށެވެ. އެކަމުގައި އިމިގްރޭޝަނުން އެހީތެރިކަން ފޯރުކޮށްދޭނެ ކަމަށާއި އަދި ވަކި ގައުމަކަށް ފުރައިގެން ދިއުމަށް ނާންގާނެ ކަމަށް ވެސް ވިދާޅުވި އެވެ.
”އިމިގްރޭޝަން ގާނޫނާ ހިލާފަށް ދިވެހިރާއްޖޭގައި އުޅުމަށް އެއްވެސް ފަރާތަކަށް ފުރުސަތެއް ނުދެވޭނެ.“ އޭނާ ވިދާޅުވި އެވެ.
