ޑްރޯން ޝޯ އަދި ހަވާއާއެކު ދިވެހިން އާ އަހަރަށް މަރުހަބާ ކިޔައިފި
ދެންމެ | 01 ޖެނުއަރީ 2025

ޑްރޯން ޝޯ އަދި ހަވާ އެރުވުމާއެކު ރާއްޖެއިން 2025 އަށް މިރޭ މަރުހަބާ ކިޔައިފި އެވެ.

މޯލްޑިވްސް ކަލްޗާ އެންޑް ފުޑް ފެސްޓިވަލްގެ ނަމުގައި ސެންޓްރަލް ޕާކުގައި ހަރަކާތްތައް ފަށާފައިވަނީ ރޭ 8:00 ގަ އެވެ. އެމްއެމްޕީއާރުސީން އިސްނަގައިގެން ބޭއްވި ޝޯގައި ވަނީ ދިވެހިންގެ އިހު ޒަމާނުގެ ނެށުމާއި ބޮޑުބެރާއި ސަގާފީ ނެށުންތައް ދައްކާލައިފަ އެވެ.

އޭގެ އިތުރުން ދިވެހިންގެ ތަފާތު ކެއުންތައް ރަހަ ބަލާލުމަށް އެ ސަރަހައްދުގައި ސްޓޯލްތައް ބަހައްޓާފައި ހުއްޓެވެ. މާދަމާ ހަވީރު 4 އިން ރޭގަނޑު 10 ޖަހަންދެން ފުޑް ފެސްޓިވަލް އޮންނާނެ އެވެ.

އާ އަހަރު ފާހަގަކުރުމުގެ ހަރަކާތްތަކުގެ ތެރެއިން އެންމެ ތަފާތު ކަމަކަށް ވީ ޑްރޯން ޝޯ އެވެ. އޭގައި ވަނީ ރާއްޖޭގެ ޓޫރިޒަމާއި މަސްވެރިކަމާއި ދިވެހިންގެ ޒަމާނީ ނެށުންތައް ދައްކުވައިދޭ މަންޒަރުތައް ޑްރޯން ބޭނުންކޮށްގެން ދައްކާލައިފަ އެވެ.

ފެސްޓިވަލް ބަލަން ދިޔަ މީހުންގެ ތެރެއިން ގުރުއަތުން ނެގި މީހުންނަށް އެކި އިނާމު ދީފައިވެ އެވެ.

އެ ހަރަކާތްތަކަށްފަހު، އާ އަހަރަށް މަރުހަބާ ކިޔައި ހަވާ އަރުވަން ފަށާފައިވަނީ 11:59 ގަ އެވެ. އެ ހަރަކާތް ފަސް މިނެޓަށް ދެމިގެން ދިޔަ އެވެ. އެކަމަކު މޫސުން ވަރަށް ބޮޑަށް ގޯސްވުމުން އޭގެ އަސަރު ރޭގެ ޝޯ އަށް ކުރިއަސް، އާ އަހަރު ފާހަގަކުރަން ގިނަ ބަޔަކު ސެންޓްރަލް ޕާކަށް ޖަމާވި އެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!