ކުރީގެ ރައީސް އަބްދުﷲ ޔާމީން ހެންވޭރުކޮޅުގައި އިމާރާތް ކުރެއްވި ގެކޮޅަކީ ”ދައުލަތް ލޫޓުވާލައިގެން“ ހެއްދެވި ގެކޮޅެއް ކަމަށް ވިދާޅުވެ، ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި މަޖިލިހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހް، ނުސީދާ ގޮތެއްގައި ޔާމީނަށް މިއަދު ފާޑު ވިދާޅުވެއްޖެއެވެ.
ކުރީގެ ރައީސުންގެ އޮފީސް ހިންގަން ދައުލަތުން މަހަކު ދޭ 175،000ރ. ކަނޑާލަން ކުރީގެ ރައީސުންނަށް އިނާޔަތާއި ރައްކާތެރިކަން ދިނުމުގެ ގާނޫނަށް އިސްލާހު ގެނައުމެއް ބިލެއް މަޖިލިހަށް މިއަދު ވަނީ ހުށަހަޅައިފައެވެ. ސަރުކާރުގެ ފަރާތުން ބިލަށް އިސްލާހު ހުށަހެޅުއްވީ ހުޅުދޫ ދާއިރާގެ ޕީއެންސީގެ މެމްބަރު މުހައްމަދު ޝާހިދެވެ.
މަޖިލީހުގެ ޖަލްސާގައި ކުރި ބަހުސްގައި ފަލާހު ވިދާޅުވީ، ރައީސްކަން ފުރިހަމަ އަށް އަދާ ކުރައްވާފައިވާ ބޭފުުޅުންނަށް ހިމާޔަތާއި ރައްކާތެރިކަން ދޭން ޖެހޭނެ ކަމަށާއި އެ ރައީސުން ކުރައްވާ ހިދުމަތަކީ އާދައިގެ ރައްޔިތަކު ކުރާ ހިދުމަތުގެ އެތައް ސަތޭކަ ގުނައެއް އިތުރު ހިދުމަތްތަކެއް ކަމަށެވެ. ރާއްޖެ ކަހަލަ އާބާދީ ކުޑަ އިގްތިސާދީ ގޮތުން ހީނަރު، ހާލަތު ދަށް ގައުމެއްގައި، ސިޔާސީ ހަމަނުޖެހުން އޮތް ގައުމެއްގައި ރައީސެއްގެ މަސްއޫލިއްޔަތު އަދާކުރައްވަން އުނދަގޫވާނެ ކަމަށް އޭނާ ވިދާޅުވިއެވެ.
ފަލާހް ވިދާޅުވީ ރާއްޖޭގައި ވެރިކަން ކުރެއްވި ރައީސުންގެ ތެރެއިން އޮފީހެއް ހިންގަވައިގެން މަސައްކަތް ކުރައްވާ ރައީސަކަށް ފެނިވަޑައިގަތީ ކުރީގެ ރައީސް މައުމޫން އަބްދުލްގައްޔޫމް އެކަނި ކަމަށެވެ. މައުމޫން ފައުންޑޭޝަން އުފައްދަވައިގެން ގައުމަށް އަގުހުރި ހިދުމަތްތަކެއް ކުރައްވަމުން ގެންދަވާ ކަމަށް ފަލާހް ވިދާޅުވިއެވެ. ސިޔާސީ މަސްރަހާ ދުރުގައި، އޭރެއްގައި އޮންނަ ސަރުކާރަކާ ދެކޮޅަށް ނުވަތަ ”އަނިޔާވާ“ ކަހަލަ ގޮތަކަށް މައުމޫން ވާހަކަފުޅު ދައްކަވާ ތަނެއް ނުފެންނަ ކަމަށް ފަލާހް ވިދާޅުވިއެވެ.
ނަމަވެސް ބައެއް ރައީސުން ވެރިކަން ކުރެއްވި އިރު ދައުލަތުގެ ހަޒާނާ އިން ވަރަށް ގިނަ އަދަދެއްގެ ”ފައިސާ ވަގަށް ނަގައިގެން“ ވަރަށް ބޮޑެތި ގެތައް އަޅުއްވާފައި އެބަހުރި ކަމަށް ފަލާހް ވިދާޅުވިއެވެ.
”އެހެންވީމާ ހަގީގަތުގައި އެ ގޭގޭގައި ވެސް މި އިނާޔަތް ނުދިން ކަމުގައި ވިޔަސް އޮފީސް ހިންގުމަކީ ހަމަ ދައުލަތުން ފައިސާ ދީގެން އޮފީސް ހިންގުން ކަމަށް ރައްޔިތުންނަަށް ބެލެވެނީ، އެއީ ދައުލަތުގެ ހަޒާނާ އިން ވައްކަން ކޮށްގެން އެ ކޮށްފައި ހުންނަ އިމާރާތެއްގައި އަމިއްލައަށް ސިޔާސީ މަސައްކަތް ކުރާ ކަމަށްވާ ނަމަ، ދައުލަތުން ފައިސާ ލިބިގެން އެ ކަން އެ ކުރަނީ. އެއީ އެކަން ގަބޫލު ކުރެވޭނެ ގޮތަކީ،“ ޔާމީންގެ ނަން ނުގެންނަވައި އެކަމަކު، އެމަނިކުފާނަށް އިޝާރާތް ކުރައްވައި ފަލާހު ވިދާޅުވިއެވެ.
”އެއީ ކޮން ވެރިއެއް ކަން ނުދެންނެވިޔަސް، އެއީ ކޮން ވެރިއެއް ކަން ދިވެހި ރައްޔިތުންނަށް އެނގޭނެ މިވަރަށް ދެންނެވީމަ،“
ފަލާހް ވިދާޅުވި ގޮތުގައި އެފަދަ ވެރިންގެ އޮފީސް ހަރަދު ހިންގުމަށް 175،000ރ. ދެވިގެން ވާނެ ކަމަށް ނުކުރައްވާ ކަމަށެވެ.
ހެންވޭރުކޮޅުގައި ހުންނަ ހ. ނޫފަރުގެއަކީ ޔާމީން މިލްކު ކުރައްވާފައިވާ ގެއެކެވެ. ޔާމީން އެ ގެ ހޯއްދެވީ ގަލޮޅުގައި ހުންނަ ”ދޫވެހި“ ދޫކޮށްލެއްވުމަށް ފަހުގައެވެ. ހދ. ކުޅުދުއްފުށީ ވައިފިލާގެ މަރިޔަމް އަހުމަދުގެ ނަމުގައި އޮތް އެ ގޯތި ޔާމީނަށް މިލްކުވުމާ އެކު ދޫވެހި ވަނީ މަރިޔަމަށް މިލްކުވެފައެވެ. ނޫފަރަކީ 3،000 އެއްހާ އަކަފޫޓުގެ ބޮޑު ބިމެކެވެ. އަދި ދޫވެއްސަކީ 2،000 އަކަފޫޓުގެ ބިމެކެވެ. ނޫފަރު ގޭގެ މަސައްކަތް ނިމިފައިވާއިރު، ޔާމީން ދިރިއުޅުއްވަނީ ވެސް އަދި ޕީއެންއެފްގެ ހަރަކާތްތައް ހިންގަނީ ވެސް އެ ގެކޮޅުގައެވެ.
ބިލުގައި ކުރީގެ ނައިބު ރައީސުންނަށް ދައުލަތުން ކޮންމެ މަހަކު 25،000ރ. ދިނުން ހިމަނާފައިވެއެވެ. އެކަމަކު، ނައިބު ރައީސުންގެ ތެރެއިން އިނާޔަތް ލިބިވަޑައިގަންނަވާނީ ފަސް އަހަރުގެ ދައުރެއް ފުރިހަމަ ކުރައްވާފައިވާ ރައީސުންނަށް އެކަންޏެވެ. ބިލުގައިވާ ގޮތުން ހަމައެކަނި އިނާޔަތް ލިބިވަޑައިގަންނަވާނީ ނައިބު ރައީސް ފައިސަލް ނަސީމަށެވެ.
މީގެކުރިން ނައިބު ރައީސްކަން ކުރެއްވި ރައީސް ޑރ. ވަހީދު، ޑރ. މުހައްމަދު ވަހީދުއްދީން، ކުރީގެ ނައިބު ރައީސް ޑރ. މުހައްމަދު ޖަމީލް، ކުރީގެ ނައިބު ރައީސް އަހުމަދު އަދީބު، ކުރީގެ ނައިބު ރައީސް އަބްދުﷲ ޖިހާދަށް މި އިނާޔަތެއް ލިބިވަޑައެއް ނުގަންނަވާނެއެވެ. އެއީ ފަސް އަހަރުގެ ދައުރެއް ފުރިހަމަ ކުރައްވާފައި ނުވާތީއެވެ.
ފަލާހް ވިދާޅުވީ ޔާމީންގެ ވެރިކަމުގައި ތިން ނައިބު ރައީސުން ގެންނަން ޖެހުނީ ”އިތުބާރުގެ މައްސަލަ“ އަކުން ކަމަށެވެ. ޔާމީނުގެ ވެރިކަމުގެ ފުރަތަމަ ނައިބު ރައީސް ޖަމީލު ވަކިކުރަން ޖެހުނީ ވެރިކަން ވައްޓާލަން އުޅުއްވުމުން ކަމަށް ޔާމީނު އޭރު ވިދާޅުވި ކަމަށާއި މިހާރު އެކަމަކު އެއީ ދޮގުކަން ސާބިތުވާ ކަމަށް ފަލާހް ވިދާޅުވިއެވެ.
