އީރާނާ ދެކޮޅަށް އެމެރިކާ އިން ކުރާ ފުރައްސާރަތަކުގެ ސަބަބުން މުޅި ސަރަހައްދު ނުރައްކާތެރި ހާލަތަކަށް ވެއްޓިދާނެ ކަމުގެ އިންޒާރު ޗައިނާއިން ދީފި އެވެ.
އީރާނާ ދެކޮޅަށް އެމެރިކާ އިސްވެ އޮވެ ހިންގާ އަސްކަރީ ހަރަކާތްތަކުގެ ސަބަބުން، ހުޅަނގު އޭޝިއާގެ ހަމަޖެހުން ގެއްލި، އަންދާޒާ ނުކުރެވޭ ފަދަ ނުރައްކާތެރި ނަތީޖާތަކަކާ ކުރިމަތިލާން ޖެހިދާނެ ކަމަށް ޗައިނާ އިން ބުނެފައިވެ އެވެ.
އދ. ގެ ސަލާމަތީ މަޖިލީހުގައި މިދިޔަ ބުދަ ދުވަހު ވާހަކަ ދައްކަވަމުން، ޗައިނާ އިން އދ. އަށް ކަނޑައަޅާފައި ހުންނަވާ ދާއިމީ މަންދޫބު ފޫ ކޮންގް ވިދާޅުވީ، ހަނގުރާމައިގެ ބިރުވެރިކަން ބޮޑުވެ، ސަރަހައްދީ މަސްލަހަތު ގޯސްވަމުންދާތީ މުޅި ދުނިޔެ އިން އީރާނުގެ މަސްރަހާ މެދު ކަންބޮޑުވުން ފާޅުކުރަމުންދާ ކަމަށެވެ.
ޗައިނާ ގެ މަންދޫބު އިންޒާރު ދެއްވި ގޮތުގައި، ވިސްނުމެއް ނެތި ހިންގާ އަސްކަރީ އަމަލުތަކުގެ ސަބަބުން ބޮޑެތި ގެއްލުންތަކެއް ލިބިގެންދާނެ އެވެ. އަދި ބާރުގެ ބޭނުން ކޮށްގެން އެއްވެސް މައްސަލައަކަށް ހައްލެއް ނުލިބޭނެ ކަމަށާއި، އަސްކަރީ ކުރިމަތިލުންތަކުގެ ސަބަބުން މުޅި ސަރަހައްދު ނުރައްކާތެރި، ކޮންޓްރޯލުން ނެއްޓިފައިވާ އަނދަވަޅަކަށް ވެއްޓިގެންދާނެ ކަމަށް އޭނާ ފާހަގަކުރެއްވި އެވެ.
އެމެރިކާ އާއި އެގައުމުގެ ބައިވެރިން މި މައްސަލަ އިތުރަށް ގޯސްކުރުން ހުއްޓާލުމަށް ގޮވާލައްވަމުން ފޫ ވިދާޅުވީ، ބައިނަލްއަގުވާމީ މުޖުތަމައު އާއި ސަރަހައްދީ ގައުމުތަކުގެ ގޮވާލުންތަކަށް އެމެރިކާ އިން އިޖާބަދޭނެ ކަމަށް އުންމީދު ކުރައްވާ ކަމަށެވެ. އަދި މެދުއިރުމަތީގެ ސުލްހަ އާއި ހަމަޖެހުމަށް މަސައްކަތްކޮށް، އަލިފާނަށް ދަރު އެޅުން ފަދަ ނުތަނަވަސްކަން އިތުރުވާ އަމަލުތަކުން ދުރުހެލިވުމަށް ވެސް އޭނާ އިލްތިމާސް ކުރެއްވި އެވެ.
އީރާނުގެ އިސްތިގުލާލީ ހައްގުތަކަށް އިހުތިރާމް ކުރަންޖެހޭނެ ކަމަށް ވިދާޅުވެ، ފޫ ވިދާޅުވީ އީރާނުގެ މުސްތަގުބަލު ނިންމާނީ ހަމައެކަނި އެ ގައުމުގެ ރައްޔިތުން ކަމަށެވެ. އަދި އީރާނުގެ ހަމަޖެހުމާއި، އިސްތިގުލާލާއި، ސަލާމަތާއި، ސަރަހައްދީ ހަމަޖެހުން ދެމެހެއްޓުމަށް ޗައިނާ އިން ފުރިހަމަ އަށް ތާއީދުކުރާނެ ކަމަށް އޭނާ ވިދާޅުވި އެވެ.
ބައިނަލްއަގުވާމީ ގާނޫނުތަކާ ގުޅޭގޮތުން ޗައިނާގެ ސިޔާސަތު ތަކުރާރު ކުރައްވަމުން އޭނާ ވިދާޅުވީ، ހުރިހާ ފަރާތްތަކުން ވެސް އދ. ގެ މަންޝޫރުގައިވާ އުސޫލުތަކަށް ބޯލަނބަން ޖެހޭނެ ކަމަށެވެ. އަދި އެހެން ގައުމުތަކުގެ ދާޚިލީ ކަންކަމާ ބެހުމާއި، ބައިނަލްއަގުވާމީ މުއާމަލާތްތަކުގައި ބާރުގެ ބޭނުން ކުރުން ނުވަތަ ބާރުގެ ބޭނުންކޮށްފާނެ ކަމުގެ އިންޒާރު ދިނުމާ ޗައިނާ އިން ދެކޮޅު ހަދާ ކަމަށް ވެސް ވިދާޅުވި އެވެ.
ޗައިނާގެ މަންދޫބު އިތުރަށް ވިދާޅުވީ، ހުޅަނގު އޭޝިއާ އަކީ ބޭރުގެ ބާރުތަކުން ނުފޫޒު ފޯރުވުމަށް ކުޅިވަރުގެ މައިދާނަކަށް ހެދުމަށް ޗައިނާ އިން ދެކޮޅު ހަދާ ކަމަށެވެ. އޭނާ ފާހަގަކުރެއްވި ގޮތުގައި އެ ސަރަހައްދަކީ އެ ތަނުގެ ރައްޔިތުންގެ މިލްކެއް ކަމަށާއި، ބޭރުގެ ގައުމުތަކުގެ ސިޔާސީ މަސްލަހަތުތަކަށްޓަކައި އެ ސަރަހައްދު ގުރުބާންކޮށްގެން ނުވާނެ ކަމަށެވެ.
ޗައިނާގެ ސަފީރު މިފަދައިން ވިދާޅުވެފައި މިވަނީ، އެމެރިކާގެ ރައީސް ޑޮނަލްޑް ޓްރަމްޕް އީރާނާ ދެކޮޅަށް އަސްކަރީ ހަމަލާއެއް ދީފާނެ ކަމުގެ އިންޒާރުތައް ދެއްވަމުން ގެންދަވާ ދަނޑިވަޅެއްގަ އެވެ.
އެމެރިކާ އިން ވަނީ އީރާނާ ކައިރިއަށް، ހުޅަނގު އޭޝިއާގެ ކަނޑުގެ ސަރަހައްދަށް ”ޔޫއެސްއެސް އަބްރަހަމް ލިންކަން“ މަތިންދާބޯޓު އުފުލާ މަނަވަރާއި އޭގެ އަސްކަރީ ގުރޫޕް ފޮނުވާފަ އެވެ. އަދި ޓްރަމްޕް އަންގާރަ ދުވަހު ވިދާޅުވީ، އެމެރިކާގެ އަސްކަރީ މަނަވަރުތަކުގެ ބޮޑު ފައުޖެއް އީރާނާ ދިމާލަށް ދަތުރުކުރަމުންދާ ކަމަށެވެ.
މިދިޔަ ހަފުތާގެ ފަހުކޮޅު، އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) ގެ ޑެޕިއުޓީ ކޮމާންޑަރު ބްރިގޭޑިއާ ޖެނެރަލް އަހުމަދު ވަހީދީ ވިދާޅުވީ، އެގައުމާ ދެކޮޅަށް ހިންގާ ކޮންމެ އުދުވާނީ އަމަލަކަށް ހަރުކަށި ރައްދު ދިނުމަށް އީރާން އޮތީ ފުރިހަމައަށް ތައްޔާރަށް ކަމަށެވެ. އަދި އީރާނާ ދެކޮޅަށް އެއްވެސް ނުރައްކާތެރި ފިޔަވަޅެއް ނޭޅުމަށް އޭނާ ވަނީ ދުޝްމަނުންނަށް އިންޒާރު ދެއްވާފަ އެވެ.
