އީރާނުގެ ނިއުކްލިއާ މައްސަލައިގައި އެމެރިކާއާއެކު ނުސީދާ މަޝްވަރާތަކެއް ކުރިއަށް ދަނިކޮށް، އީރާނުގެ އެންމެ މަތީ ވެރިޔާ އަޔާތުالله އަލީ ޚާމަނާއީ، އެމެރިކާގެ ރައީސް ޑޮނަލްޑް ޓްރަމްޕަށާއި އެމެރިކާގެ ސިޔާސަތުތަކަށް ވަރުގަދަ ބަހުގެ ހަމަލާތަކެއް އަމާޒު ކުރައްވައިފިއެވެ.
ޖެނީވާގައި ކުރިއަށްދިޔަ މި މަޝްވަރާތަކަށްފަހު އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، އެއްބަސްވުމެއްގެ އަސާސީ އުސޫލުތަކަށް އެއްބަސްވެފައިވާ ކަމަށެވެ. ނަމަވެސް، އުމުރުފުޅުން 86 އަހަރުގެ ޚާމަނާއީ ވަނީ މި މަޝްވަރާތަކާމެދު އޮތް ނުތަނަވަސްކަން ހާމަކުރައްވައިފައެވެ.
އެ ބައްދަލުވުމުގައި ވާހަކަފުޅު ދައްކަވަމުން ޚާމަނާއީ ވިދާޅުވީ، 1979 ވަނަ އަހަރުގެ އިސްލާމީ އިންގިލާބަށްފަހު އީރާނުގެ ވެރިކަން ވައްޓާލުމަށް އެމެރިކާއިން ކުރި މަސައްކަތް ނާކާމިޔާބުވެފައިވާ ކަމަށް ޓްރަމްޕް އަމިއްލައަށް އިއުތިރާފުވެފައިވާ ކަމަށެވެ. އަދި ކުރިއަށް އޮތް ތަނުގައި ވެސް އެމެރިކާއަށް އެކަން ނުކުރެވޭނެ ކަމަށް އޭނާ ވިދާޅުވިއެވެ.
ޚާމަނާއީ ވިދާޅުވީ، އީރާނުގެ ނިއުކްލިއާ ހަކަތައިގެ މަޝްވަރާގެ ނަތީޖާއަކީ އެ ހަކަތަ އީރާނަށް ބޭނުންނުކުރެވޭ ގޮތް ހެދުން ކަމަށްވާނަމަ، އެއީ ބަލައިގަނެވޭނެ ކަމެއް ނޫން ކަމަށެވެ. އަދި ޔުރޭނިއަމް އުފެއްދުން ހުއްޓާލުމަށް އެމެރިކާއިން ކުރާ މޮޔަ ޑިމާންޑްތަކަށް އީރާނުން ދޫނުދޭނެ ކަމަށްވެސް އޭނާ ވިދާޅުވިއެވެ.
މި މަޝްވަރާތަކުގައި އެމެރިކާގެ ފަރާތުން އިސްކޮށް ބައިވެރިވި ހާއްސަ މަންދޫބު ސްޓީވް ވިޓްކޮފް އާއި ޓްރަމްޕްގެ ދަރިފުޅު ޖެރެޑް ކުޝްނާއެވެ. އީރާނުން ބޭނުންވަނީ 2018 ވަނަ އަހަރު ޓްރަމްޕް އެއްބަސްވުމުން ވަކިވުމާ ގުޅިގެން އަޅާފައިވާ ދަތިކުރުމުގެ ފިޔަވަޅުތައް އުވާލުމަށެވެ.
ދެގައުމުގެ ދެމެދުގައި ބަަހުގެ ހަމަލާތައް ބަދަލުކުރެވެމުންދާއިރު، އީރާނުގެ ރިވޮލިއުޝަނަރީ ގާޑްސް (އައިއާރުޖީސީ) އިން ވަނީ ސްޓްރެއިޓް އޮފް ހޯރްމޫޒްގައި އަސްކަރީ ތަމްރީނުތަކެއް ބާއްވައި، ދުނިޔޭގެ ތެލުގެ ވިޔަފާރީގެ މުހިންމު މި މަގު ބަންދުކޮށްލާނެ ކަމުގެ އިންޒާރުވެސް ދީފައެވެ.
މަޝްރަހު ދިރާސާކުރާ ފަރާތްތަކުން ބުނާ ގޮތުގައި، ޖެނީވާގެ މަޝްވަރާތައް ވަރަށް އަވަހަށް ނިމިގެންދިއުމަކީ ދެގައުމުގެ ދެމެދުގައި އޮތް ހިޔާލުތަފާތުވުންތައް ބޮޑުކަމުގެ ނިޝާނެކެވެ. އެމެރިކާއިން ބޭނުންވަނީ އީރާނުގެ މިސައިލް ޕްރޮގްރާމާއި ހަތިޔާރު އެޅި ޖަމާއަތްތަކަށްދޭ އެހީތެރިކަން ހުއްޓުވުމަށެވެ. ނަމަވެސް އީރާނުން ބުނަމުންދަނީ އެއީ އެގައުމުގެ މިނިވަންކަމާ ގުޅިފައިވާ ކަމެއް ކަމަށެވެ.
