އަންގާރަ ދުވަހު ނިއު ޔޯކް ސިޓީގެ މޭޔަރުކަމުގެ އިންތިޚާބުން ޒޯހްރާން މަމްދާނީ ކާމިޔާބު ހޯއްދެވިއިރު، މިއީ ރިޕަބްލިކަން ކެންޑިޑޭޓަކާއި، އޭނާގެ ޑިމޮކްރެޓިކް ޕާޓީގެ ކެންޑިޑޭޓަކާއި، ބިލިއަނަރުންގެ ބޮޑު ލަޝްކަރަކާއި ކުރިމަތިލައި މިއެންމެންގެ މައްޗަށް ހޯދި ކާމިޔާބެކެވެ.
މަމްދާނީއަކީ އޭނާގެ އަމިއްލަ ބަހުންނަމަ ޑިމޮކްރެޓިކް ސޯޝަލިސްޓެކެވެ. އޭނާ ވެގެންދާނީ އެ މަޤާމު ފުރުއްވާ ފުރަތަމަ މުސްލިމް ބޭފުޅާއަށެވެ. އަދި ފާއިތުވި ގަރުނުގެ ތެރޭގައި އެމަގާމަށް އިންތިޚާބުވި އެންމެ ޒުވާން ބޭފުޅާއަށެވެ.
34 އަހަރުގެ މަމްދާނީ ކެމްޕޭން ކުރެއްވީ މާލީ ގޮތުން ދަތިކަން ބޮޑުވަމުންދާ ދުވަސްވަރެއްގައެވެ. އޭނާގެ ވައުދުތަކުގެ ތެރޭގައި ބޭނުންވަރެއްގެ ކުއްޔެއް އެޕާޓްމަންޓްތަކުން ނުނެގޭނެ ގޮތް ހެދުމާއި، ހިލޭ ބަސް ދަތުރުތަކާއި، ހުރިހާ ކުދިންނަށް ޗައިލްޑްކެއާ ލިބޭނެ ގޮތް ހެދުން ހިމެނެއެވެ. މި ސިޔާސަތުތަކަށް ފައިސާ ހޯދުމަށްޓަކައި، އޭނާ ވަނީ ނިއު ޔޯކް ސިޓީގެ މިލިއަނަރުންގެ މައްޗަށް ޓެކްސް ބޮޑުކުރުމަށާއި، ކޯޕަރޭޓް ޓެކްސް ރޭޓް މަތިކުރުމަށް ވައުދުވެފައެވެ.
20 އަށްވުރެ ގިނަ ބިލިއަނަރުން ވަނީ އެމެރިކާގެ އެންމެ އާބާދީ ބޮޑު ސިޓީގެ މޭޔަރުކަމަށް މަމްދާނީ އައުން ހުއްޓުވުމަށްޓަކައި ފައިސާ ހޭދަކޮށްފައެވެ. މިކަން ފެށުނީ ޑިމޮކްރެޓިކް ޕްރައިމަރީ ކެމްޕޭންގެ ތެރޭގައި، އޭނާ ކުރީގެ ނިއު ޔޯކްގެ ގަވަރުނަރު އެންޑްރޫ ކޫމޯއާ ފުރަތަމަ ފަހަރަށް ކުރިމަތިލި ހިސާބުންނެވެ.
މި ފައިސާގެ ބޮޑު ބައި ހޭދަކުރެވުނީ މައިގަނޑު ތިން ސުޕަރ ޕީއޭސީއަކަށެވެ. މިއީ ކޫމޯއަށް ތާއީދުކުރާ އަދި މަމްދާނީ އާއި ދެކޮޅު ޕީއޭސީތަކެކެވެ. ޕްރައިމަރީއިން ފެށިގެން ކޫމޯއަށް ތާއީދުކުރި ޕީއޭސީ ކަމަށްވާ ”ފިކްސް ދަ ސިޓީ“ އިން ވަނީ ކުރީގެ މޭޔަރަށް ތާއީދުކޮށް އަދި މަމްދާނީއާއި ދެކޮޅަށް ޓީވީ އިޝްތިހާރުތަކަށް މިލިއަނުން ފައިސާ ހޭދަކޮށްފައެވެ. މަމްދާނީއާއި ދެކޮޅު ޕީއޭސީތައް ކަމަށްވާ ”ޑިފެންޑް އެންވައިސީ“ (މިއީ ރައީސް ޑޮނަލްޑް ޓްރަމްޕްގެ ކުރީގެ އެޑްވައިޒަރު ޖޭސަން މީސްޓަރ ފެށި ޕީއޭސީއެކެވެ.) އަދި ”ފޯ އައުއާ ސިޓީ“ އަށް ވެސް ވަނީ ކުރީގެ މޭޔަރު މައިކަލް ބްލޫމްބާގް އާއި ހެޖް ފަންޑް މެނޭޖަރު ބިލް އެކްމަން ފަދަ ބިލިއަނަރުންގެ ފަރާތުން ބޮޑެތި އަދަދުތަކުން ފައިސާ ލިބިފައެވެ.
އަމިއްލަ ޚަރަދުކުރުމަށް ހުއްދަ ލިބިފައިވާ ސިޔާސީ ކޮމިޓީތައް، ނުވަތަ ޢާންމުކޮށް މަޝްހޫރުވެފައިވާ ގޮތުގައި ސުޕަރ ޕީއޭސީއަކީ އެމެރިކާގައި ހަރަކާތްތެރިވާ ސިޔާސީ ކޮމިޓީގެ ބާވަތެކެވެ. އާދައިގެ ޕީއޭސީތަކާ ޚިލާފަށް، ސުޕަރ ޕީއޭސީތަކަށް ކެމްޕޭނު އިޝްތިހާރުތަކަށް ޚަރަދުކުރުމަށްޓަކައި ފަރުދުންނާއި ޖަމްޢިއްޔާތަކުން ގިނަ އަދަދެއްގެ ފައިސާ ހޯދުމުގެ ޤާނޫނީ ހުއްދަ ލިބިފައިވެއެވެ. ނަމަވެސް، ކެންޑިޑޭޓުންގެ ކެމްޕޭނުތަކާ ނުވަތަ ސިޔާސީ ޕާޓީތަކާ އެއްބާރުލުން ދިނުމަށް ނުވަތަ ސީދާ އެހީތެރިވުމަށް އެފަރާތްތަކަށް ހުއްދަ ލިބިފައިނުވެއެވެ. ސުޕަރ ޕީއޭސީތަކަށް އާދައިގެ ޕީއޭސީތަކަށް ވެސް އަމަލުކުރާ އިންތިޒާމީ، ރިޕޯޓުކުރުމުގެ، އަދި ޢާންމުކޮށް ހާމަކުރުމުގެ ޤަވާޢިދުތަކަށް ތަބާވާންޖެހެއެވެ.
މަމްދާނީގެ ކެމްޕޭނަށް ހުރަސް އެޅުމަށް މަސައްކަތްކުރި ބިލިއަނަރުންގެ ތެރެއިން ބައެއް ބިލިއަނަރުންގެ މައުލޫމާތު ތިރީގައި އެވަނީއެވެ.
މައިކަލް ބްލޫމްބާގް (13.3 މިލިއަން ޑޮލަރު)
ނިއުޔޯކް ސިޓީގެ ކުރީގެ ތިން ދައުރުގެ މޭޔަރު އަދި ބްލޫމްބާގް ކުންފުނީގެ ކޯފައުންޑަރ، މިހާރު 100 ބިލިއަން ޑޮލަރަށް ވުރެ ގިނައިން ހުރިކަމަށް ރިޕޯޓްކުރެވޭ ބްލޫމްބާގް ވަނީ ކެމްޕޭނުގެ ފަހު މަހު ކޫމޯގެ ފިކްސް ދަ ސިޓީއަށް 5 މިލިއަން ޑޮލަރު ދީފައެވެ. މިއީ ޑިމޮކްރެޓިކް ޕްރައިމަރީގެ ތެރޭގައި ކޫމޯއަށް ދިން 8 މިލިއަން ޑޮލަރުގެ އިތުރަށް ދިން އެހީއެވެ. ބްލޫމްބާގާއި މަމްދާނީ ފުރަތަމަ ފަހަރަށް ބައްދަލުކުރީ ސެޕްޓެމްބަރު މަހުގައެވެ. ބްލޫމްބާގްގެ ސިޔާސީ އެޑްވައިޒަރެއް ކަމަށްވާ ހޮވާޑް ވުލްފްސަން ނިއުޔޯކް ޓައިމްސްއަށް ވިދާޅުވީ އެ ބައްދަލުވުމަކީ ”ޔަގީނުންވެސް ރަނގަޅު“ އަދި ”މުހިންމު“ ބައްދަލުވުމެއް ކަމަށެވެ. އެހެންނަމަވެސް، ބްލޫމްބާގް ވަނީ އޮކްޓޯބަރު މަހުގެ ފަހުކޮޅު ކޫމޯއަށް ދިން ތާއީދު އަލުން ކަށަވަރުކޮށްދީފައެވެ.
ލޯޑަރ އާއިލާ (2.6 މިލިއަން ޑޮލަރު)
ކޮސްމެޓިކްސް އީޖާދުކުރި އެސްޓީ ލޯޑަރގެ ދަރިފުޅު ރޮނާލްޑް ލޯޑަރ ވަނީ ސެޕްޓެމްބަރު މަހު 750,000 ޑޮލަރު، އަދި އޭގެ ފަހުން އޮކްޓޯބަރު މަހު ފިކްސް ދަ ސިޓީއަށް އިތުރު 250,000 ޑޮލަރު ހަދިޔާކޮށްފައެވެ. ލޯޑަރ ވަނީ 2007 ވަނަ އަހަރުން ފެށިގެން ވޯލްޑް ޖޫއިޝް ކޮންގްރެސްގެ ރައީސްކަން ކުރައްވާފައިވާ އަދި އިސްރާއީލަށް ވަރަށް ބޮޑަށް ތާއީދުކުރާ ބޭފުޅެކެވެ. އޭނާގެ އަނބިކަނބަލުން ޖޯ ކެރޯލް ލޯޑަރ ވެސް ވަނީ ފިކްސް ދަ ސިޓީއަށް 500,000 ޑޮލަރު ހަދިޔާކޮށްފައެވެ. އަދި އޭނާގެ ކާފަދަރިފުޅު ވިލިއަމް ލޯޑަރ ވަނީ 1 މިލިއަން ޑޮލަރު ދީފައެވެ. އޭގެ ތެރެއިން ދެބައިކުޅަ އެއްބައި ޕްރައިމަރީގެ ތެރޭގައި، އަދި އަނެއް ދެބައިކުޅަ އެއްބައި އާންމު އިންތިޚާބުގެ ތެރޭގައެވެ. އާއިލާގެ އެހެން މެންބަރުން ވެސް އެއްކޮށް އިތުރު ސަތޭކަ ހާސް ޑޮލަރު ހަދިޔާކޮށްފައިވެއެވެ. ފޯބްސް އިން ބުނާ ގޮތުގައި ލޯޑަރ އާއިލާގެ މިލްކިއްޔާތު 25.9 ބިލިއަން ޑޮލަރަށް އަރައެވެ.
ޖޯ ގައްބިއާ (2 މިލިއަން ޑޮލަރު)
އެއާބީއެންބީގެ އެއް ބާނީ ކަމަށްވާ ޖޯ ގައްބިއާ ވަނީ މި ރޭހަށް ޖުމްލަ 2 މިލިއަން ޑޮލަރު ހޭދަކޮށްފައެވެ. އޭގެ ތެރޭގައި ފިކްސް ދަ ސިޓީ އަދި ޑިފެންޑް އެންވައިސީއަށް ދީފައިވާ އެއް މިލިއަން ޑޮލަރު ހިމެނެއެވެ. ގައްބިއާއަކީ ރައީސް ޑޮނަލްޑް ޓްރަމްޕްގެ ޗީފް ޑިޒައިން އޮފިސަރެވެ. ޓްރަމްޕް ވަނީ އިންތިޚާބުގެ ފަހު ދުވަސްކޮޅު ކޫމޯއަށް ތާއީދުކޮށްފައެވެ. އޭނާގެ މިލްކިއްޔާތު 7.7 ބިލިއަން ޑޮލަރަށް އަރައެވެ. އޮކްޓޯބަރު 20 ގައި، ގައްބިއާ ވަނީ އެކްސްގައި ޕޯސްޓެއްކޮށް، ސްލީވާ އަށް ”އަދިވެސް ހީރޯއަކަށް ވެވޭނެ“ ކަމަށް ބުނެ، ކޫމޯއަށް ކާމިޔާބު ހޯދައިދިނުމަށްޓަކައި އޭނާ ރޭހުން ވަކިވުމަށް ބާރުއަޅާފައެވެ. މިއީ މަމްދާނީގެ ކާމިޔާބު ހުއްޓުވުމަށްޓަކައި ގިނަ މެދުމިނުގެ ޑިމޮކްރެޓުންނާއި ރިޕަބްލިކަނުން ކުރި މަސައްކަތެކެވެ.
ބިލް އެކްމަން (1.75 މިލިއަން ޑޮލަރު)
ހެޖް ފަންޑް އިންވެސްޓަރު އެކްމަން އަކީ މަމްދާނީއާ ދެކޮޅަށް ނިކުތް އެންމެ އަޑުގަދަ ބިލިއަނަރުންގެ ތެރޭގައި ހިމެނޭ އެކެކެވެ. އޭނާ ވަނީ 2025 ވަނަ އަހަރުގެ އޭޕްރީލް އާއި އޮކްޓޯބަރު މަހާ ދެމެދު ޑިފެންޑް އެންވައިސީއަށް 1 މިލިއަން ޑޮލަރު އަދި ފިކްސް ދަ ސިޓީއަށް އިތުރު 750,000 ޑޮލަރު ހަދިޔާކޮށްފައެވެ. ބްލޫމްބާގްގެ މައުލޫމާތުތަކަށް ބަލާއިރު 8 ބިލިއަން ޑޮލަރަށް ވުރެ މަތީގެ މިލްކިއްޔާތެއް ހުރި އެކްމަން، މޭޔަރުކަމުގެ ރޭހާ ބެހޭގޮތުން ސޯޝަލް މީޑިއާގައި ގަވާއިދުން ކޮމެންޓްކޮށްފައިވެއެވެ. އޭނާ ވަނީ ކޫމޯގެ ޕޯސްޓުތަކާއި، މަމްދާނީއަށް ”ކޮމީ“ (ކޮމިއުނިސްޓް) ކަމަށް ބުނެ ނިއު ޔޯކް ޕޯސްޓްގައި ޝާއިއުކޮށްފައިވާ ލިޔުންތަކާއި، ރިޕަބްލިކަން ކެންޑިޑޭޓް ކާޓިސް ސްލީވާ ރޭހުން ވަކިވުމަށް ބާރުއަޅާ ކޮމެންޓްތައް ހިއްސާކޮށްފައެވެ.
ބެރީ ޑިލަރ (500,000 ޑޮލަރު)
މީޑިއާގެ ބޮޑު ވިޔަފާރިވެރިއެއް ކަމަށްވާ ޑިލަރ އަކީ ރޫޕަރޓް މަރޑޮކްއާ ގުޅިގެން ފޮކްސް އުފެއްދެވި އަދި އައި.އޭ.ސީ. އާއި އެކްސްޕީޑިއާ ގްރޫޕްގެ ޗެއަރމަންއެވެ. އޭނާ ވަނީ ”ފިކްސް ދަ ސިޓީ“ އަށް ޖުމްލަ 500,000 ޑޮލަރު ހަދިޔާ ކޮށްފައެވެ. 5 ބިލިއަން ޑޮލަރުގެ މުއްސަނދިކަން ހުރި ޑިލަރ އަކީ ގިނަ ދުވަސްތަކެއް ވަންދެން ޑިމޮކްރެޓިކް ޕާޓީއަށް އެހީތެރިވެފައިވާ ފަރާތެކެވެ. މި އަހަރުގެ މާރޗް މަހު ކޫމޯއަށް ތާއީދު ކުރާކަން އޭނާ އޮތީ އިއުލާން ކޮށްފައެވެ.
ލޯރީ ޓިޝް (150,000 ޑޮލަރު)
ލޯވްސް ކޯޕަރޭޝަންގެ ފަރާތުން މުއްސަނދިކަން ލިބިފައިވާ ޓިޝްގެ އާއިލާ ވެސް ވަނީ މޭޔަރުގެ އިންތިޚާބަށް ފައިސާ ހަދިޔާ ކޮށްފައެވެ. ލޯރީ އެމް.ޓިޝް އިލިއުމިނޭޝަން ފަންޑުގެ ނަމުން މަޝްހޫރު ވެފައިވާ ލޯރީ ޓިޝް ވަނީ ޕްރައިމަރީ އާއި އާންމު އިންތިޚާބުގެ ތެރޭގައި ”ފިކްސް ދަ ސިޓީ“ އަށް 150,000 ޑޮލަރު ދީފައެވެ. އާއިލާގެ އެހެން މެންބަރުން ވެސް ވަނީ މި ގްރޫޕަށް ޖުމްލަ 1 މިލިއަން ޑޮލަރަށް ވުރެ ގިނައިން ދީފައެވެ.
ސްޓީވް ވިން (500,000 ޑޮލަރު)
ރިއަލް އެސްޓޭޓް ޑިވެލޮޕަރެއް އަދި ލަސް ވެގަސްގެ ލަގްޒަރީ ކަސީނޯގެ ބޮޑު ވިޔަފާރިވެރިއެއް ކަމަށްވާ ވިން އަކީ ރިޕަބްލިކަން ޕާޓީއަށް އެހީތެރިވާ މުހިންމު ފަރާތެކެވެ. ޖިންސީ ގޯނާގެ ތުހުމަތުތަކާ ގުޅޭ ގޮތުން ވޯލް ސްޓްރީޓް ޖާނަލްގެ ރިޕޯޓަކަށް ފަހު އޭނާ އިސްތިއުފާ ދެއްވުމުގެ ކުރިން 2017 އިން 2018 އަށް ރިޕަބްލިކަން ނޭޝަނަލް ކޮންވެންޝަން (އާރް.އެން.ސީ.) ގެ ފައިނޭންސް ޗެއަރގެ މަގާމު ފުރުއްވާފައިވެއެވެ. ނިއު ޔޯކް ސިޓީގެ މޭޔަރުގެ ކެމްޕޭނުގައި ވިން ވަނީ އޮކްޓޯބަރު މަހު ކޫމޯގެ ”ފިކްސް ދަ ސިޓީ“ އަށް 500,000 ޑޮލަރު ހަދިޔާކޮށްފައެވެ. ވިންގެ މުއްސަނދިކަން 3.9 ބިލިއަން ޑޮލަރާ ހަމައަށް އަރައެވެ.
އެލިސް ވޯލްޓަން (200,000 ޑޮލަރު)
ވޯލްމާޓްގެ މުއްސަނދިކަމުގެ ވާރުތަވެރިޔާ ކަމަށްވާ ވޯލްޓަން ވަނީ ”ފިކްސް ދަ ސިޓީ“ އަށް ދެ ހަދިޔާގެ ގޮތުގައި 200,000 ޑޮލަރު ދީފައެވެ. އޭގެ ތެރެއިން ދެބައިކުޅަ އެއްބައި ދީފައި ވަނީ ޕްރައިމަރީގެ ތެރޭގައި އޭޕްރީލް މަހު އަދި އަނެއް ބައި އޮގަސްޓް މަހުއެވެ. ވޯލްޓަންގެ އާޓް ފައުންޑޭޝަނުން ވަނީ ވިޓްނީ މިއުޒިއަމް އޮފް އެމެރިކަން އާޓް ވެސް ހިމެނޭ ގޮތަށް ނިއު ޔޯކް ސިޓީގެ މުއައްސަސާތަކަށް މަސައްކަތްތައް ދޫކޮށް އަދި އެހީގެ ފައިސާ ދީފައެވެ. ބްލޫމްބާގް ބިލިއަނެއާސް އިންޑެކްސްގައި 124 ބިލިއަން ޑޮލަރުގެ މުއްސަނދިކަމާއެކު ދުނިޔޭގެ 14 ވަނައަށް އެންމެ މުއްސަނދި މީހާގެ ގޮތުގައި އޭނާގެ ނަން ވަނީ ލިސްޓުކުރެވިފައެވެ.
ގިނަ އަދަދެއްގެ ބިލިއަނަރުންނާއި ދެކޮޅަށް މަމްދާނީ އިންތިޚާބު ކާމިޔާބުކުރިއިރު އެމެރިކާގެ އިންތިޚާބުތަކަށް ފައިސާގެ ނުފޫޒު ވަރަށް ބޮޑެވެ. އާއްމު ގޮތެއްގައި އެންމެ ބޮޑު ފަންޑެއް ހޯދާ ކެންޑިޑޭޓުން އިންތިޚާބު ކާމިޔާބު ކުރެއެވެ. ނަމަވެސް މިއިންތިޚާބުގައި އެގޮތަކަކަށް ނުވިއެވެ.
