މަރުކަޒީ ބޭންކް — މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހުމަދު މުނައްވަރު ރައްޔިތުންގެ މަޖިލީހަށް ހާޒިރުކުރަން އިދިކޮޅު އެމްޑީޕީން އެދިއްޖެ އެވެ.
އެމްޑީޕީގެ މައިކްރޯއިކޮނޮމިކް ކޮމިޓީގެ މުގައްރިރު ހުސެން އަމްރު، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް ފޮނުއްވި ސިޓީގައި ބުނީ ރާއްޖޭގެ ބޭރު ފައިސާގެ އެކްސްޗޭންޖްގެ ހާލަތު އިންތިހާއަށް ގޯސް ކަމަށެވެ.
އެހެންވެ އެމްއެމްއޭގެ ގަވަރުނަރު މަޖިލީހަށް އަވަސް ގޮތެއްގައި ހާޒިރުކުރުމަށް މަޖިލީހުގެ މާލިއްޔަތު ކޮމިޓީގެ ކިބައިން ވަނީ އެދިފަ އެވެ.
މި ސިޓީގައި ވަނީ ރާއްޖޭގައި ޑޮލަރުގެ އަގު ފާއިތުވި ދެ އަހަރާއި ބައިގެ ތެރޭގައި 27 ޕަސެންޓް އިތުރުވެފައިވާކަން ފާހަގަކޮށްފަ އެވެ.
އެ ގޮތުން ޖުލައި 2024 ގައި ޑޮލަރެއްގެ އަގު 17.40ރ. އަށް ހުރި ނަމަވެސް މިއަދު ޑޮލަރެއް ލިބެނީ 22.10ރ. އަށް ކަމަށް ބުނެފައިވެ އެވެ.
ޑޮލަރުގެ އަގު ބޮޑުވުމަކީ ހަމައެކަނި ބޭންކުތަކާ ފައިސާ މާރުކުރާ ފަރާތްތަކަށް އެކަނި ކުރިމަތިވާ މައްސަލައެއް ނޫން ކަމަށާއި މިއީ ދިރިއުޅުމުގެ އަގާ ގުޅިފައިވާ ކޮންމެ ގޭބިސީއަކާ ގުޅިފައިވާ ބޮޑު މައްސަލައެއް ކަމަށް އެމްޑީޕީން ވަނީ ބުނެފަ އެވެ.
ރާއްޖޭގައި ރަސްމީކޮށް ޑޮލަރުގެ އެކްސްޗޭންޖް ރޭޓެއް ކަނޑައެޅިފައިވީ ނަމަވެސް، ފޮރިން އެކްސްޗޭންޖް މާކެޓެއް ހާމަކޮށް ބޮޑުކޮށް އޮޕަރޭޓް ކުރަމުންދާއިރު މި މާކެޓްގެ އަގުތައް އެންމެންނަށް އެނގޭ އެމްޑީޕީގެ ސިޓީގައި ބުނެފައިވެ އެވެ.
”މިއީ އެމްއެމްއޭއަށް ނޭނގޭނެ ކަމެއްކަމަކަށް ގަބޫލެއްނުކުރެވެއެވެ. އެމްއެމްއޭއަށް މިކަމުގެ ފުރިހަމަ މައުލޫމާތު ލިބިފައިވާނެކަމީ ޔަގީންކަމެކެވެ،“ އެމްޑީޕީން ބުންޏެވެ.
އެމްޑީޕީގެ ސިޓީގައި ވަނީ ރަސްމީ އެކްސްޗޭންޖް ރޭޓާއި ބްލެކް މާކެޓް ރޭޓުގައި ބޮޑު ތަފާތެއް އުޅެނީ ކީއްވެތޯ ސުވާލުކޮށްފަ އެވެ. އަދި 2024 ވަނަ އަހަރު 17.40ރ. އަށް ލިބުނު ޑޮލަރެއްގެ އަގު މިއަދު 22.10ރ. އަށް އެރީ ކީއްވެގެން ކިހިނެތްތޯ ސުވާލުކޮށްފައިވެ އެވެ.
މީގެ އިތުރުން ގަވާއިދާ ހިލާފަށް ބޭރު ފައިސާ ގަނެ ވިއްކާ ފަރާތްތަކާމެދު އަޅާ ފިޔަވަޅީ ކޮބާތޯ ސާފު ކުރުމަށާއި ފާޅުކަން ބޮޑުކޮށް ބޭރުފައިސާގެ ކަޅު ބާޒާރެއް ހިންގަމުން ދިޔުމަށް ފަހިވެފައިވަނީ ކީއްވެތޯވެސް ސުވާލުކޮށްފައިވެ އެވެ.
މި ހާލަތުން އަރައިގަތުމަށް ގަވާއިދާ އެއްގޮތަށް ޑޮލަރު ހަމަ އަގުގައި ލިބޭނެ ގޮތް ހެދުމަށް އޮތް ޕްލޭނާއި އެ ޕްލޭން ތަންފީޒުކުރަން ފެށޭނީ ކޮންއިރަކުންތޯވެސް އެމްޑީޕީން ސުވާލުކޮށްފައިވެ އެވެ.
