އުތުރު ކޮރެއާގެ ރައީސް، ކިމް ޖޮންގް-އުން ވަނީ ހޮޓް ޑޮގް ކެއުމާއި ވަރިވުން އެޤައުމުގެ ރައްޔިތުންނަށް މަނާކޮށްފައެވެ.
މިކަންކަން ކުރާ މީހުންނަށް ޖަލަށްލުމުގެ އަދަބު ދޭނެ ކަމަށް ވެސް ވަނީ އިޢުލާންކޮށްފައެވެ. މި ނިންމުމަކީ ހުޅަނގުގެ ސަގާފީ ނުފޫޒުތަކާ ދެކޮޅަށް ފަށާފައިވާ ބޮޑު ހަރުކަށި ފިޔަވަޅުތަކުގެ ތެރެއިން އަޅާފައިވާ ފިޔަވަޅެކެވެ.
ހޮޓް ޑޮގް އަކީ ޖަރުމަނުވިލާތުން އައިސް، އެމެރިކާގައި މަޤްބޫލުވެފައިވާ ކާއެއްޗެކެވެ. އަދި ފަހަކަށް އައިސް ދެކުނު ކޮރެއާގައިވެސް މަޤްބޫލުވެފައިވާ އެއްޗެކެވެ. ކިމް ޖޮންގް-އުން ވަނީ ހޮޓް ޑޮގް ވިއްކުމަކީ އުތުރު ކޮރެއާއާ ދެކޮޅަށް ކުރާ ޚިޔާނާތެއް ކަމުގައި ކަނޑައަޅާފައެވެ.
ބުދާ-ޖިގޭ އަކީ އުތުރު ކޮރެއާގެ ރައްޔިތުން ވަރަށް ބޮޑަށް ކާހިތްވާ ކާއެއްޗެކެވެ. މިއީ ހޮޓް ޑޮގް ނުވަތަ ސްޕެމް ބޭނުންކޮށްގެން ހަދާ ރަހަ ގަދަ ނޫޑުލްސް ސޫޕެކެވެ. މި ކާއެއްޗަކީ 2017 ވަނަ އަހަރު ދެކުނު ކޮރެއާއިން އެތެރެކުރި އެއްޗެކެވެ. ނަމަވެސް މިހާރު ވަނީ މާރުކޭޓުތަކުގައި މި ސޫޕު ވިއްކުން މަނާކޮށްފައެވެ.
މީގެ އިތުރުން، ވަރިވުމަކީ ”ޖަރީމާއެއް“ ކަމުގައި ބުނެ، ވަރިވާން އެދޭ ފިރިހެނުންނާއި އަންހެނުން ޖަލަށްލަން ފަށާފައިވާކަމަށް ވެސް ރިޕޯޓުތަކުން ދައްކައެވެ. ކިމް ޖޮންގް-އުން ބޭނުންވަނީ ވަރިވާން އެދޭ ކޮންމެ މީހަކަށް 6 މަސްދުވަހުގެ ޖަލު ޙުކުމެއް އިއްވުމަށެވެ. އޭނާ ދެކޭގޮތުގައި ވަރިވުމަކީ ”އެންޓި-ސޯޝަލިސްޓް“ ޢަމަލެކެވެ. އަަދި ވަރިވާ ފަރާތްތައް ހަރުކަށި މަސައްކަތުގެ މާހައުލެއްގައި ހިދުމަތް ކުރަންޖެހޭ އުސޫލެއްވެސް ވަނީ ކަނޑައަޅާފައެވެ.
އުތުރު ކޮރެއާގެ ނިއުކްލިއަރ ހަތިޔާރުގެ ޕްރޮގްރާމާ ގުޅިގެން ގިނަ ޤައުމުތަކަކުންނާއި ބައިނަލްއަޤްވާމީ ޖަމާޢަތްތަކުން ވަނީ އުތުރު ކޮރެއާގެ މައްޗަށް ދަތިކުރުވަނިވި ފިޔަވަޅުތަކެއް އަޅާފައެވެ. އަދި 1988 ވަނަ އަހަރު އެމެރިކާ ވަނީ އުތުރު ކޮރެއާ، ޓެރަރިޒަމަށް އެހީތެރިވާ ޤައުމުތަކުގެ ލިސްޓަށް އިތުރުކޮށްފައެވެ.
