ކެއުމަށްފަހު ނުވަތަ ކޮފީއަކަށް ފަހުގައި ދުފާލުމަކީ ދިވެހިންގެ ކަށީގައި ވެސް ހިފައިފައި ހުންނަ ގޯސް އާދައެކޭ ބުނެވިދާނެއެވެ.
އަނގަ މީރުކޮށްލަން ދުފާލުމަކީ ކޮންމެހެންވެސް ކުރަން ޖެހިފައި އޮތް ކަމެއް ފަދައެވެ. މިއީ ދިވެހީން އެކަނި ކުރާ ކަމެއް ވެސް ނޫނެވެ. ދުފުމަކީ ދެކުނު އެޝިއާ އަށް ވެސް ވަރަށް މަޝްހޫރު ކަމެކެވެ.
ގައިން ގަޔަށް ނާރާ ބަލިތަކުގެ ތެރެއިން، އެންމެ ނުރައްކާތެރި އެއް ބަލި ކަމުގައިވާ، ކެންސަރަށް މަގުފަހިވާ ތަކެތީގެ ލިސްޓުގައި ޑަބްލިއު.އެޗް.އޯ އިން ހިމަނާފައިވާ ފޯކުން ލިބޭ ބައެއް ގެންލުންތަކަށް ނަޒަރު ހިންގާލާނަމެވެ.
ފޯކަކީ އަނގައިގެ ކެންސަރަށް މަގުފަހިކޮށްދޭ އެއްޗެކެވެ. ރާއްޖޭގައި ވެސް އަނގައިގެ ކެންސަރުގެ ކޭސްތައް ގިނައެވެ. އައިޖީއެމްއެޗުގައި މަސައްކަތް ކުރައްވާ އޮންކޮލޮޖިސްޓް، ޑރ. މުހައްމަދު ޝިފާން ވިދާޅުވެފައިވާ ގޮތުގައި، ފޯއް ކެއުމުން ކެންސަރު ޖެހެނީ، އޭގެ ދިޔައިގެ ސަބަބުންނެވެ. އޭނާ ވިދާޅުވާ ގޮތުގައި، ފޯއް ބޭނުންކޮށްގެން ދުފުމަކީ ގިނަ ދިވެހީން ކެންސަރުގެ ޝިކާރައަކަށްވާ އެއް ސަބަބެވެ.
ފޯކުގައި ހިމެނޭ އެރޮކްލައިން އަކީ އަނގައިގެ ކެންސަރަށް މަގުފަހިކޮށްދޭ މާއްދާއެކެވެ.
އެހެންވެ، ގިނަވަގުތު ފޯއް އަނގައިގަ ބަހައްޓައިގެން ދުފުމުން މީގެ ނުރައްކާ ބޮޑުވެ، ކެންސަރު ޖެހުމުގެ ފުރުސަތު ބޮޑުވެގެންދެއެވެ.
ފޯކުގެ ސަބަބުން ޖެހޭ އެންމެ ނުރައްކާ ބައްޔަކީ ކެންސަރު ކަމުގައި ވިޔަސް ދެން އޭގެ ސަބަބުން ޖެހޭ ބަލިތައް ވަކި ވޭން ކުޑައެއް ނޫނެވެ.
މިގޮތުން އޯރަލް ސަބްމުކޮސް ފްބްރޮސިސް ފާހަގަ ކޮށްލެވެއެވެ. މި ހާލަތް މެދުވެރި ވުމުން އަނގަ ހަރުވެ، އަނގަ ހުޅުވަން އުނދަގޫވެ، އަދި ނުހެފޭގޮތް މެދުވެރިވެއެވެ. މިއީ ވަރަށް ވޭން ހުރި، ތަދު ބޮޑު ކަމެކެވެ.
ފޯއް ގަހެއް
ފޯކަކީ ”އެޑިކްޓް“ ވެސް ވާ އެއްޗެކެވެ. އަދި ގަދައަށް ދުފާ މީހުންނަށް ހުއްޓަން އުނދަގޫވެއެވެ. ގިނައިރު މިއާ ނުލާ ހޭދަކުރަން އުނދަގޫވެއެވެ.
މީގެ އިތުރުން ނުދުފައިފިނަމަ ބޮލުގެ ރިހުމާއި އަދި ވަރުބަލިކަންވެސް މިފަދަ މީހުންނަށް އިހުސާސް ކުރެވެއެވެ. މީ ސަލާމަތްވާން ޖެހިފައި އޮތް ނުރައްކަލެކެވެ.
މިވަރަކުން ނިމުނީ އެއް ނޫނެވެ. ފޯކުގެ ސަބަބުން ކުރިމަތިވާ ދަތާ ހިރުގަނޑުގެ ބަލިތަކުގެ ބިރުވެރިކަމުގެ ވާހަކަ ވެސް ދައްކަން އޮތީއެވެ.
މިގޮތުން ދަތް ހަޑި ވުމާއި، ހިރުގަނޑު ހަރުވުން ފާހަގަކޮށްލެވެއެވެ.
އަދި އަވަހަށް ދަތް ހަލާކުވެ، ދަތް ވެއްޓެން މަގުފަހިވެއެވެ.
ފޯކުގައި ހިމެނޭ ނުރައްކާތެރި ކެމިކަލްގެ ސަބަބުން ހިތުގެ ބަލިތައް އިތުރުވެ ލޭގެ ޕްރެޝަރ ވެސް މަތިކުރުވައެވެ. ހިތުގެ ރޭޓު އަވަސް ކުރުވައެވެ. މީގެ ސަބަބުން އެކިއެކި ހިތުގެ ބަލިތަކަށް މަގުފަހިވެއެވެ.
އާއްމުކޮށް ދުފުމަކީ ހަޖަމުކުރުމުގެ ނިޒާމަށް ވެސް ބޮޑު ނުރައްކަލެކެވެ. އަދި ހަމައެހެންމެ ލިވާގެ ބަލިތަކަށް ވެސް މަގުފަހި ކޮށްދެއެވެ.
އަދި އިތުރުކަމެއް ފާހަގަ ކޮށްލާނަމެވެ. މާބަނޑު އަންހެނުންނަށް ވެސް ފޯކަކީ ވަރަށް ގެއްލުން ހުރި އެއްޗެކެވެ. މީގެ ސަބަބުން ދިމާވެދާނެ މައްސަލަތަކުގެ ތެރޭގައި، އުފަންވާ ކުއްޖާ މާބޮޑަށް ލުއިވުމާއި އަދި އައިބުވުން ފާހަގަ ކޮލެވެއެވެ.
ކެފޭއެއްގައި ދުފާލަން އިނދެ މި ދިރާސާ ކޮށްލެވުންކަން މީހަމަ ނަސީބެކެވެ. މީ އަޅުގަނޑުމެން އެންމެންވެސް ސަލާމަތްވާން ޖެހޭ އާންމުވެފައިވާ ވަބާއެކޭ ބުނެވިދާނެއެވެ.
