ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ އާ ޓާމިނަލަށް ވަންނަން ދިޔަ ބޭންކް އޮފް މޯލްޑިވްސް (ބީއެމްއެލް) ގެ ދެ މުވައްޒަފެއްގެ އަތުން މޫނު ނިވާކޮށްގެން ތިބި ބަޔަކު ފައިސާތަކެއް ރޭ ފޭރިގަތީ ވަޅިން ބިރު ދެއްކުމަށް ފަހު ކަމަށް މައުލޫމާތު އެނގޭ ފަރާތްތަކަކުން ބުނެފި އެވެ.
ވީއައިއޭގެ އާ ޓާމިނަލަށް ވަންނަން ދިޔަ ބޭންކެއްގެ ދެ މުވައްޒަފެއްގެ އަތުގައި ހުރި ފައިސާ ސުއިޓް ކޭސް މޫނުނިވާ ކޮށްގެން ތިބި ބަޔަކު ފޭރިގަތް މައްސަލައިގެ ރިޕޯޓު ލިބުނީ ރޭގެ 4:45 ހާއިރު ކަމަށް ފުލުހުން ވަނީ ބުނެފަ އެވެ.
މިކަން ހިނގައިދިޔަ ގޮތުގެ މައުލޫމާތު ހުރި ފަރާތަކުން ”މިހާރު“ އަށް ކިޔައިދިން ގޮތުގައި ބީއެމްއެލްގެ ދެ މުވައްޒަފުން ހިފައިގެން ދިޔައީ ރާއްޖެ އިން ބޭރަށް ފުރާ މީހުންނަށް އާ ޓާމިނަލްގެ ކައުންޓަރުން މިއަދު ދޫކުރަންޖެހޭ ޑޮލަރުތައް ހުރި ސުއިޓް ކޭހެކެވެ. އަދި އެ މީހުންނަށް ވަޅިން ބިރު ދައްކައި އެ ސުއިޓް ކޭސް ފޭރިގަތީ ކުރީގެ ޓާމިނަލްގެ ތެރެއިން އާ ޓާމިނަލަށް ދާން ހަދާފައިވާ ”ވޯކްވޭ“ އިން ކަމަށް އެ މީހާ ކިޔައި ދިނެވެ.
”ފުލުހެއްގެ ސެކިއުރިޓީއާ އެކު އެ ދެ މުވައްޒަފުން ފައިސާ ހުރި ސުއިޓް ކޭސް ހިފައިގެން ދިޔައީ. އެ އެންމެންނަށް ވަޅިން ބިރު ދައްކާފައި ސުއިޓް ކޭސް ޖަހައިގަނެގެން ދުއްވައިގަތީ،“ މައުލޫމާތު އެނގޭ މީހާ ބުންޏެވެ.
ސުއިޓް ކޭސްގައި ހުރީ މިއަދު ހެނދުނު ރާއްޖެ އިން ބޭރަށް ފުރާ ދިވެހިންނަށް އާ ޓާމިނަލްގެ ޑޮލަރު ކައުންޓަރުން ދޫކުރަން ކަނޑައެޅި ފައިސާ އެވެ.
އެނގިފައިވާ ގޮތުގައި ވީއައިއޭގެ ބާ ޓާމިނަލާއި އާ ޓާމިނަލްގެ ތެރޭގައި ބީއެމްއެލްގެ މުވައްޒަފުން ފައިސާ އެއް ތަނުން އަނެއް ތަނަށް ގެންދަނީ ފުލުހުންގެ ސެކިއުރިޓީއާ އެކުގަ އެވެ.
ސުއިޓް ކޭސްގައި ހުރި ފައިސާގެ އަދަދެއް ފުލުހުން އަދި ހާމައެއް ނުކުރެ އެވެ.
