ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގައިވާ ސަރުކާރުގެ ދަރަނި 10 ބިލިއަން ރުފިޔާއަށް އަރާކަމަށް އެކުންފުނިން ހާމަކޮށްފިއެވެ.
އެޗްޑީސީގެ މާލީހާލަތު މިހާރު އޮތްގޮތް އަންގައިދިނުމުގެ ގޮތުން އެކުންފުނިން މާލިއްޔަތު ކޮމިޓީއާ ހިއްސާކުރި ރިޕޯޓްގައި ބުނެފައިވަނީ އެޗްޑީސީއަށް ލިބެންޖެހޭ ފައިސާގެ ތެރޭގައި ސަރުކާރުން ދައްކަންޖެހޭ 10 ބިލިއަން ރުފިޔާ ހިމެނޭކަމަށެވެ. އެޗްޑީސީގައިވާ ސަރުކާރުގެ ދަރަނި އެހާބޮޑަށް އަރައިގެން ދިޔައީ ބިންވެރިޔާ ސްކީމްގެ ދަށުން ހިލޭ ގެވަޅު ދޫކުރުމުގެ އިތުރުން ފްލެޓްތަކުގެ ކުލި ކުޑަކުރުމުގެ ސަބަބުންކަމަށެވެ.
އެޗްޑީސީން ހުށަހެޅި ރިޕޯޓާ ގުޅޭގޮތުން ވާހަކަދައްކަވަމުން މަޖިލީހުގެ ނައިބު ރައީސް އަދި އެ ކޮމިޓީގެ މެމްބަރު އަހުމަދު ނާޒިމް ވިދާޅުވީ، އެޗްޑީސީގެ މާލީހާލަތު ވަރަށް ރަނގަޅަށް ވަޒަން ކުރެވިފައިވާކަމަށެވެ. ނާޒިމް ވިދާޅުވީ ގޯތި ދިނުމުގެ ސަބަބުން އެޗްޑީސީއަށް ވަރަށްބޮޑު ގެއްލުމެއް ލިބިފައިވާކަމަށް ރިޕޯޓުން އެނގެން އޮންނަކަމަށާއި، ކުލިތައް ލުއިކޮށްދިނުމުގެ ސަބަބުންވެސް ގާތްގަނޑަކަށް 4 ބިލިއަން ރުފިޔާގެ ގެއްލުން ލިބިފައިވާކަމަށެވެ.
ސަރުކާރުން އުފުލަންޖެހިފައިއޮތް ވަރަށްބޮޑު ބުރައެއްކަމަށް އަޅުގަނޑަށް ފެންނަނީ. ކުލި ކުޑަކޮށްދިނުމާއި އެގޮތަށް ބިން ދިނުމަކީ.
އަހުމަދު ނާޒިމް
ނާޒިމް ވިދާޅުވީ އެޗްޑިސީގެ ކޮމާޝަލް ކަސްޓަމަރުންގެ ގޮތުގައި 571 ކަސްޓަމަރުން ތިބިއިރު، ޖޫރިމަނާ ނުލައި އެފަރާތްތަކުންވެސް 976 މިލިއަން ރުފިޔާ ދައްކަންޖެހޭކަމަށް ރިޕޯޓުން އެނގެން އޮންނަ ކަމަށެވެ. ނާޒިމް ވަނީ ކޮމާޝަލް ކަސްޓަމަރުން ދައްކަންޖެހޭ ފައިސާގެ އަދަދު ބިލިއަނަކަށް އަރައިގެންދިޔައިރު މިކަމުގައި އެޗްޑީސީން ގެންގުޅެމުންދާ އުސޫލަކީ ކޮބައިތޯ ސުވާލުކުރައްވާފައެވެ.
މާލިއްޔަތު ކޮމިޓީގައި ވާހަކަދައްކަވަމުން އެޗްޑީސީގެ މެނޭޖިން ޑިރެކްޓަރު އަލީ ޒުހައިރު ކޮމިޓީގައި ވާހަކަދައްކަވަމުން ވަނީ އެޗްޑީސީއަށް ލިބެންޖެހޭ ފައިސާ ހޯދުމުގެ ކަންކަން ކުރިއަށްދާގޮތް ސާފުކޮށްދެއްވާފައެވެ. އެގޮތުން މަރުކަޒީ ބޭންކްގެ އިތުރުން ކޮމާޝަލް ބޭންކްތަކާ ގުޅިގެން ފައިސާ ހޯދުމުގައި އުސޫލްތަކެއް އެކުލަވާލާފައިވާކަން އޭނާ ފާހަގަކުރެއްވިއެވެ.
އެޗްޑީސީގެ ކަސްޓަމަރުން އެމްއެމްއޭގެ ކްރެޑިޓް ޑޭޓާ ރަޖިސްޓްރޭޝަންގައި ހިމަނައި ފައިސާ ހޯދުމަށް ކުރެވުނު މަސައްކަތުގެ ތެރެއިން އެޗްޑީސީއަށް ލިބެންޖެހޭ ފައިސާގެ ތެރެއިން އޮގަސްޓްމަހުގެ ނިޔަލަށް މިހާތަނަށް 223 މިލިއަން ރުފިޔާ ހޯދިފައިވާ ޒުހައިރު ވިދާޅުވިއެވެ. އެގޮތުން މިއީ މިދިޔަ އަހަރުގެ މި މުއްދަތާ އަޅާބަލާއިރު ކުރިއެރުމެއްކަމަށް އޭނާ ވިދާޅުވިއެވެ. އެޗްޑީސީއަށް ނުލިބިވާ ފައިސާ ހޯދުމަށް މިދިޔަ އަހަރު ކުރެވުނު މަސައްކަތުން ހޯދިފައިވަނީ 220 މިލިއަން ރުފިޔާއެވެ. މިއަހަރުގެ ކުރިއަށް އޮތް މުއްދަތަށް ބަލައި އަހަރު ނިމޭއިރު، ލިބުނު ފައިސާގެ އަދަދު އެދެވޭ މިންވަރަކަށް އިތުރުވެގެންދާނޭކަން އޭނާ ފާހަގަކުރެއްވިއެވެ.
