ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިޔަފާރިވެރީންނާއި ބައްދަލުކުރެއްވުމަށް ނިންމަވައިފި އެވެ.
ސަރުކާރުގެ ތަރުޖަމާން ހީނާ ވަލީދު މިރޭ ވަނީ އެކަން އިއުލާނު ކުރައްވާފަ އެވެ. ހީނާ ވިދާޅުވި ގޮތުގައި ޑިސެންބަރު 17 ވާ ބުދަ ދުވަހުގެރޭ، ދިވެހި ވިޔަފާރިވެރިންނާ ރައީސުލްޖުމްހޫރިއްޔާ ބައްދަލުކުރެއްވުން އޮންނާނެ އެވެ.
ހީނާ ވިދާޅުވި ގޮތުގައި މިއީ، ރައްޔިތުންނާ ގާތުން ބައްދަލުކުރައްވައި، ޚިޔާލާއި މަޝްވަރާ ހޯއްދަވާ، ރައްޔިތުން ކަންބޮޑުވާ ކަންކަން ހިއްސާ ކުރައްވާ، ބޭނުންފުޅުވާ ކަންކަން ސީދާ އަޑުއެއްސެވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބާއްވަވާ ސިލްސިލާ ބައްދަލުކުރެއްވުންތަކުގެ ތެރެއިން ކުރިއަށް ގެންދަވާ ބައްދަލުކުރެއްވުމެއް ކަަމަށެވެ.
ހީނާ ވަނީ 17 ޑިސެންބަރު ވާ ބުދަ ދުވަހުގެރޭ 8:30 ގައި، ސޯޝަލް ސެންޓަރުގައި އޮންނަ މި ބައްދަލުކުރެއްވުމުގައި ބައިވެރިވެ ވަޑައިގަތުމުގެ ދަޢުވަތު ދިވެހި ވިޔަފާރިވެރިންނަށް ދެއްވާ ކަމުގައިވެސް ވިދާޅުވެފަަ އެވެ.
ރައީސުލްޖުމްހޫރިއްޔާ ގެންދަވަނީ މާލޭގެ ރައްޔިތުންނާއި ބަައްދަލުކުރެއްވުމުގެ ގޮތުން އަވަށްތަކުގެ ރައްޔިތުންނާއި ވަކިވަކީން ބައްދަލްވުންތައް ބާއްވަވަމުންނެވެ.
ރައްޔިތުންނާ ގާތުން ރައްޔޮތުންގެ ޚިޔާލާއި މަޝްވަރާ ހޯއްދެވުމަށް ރައީސް މުޢިއްޒު އަންނަނީ ރާއްޖޭގެ އެކި ކަންކޮޅުތަކަށް ޒިޔާރަތް ކުރައްވަމުންނެވެ. އެގޮތުން އެމަނިކުފާނު މިހާރު ވަނީ ރާއްޖޭގެ ހުރިހާ ރަށަކަށް ޒިޔާރަތްކުރައްވާފައެވެ.
