ރާއްޖޭގައި މިއަދު 2 މިސްކިތް ހުޅުވިގެން ދިޔައިރު، ކުރިއަށް އޮތް 6 މަސްތެރޭ ގިނަ މިސްކިތްތަކެއް ހުޅުވިގެންދާނެ ކަމަށް އިސްލާމީ ކަންތައްތަކާ ބެހޭ ވަޒިރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ވަޒީރު އެކްސްގައި ހިއްސާކުރެއްވި ޕޯސްޓެއްގައި ވިދާޅުވީ، ކުރިއަށް އޮތް ރަމަޟާން މަހުގެ ކުރިން ހުޅުވޭނެ ކަމަށް އިއުލާން ކުރި 15 މިސްކިތުގެ ތެރެއިން މިހާތަނަށް ހުޅުވިގެން މި ދިޔައީ 5 އަދި 6 މިސްކިއްކަމަށެވެ.
މީގެއިތރުން ވަޒީރު ވިދާޅުވީ،ހުޅުމާލެގައި ދާއިމީ 4 މިސްކިތް ހުޅުވިގެންދާނެކަމަށާއި، އަދި އަތޮޅުތަކުގައި ވެސް ގިނަ މިސްކިތްތަކެއް ހުޅުވިގެންދާނެ ކަމަށެވެ. އަދި ހުޅުވިގެންދާ މިސްކިތްތަކުގެ ތެރޭގައި ހެޔޮ އެދޭ ފަރާތްތަކާ މިނިސްޓްރީ ގުޅިގެން ގެންދާ މަޝްރޫޢުތަކާއި ސަރުކާރުގެ މަޝްރޫޢުތައް ހިމެނޭ ކަމަށް ވެސް ވަޒީރު ސައީދު ފާހަގަ ކުރެއްވިއެވެ.
މިއަދު ވަނީ ރާއްޖޭގައި 2 މިސްކިތެއް ހުޅުވާފައެވެ. އެއީ ސަރުކާރު ޚަރަދުގައި އައްޑޫ ސިޓީ މަރަދޫގައި ބިނާކުރި މަސްޖިދުއްރައްޔާން އާއި،އަމިއްލަ ފަރާތަކުން ހުޅުމާލެ ދެވަނަ ފިޔަވަހީގައި ބިނާކުރި މިސްކިތް، ”މަސްޖިދުލް އީމާން“ އެވެ.
ރާއްޖޭގެ އެކި ކަންކޮޅުތަކުގައި ބިނާކުރަމުންގެންދާ މިސްކިތްތަކުގެ ތެރެއިން 15 ވަރަކަށް މިސްކިތުގެ މަޝްރޫޢު ނިންމައި، ރަމަޟާން މަހުގެ ކުރިން ހުޅުވުމަކީ ސަރުކާރުގެ އަމާޒެކެވެ.
