މިދިޔަ އަހަރު ސަރުކާރުން މާލޭގައި ގާއިމުކުރި ވަގުތީ ފެންހިންދާ ނިޒާމުތަކުގެ ސަބަބުން އިއްޔެ ކުރި ވިއްސާރައިގައި ފެންހިންދުމުގެ މަސައްކަތަށް ވަރަށް ބޮޑު ފަސޭހައެއް ލިބިފައިވާ ކަމަށް އެމްއެންޑީއެފުން މިއަދު ބުނެފިއެވެ.
އެމްއެންޑީއެފުގެ ލެފްޓިނަންޓް ކާނަލް ފާއިޒް ރަޝާދު ދައުލަތުގެ މީޑިއާ މެދުވެރިކުރައްވައި ވިދާޅުވީ ހުކުރު ދުވަހު ވެހުނު ބޯ ވާރޭގައި ފެން ހިންދުމުގެ މަސައްކަތް ފަށާފައިވަނީ 11:37 ގައި ކަމަށެވެ. މި މަސައްކަތުގައި މާލޭގެ 7 ސަރަހައްދެއްގައި 27 ޕަމްޕް ބަހައްޓައިގެން މަސައްކަތް ކުރިއަށް ގެންގޮސްފައިވެއެވެ.
އާ ނިޒާމުގެ ދަށުން މަގުމަތީގައި ހޮޅި އެޅުމުގެ ބަދަލުގައި ޕިޓްތަކުގައި ޕަމްޕް ބަހައްޓައިގެން މަސައްކަތް ކުރިއަށް ގެންގޮސްފައިވާއިރު، ބައެއް ޕިޓްތަކުގައި 7 ޕަމްޕަށްވުރެ ގިނަ ޕަމްޕް ބަހައްޓާފައިވެއެވެ. މީގެ ތެރޭގައި މިނެޓަކު 10،000 ޓަނުގެ ފެން ބޭރުކުރެވޭ ޕަމްޕްތައްވެސް ހިމެނެއެވެ.
ފެން ހިންދުމުގެ މަސައްކަތް ކުރިއަށް ގެންގޮސްފައިވަނީ ވެސްޓްޕާކް، އައިޖީއެމްއެޗް ފުރަގަސް، ވިލިނގިލި ފެރީ ޓާމިނަލް ކައިރި، މާފަންނު ސްޓޭޑިއަމް ކައިރި އަދި ދަރުބާރުގެ ކައިރި ފަދ ސަރަހައްދުތަކުގައެވެ. މި މަސައްކަތް ނިންމާލެވިފައިވަނީ މިއަދު ހެނދުނު 8:34 ގައެވެ.
7 ސަރަހައްދެއްގައި 27 ޕަމްޕް ބޭނުންކޮށްފައިވޭ
މިނެޓަކު 10،000 ޓަނުގެ ފެން ބޭރުކުރެވޭ ޕަމްޕް ބޭނުންކުރި
ފެންހިންދުމުގެ މަސައްކަތް ފެށީ 11:37 ގައި
މަސައްކަތް ނިންމާލީ މިއަދު ހެނދުނު 8:34 ގައި