އެޗްޑީސީގެ މާލީ މުއާމަލާތްތައް މަޑުޖައްސާލަން އަންގައިފި
ދެންމެ | 19 ޑިސެމްބަރ 2024

ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ މާލީ މުއާމަލާތްތައް މަޑުޖައްސާލަން އެ ކުންފުނީގެ އޮޑިޓަރު އަންގައިފި އެވެ.

އެޗްޑީސީގެ ޗީފް އިންޓާނަލް އޮޑިޓަރު އިއްޔެ ނެރުނު އިންޓާނަލް މެމޯއެއްގައިވާ ގޮތުން، އެ ކުންފުނިން ހިންގާ މާލީ ގިނަ މުއާމަލާތްތަކެއް ވަގުތީ ގޮތުން މަޑުޖައްސާލަން ވަނީ އަންގައިފަ އެވެ.

އޭގެ ތެރޭގައި ”ބިންވެރިޔާ ސްކީމް“އާ ގުޅޭ ހުރިހާ މުއާމަލާތްތަކާއި ބިމާއި ކޮމާޝަލް އަދި ރެސިޑެންސް ޔުނިޓްތައް ދޫކުރުމުގެ އެއްވެސް މުއާމަލާތެއް ނުކުރަން އެންގި އެވެ.

އިމަޖެންސީ ހާލަތެއްގައި މެނުވީ އެއްވެސް ޕްރޮކިއުމެންޓް މުއާމަލާތެއް ނުހިންގުމަށާއި ފައިސާ ދެއްކުމުގެ އެއްވެސް މުއާމަލާތެއް ނުކުރަން ވެސް މެމޯގައި ވެ އެވެ. އެއްވެސް މުވައްޒަފަކު ވަކިކުރުމާއި އަލަށް މަގާމުތަކަށް މީހުން ނެގުން ވެސް ވަނީ ސަސްޕެންޑްކޮށްފަ އެވެ.

މި ފިޔަވަޅުތައް އަޅަން މެމޯއެއް ނެރުނީ ބިންވެރިޔާ ސްކީމްގެ ލިސްޓުގައި ނެތް ބަޔަކަށް ހުޅުމާލެ އިން ގޯތިތަކެއް ދިން ކަމަށް ބުނާ މައްސަލައެއް ވަރަށް ބޮޑަށް ހޫނުވެ، އެ މައްސަލާގައި ޖިނާއީ ތަހުގީގެއް ފުލުހުން ފެށުމާ އެކު އެވެ.

އެ މައްސަލަ ވަރަށް ބޮޑަށް ހޫނުވުމާ އެކު، ފުލުހުން ފެށި ހާއްސަ ތަހުގީގު ނިމެންދެން ޕީސީބީން މިއަދު ވަނީ މެނޭޖިން ޑިރެކްޓަރު ފަޒުލް ރަޝީދު ހިމެނޭހެން އެޗްޑީސީގެ ބޯޑު އެއްކޮށް ވަގުތީ ގޮތުން ސަސްޕެންޑް ކޮށްފަ އެވެ. އެކަމަކު، އެ ކުންފުނީގެ ޗެއާމަން އަހުމަދު ނާސިފް (ޑީޑީ) ސަސްޕެންޑެއް ނުކުރެ އެވެ. އޭނާ އެ މަގާމަށް އައްޔަން ކުރެއްވީ މިދިޔަ މަހުގެ ހަ ވަނަ ދުވަހު އެވެ.

ފަޒުލްގެ އެއްބަނޑު އެއްބަފާ ބޭބެ ފަޒީލް ރަޝީދު ހިމެނޭ ގޮތަށް ބަޔަކަށް ބިންވެރިޔާ ސްކީމްގެ ބޭރުން ހުޅުމާލެއިން ގޯތިތަކެއް ދޫކުރި މައްސަލައިގެ ތަހުގީގަށް ފުލުހުން ވަނީ އިއްޔެ ހަވީރު އެޗްޑީސީގެ އޮފީހަށް ވެސް ވަދެފަ އެވެ.

މި ބޮޑު މައްސަލާގައި ފަޒުލް އަށް ކުރެވޭ ތުހުމަތުތައް އިއްޔެ އޭނާ ވަނީ ދޮގުކުރައްވައިފަ އެވެ.

”އަޅުގަނޑުމެން އެއްވެސް ހާލަތެއްގައި މިނިސްޓްރީ އޮފް ހައުސިން އިން ނާންގާ ފަރާތަކަށް، މިތަނުން ބިމެއް ހަވާލުކޮށްފައި ނުވާނެ،“ ރޭގެ ނޫސްވެރިންގެ ބައްދަލުވުމުގައި ފަޒުލް ވިދާޅުވި އެވެ.

މި މައްސަލަ ފެންމަތިވީ އެ ގޯތިތަކުގެ އިންފާރު ރޭނުމުގެ ހުއްދައަށް އެޗްޑީސީގައި އެދުމުން އެ ކުންފުނިން ހައުސިން މިނިސްޓްރީގައި އެ ހުއްދައަށް އެދުމުންނެވެ. ނަމަވެސް ހައުސިން މިނިސްޓްރީން ވަނީ އެ ހުއްދަ އަށް އެދުނު މީހުންނަކީ ބިންވެރިޔާ ސްކީމްގެ ދަށުން ގޯތި ހޯދަން އެދުނު ބައެއް ނޫން ކަން އަންގައިފަ އެވެ. އާންމު ވެފައިވާ ލިޔުންތަކުގައިވާ ގޮތުން އޭގެ ތެރެއިން އެކަކީ ފަޒުލް ބޭބެ ފަޒީލް އެވެ. އަދި ދެވަނަ މީހަކީ އަބްދުލްމަޖީދު މާހިރު ކިޔާ މީހެކެވެ.

ބިންވެރިޔާ ސްކީމަކީ މާލޭ މީހުންނަށް ގޯތި ދިނުމަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ހިންގި ސްކީމެކެވެ. އެ ސްކީމްގެ ދަށުން ވަނީ ހުޅުމާލެ އާއި ގުޅިފަޅާއި ގިރާވަރުފަޅުން 9،000 ވުރެ ގިނަ ގޯތި ހިލޭ މާލޭ މީހުންނަށް ދިނުމަށް ނިންމައިފަ އެވެ. އެ ސްކީމްގެ ދަށުން ހުޅުމާލެ 2 އިން ދޭން ނިންމި ހުރިހާ ގޯއްޗެއް ހައުސިން މިނިސްޓްރީން ވަނީ އެ ބިންތައް ލިބުނު މީހުންނަށް މިދިޔަ މަހު ހަވާލުކޮށްފަ އެވެ. އެ ގޯތިތަކުގެ ކަންމުޑި ޖަހައި، އިން ވަކިކޮށްދިނުމުގެ މަސައްކަތް ހަވާލުކުރީ އެޗްޑީސީއާ އެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!