ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށްލުމަށް ސަރުކާރުގެ ފަރާތުން ގާނޫނުއަސާސީއަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފިއެވެ.
ރާއްޖޭގެ އެކިކަންކޮޅުތަކުގައި މިދިޔަ އަހަރުގެ ކުރީކޮޅު ”ވަގުތު“ ގެ ފަރާތުން ކުރިއަށް ގެންދިޔަ ސާވޭގައި ގިނަ ރައްޔިތުން ތާއީދު ކުރީ ރިޔާސީ އިންތިހާބާއި މަޖިލިސް އިންތިހާބު އެއްކޮށްލައި އެއް ދުވަހެއްގައި ބޭއްވުމަށެވެ. އެގޮތުން ކޮންމެ ރަށަކުން ވެސް އެވްރެޖްކޮށް %70 މަތިން އެކަމަށް ތާއީދުކުރިއެވެ. ވަކިވަކި އަތޮޅުތައް ބެލި ކަމުގައި ވިޔަސް، އެވްރެޖްކޮށް %70 އަށް ވުރެ ގިނަ ރައްޔިތުން ބޭނުންވަނީ މަޖިލިސް އިންތިހާބާއި ރިޔާސީ އިންތިހާބު އެއްކޮށްލުމަށެވެ.
މަޖިލިހުގެ އިނގުރައިދޫ ދާއިރާގެ މެންބަރު އިބްރާހިމް ފަލާހު މިދިޔަ ޖެނުއަރީ މަހު ހުށަހެޅުއްވި އެ ބިލް ދިރާސާކުރުމަށްފަހު މަޖިލީހުގެ މިނިވަން މުއައްސަސާތަކުގެ ކޮމިޓީން ފާސްކޮށް ކޮމިޓީ ރިޕޯޓް މިއަދު ވަނީ މަޖިލީހުގެ ތަޅުމަށް ހުށަހަޅައިފައެވެ. އެ ރިޕޯޓަށް ބަހުސްކުރައްވަމުން އިދިކޮޅު މެންބަރުން ވަނީ މިއީ ސަރުކާރުން އަވަސް އަރުވާލައިގެން ކުރާ ކަމެއް ކަމަށް ތުހުމަތުކުރައްވައި މަޖިލީހުގެ ތަޅުމުގައި އިހުުތިޖާޖް ކުރައްވައިފައެވެ.
ނަމަވެސް ގިނަ މެންބަރުން ވިދާޅުވީ މިއީ ވަރަށް ރަނގަޅު އިސްލާހެއް ކަމަށާއި ދައުލަތުގެ ހަރަދުތައް ކުޑަކުރުމަށް މިއީ މުހިންމު ބިލެއް ކަމަށެވެ.
ދެ އިންތިހާބު އެއްކޮށްލުމަށް ގާނޫނުއަސާސީއަށް ގެނެވޭ އިސްލާހަށް މަޖިލިސް މެންބަރުންގެ މެދުގައި ނެގުނު ވޯޓުގައި 72 މެންބަރުންގެ ވޯޓާއެކު އެ އިސްލާހު ވަނީ ފާސްކޮށްފައެވެ. އެ ބިލާ ދެކޮޅަށް އެއް މެންބަރުން ވަނީ ވޯޓު ދީފައެވެ.
ކޮމިޓީން އެ ބިލް ފާސްކޮށްފައިވަނީ ސަރުކާރުން ހުށަހެޅި ގޮތަށް އެއްވެސް ބަދަލެއް ނުގެނެސްއެވެ. ކޮމިޓީ މަރުހަލާގައި މި ބިލަށް ހިޔާލު ހޯދުމަށް ހުށަހަޅައި ބަންޑާރަ ނައިބާއި އީސީ އަދި ރާއްޖޭގެ ސިޔާސީ ޕާޓީތަކާއެކު މުހިންމު މަޝްވަރާތައް ވަނީ ކުރިޔަށް ގެންގޮސްފައެވެ. އެ މަޝްވަރާ ބައްދަލުވުމުގައި ބަންޑާރަ ނައިބް އަހްމަދު އުޝާމް ވިދާޅުވީ ދެ އިންތިހާބު އެއްކޮށްލުމާ ގުޅޭ ގޮތުން އެންމެ ބޮޑަށް އަންނަ ފާޑުކިޔުމަކީ ރައްޔިތުންގެ މަޖިލީހުގެ އިންތިހާބުގެ ގޮތުގައި ރައީސް ޖަވާބުދާރީކުރުވަން ރައްޔިތުންނަށް ލިބޭ ފުރުސަތު ގެއްލުން ކަމަށެވެ. އެއީ ރަނގަޅު ވާހަކައެއް ކަމަށް ގަބޫލު ނުކުރައްވާ ކަމަށް އުޝާމް ވިދާޅުވިއެވެ.
ނިމިދިޔަ ރައްޔިތުންގެ މަޖިލީހުގެ އިންތިހާބު ނިމިގެން ދިޔައިރުގައި 120 މިލިޔަން ރުފިޔާއަށް ވުރެ ގިނަ ރުފިޔާ ހަރަދުވެފައިވާއިރު، ނިމިދިޔަ ރިޔާސީ އިންތިހާބުގެ ދެބުރު ނިމުނުއިރު 180 މިލިޔަނަށްވުރެ ގިނަ ރުފިޔާ ހަރަދުވިއެވެ.
އެ އިސްލާހު ހުށަހެޅުމުގެ ބޭނުމަކީ މަޖިލީހުގެ މެންބަރުކަމަށް މީހުން ހޮވުމަށާއި ރައީސުލްޖުމްހޫރިއްޔާއަކު ހޮވުމަށް ބާއްވަން ޖެހޭ އިންތިހާބު ބާއްވަން ވާނީ، ދެ އިންތިހާބު އެކީގައި ކަމަށް ކަނޑައެޅުމަށާއި، މަޖިލީހުގެ އުމުރު ގުނުމުގެ އުސޫލު އިސްލާހު ކުރުން ކަމަށް އެ ބިލްގައި ވެއެވެ.
އެ ބިލްގައި ވަނީ ދެ އިންތިހާބު އެއްކޮށްލުމުގެ އިތުރުން، ރައްޔިތުންގެ މަޖިލީހުގެ އުމުރަކީ ޑިސެމްބަރު އެއް ވަނަ ދުވަހުން ފެށިގެން ފަސް އަހަރު ދުވަސް ކަމަށް ކަނޑައެޅުމަށެވެ. މި މުއްދަތު ހަމަވުމުން މަޖިލީސް އުވުނީ ކަމަށްވެސް ބުނެފައި ވެއެވެ.
އަދި ހިނގަމުންދާ މަޖިލީހުގެ އުމުރު ހަމެވެގެން މަޖިލީސް އުވުމާއެކު، އަލަށް އިންތިހާބު ކުރާ މަޖިލީހުގެ ފުރަތަމަ ޖަލްސާ ބާއްވަންވާނީ ޑިސެމްބަރު އެއް ވަނަ ދުވަސް ކަމަށް ކަނޑައަޅަންވެސް އިސްލާހުގައި ވެއެވެ.
ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލުމުގެ ބިލާއި ގުޅޭގޮތުން ރައީސް ޑރ. މުހައްމަދު މުއިއްޒު މީގެ ކުރިން ވިދާޅުވީ ދެ އިންތިހާބު އެއްކޮށްލުމުގެ ވާހަކައަކީ މީގެ ކުރިން ވެސް ދެކެވިފައިވާނެ ވާހަކައެއް ކަމަށާއި އެ އިސްލާހު މަޖިލީހުން ފާސްކުރުމަށްފަހު، އެ ކަމުގައި ރައްޔިތުންނަށް ފެންނަ ނުފެންނަ ވޯޓެއް ނުވަތަ ރެފަރެންޑަމެއް ވެސް ނެގުން އޮންނާނެ ކަމަށެވެ. އެހެންކަމުން، ރައްޔިތުންނަށް ފެންނަ ކަމުގައިވާނަމަ، އެ ދެ އިންތިހާބު ދެން އޮންނާނީ އެކުއެކީގައި ކަމަށް އެމަނިކުފާނު ފާހަގަކުރެއްވިއެވެ.
މި ބަދަލުތަކުގެ ބޭނުމަކީ ރާއްޖޭގެ ބަރުހެލި ނިޒާމަށް ބަދަލުތަކެއް ގެނައުން ކަމަށާއި، މިއީ ރައްޔިތުންނަށް އެންމެ ފައިދާ ބޮޑު ގޮތަށް ގެނެވޭ ބަދަލުތަކެއް ކަމުގައި ވެސް ރައީސް މުއިއްޒު ވިދާޅުވިއެވެ. ދެ އިންތިހާބު ވަކިވަކިން ބޭއްވުމުން ވަރަށް ހަރަދު ބޮޑުކަން ފާހަގަކުރައްވަމުން ރައީސް ވިދާޅުވީ ރައްޔިތުންނަށް ފައިދާ ނުވާ ގޮތަކަށް އެއްވެސް މާނައެއް ނެތް ގޮތަށް އެ ނިޒާމު ބޭއްވުމުގެ ބޭނުމެއް ނެތް ކަމަށެވެ.
