އުޝާމް މިހެން ވިދާޅުވީ ބިޑަކާ ނުލައި އިގްތިސާދީ ބޭނުންތަކަށް ފަޅުރަށް ކުއްޔަށް ދޫކުރެވޭނެ އުސޫލެއް ބަޔާންކޮށް ގަވާއިދެއް އެކުލަވާލައި އެއަށް އަމަލު ކުރަން އިކޮނޮމިކް މިނިސްޓްރީ އިން ފަށި މައްސަލަ އަށް އިޝާރާތް ކުރައްވައި ރޭ ކުރެއްވި ޓްވީޓެއްގައެވެ.
އެޓްވީޓުގައި އުޝާމް ވިދާޅުވީ އެމްޑީޕީއިން ވެރިކަމަށް އައީ މިފަދަ ކަންކަން ނުކުރާނެކަމަށް ރައްޔިތުންނަށް ވައުދުވެގެން ކަމަށެވެ. ބިޑަކާ ނުލައި އިގްތިސާދީ ބޭނުންތަކަށް ފަޅުރަށް ކުއްޔަށް ދޫކުރެވޭނެ އުސޫލެއް އެކުލަވާ ލުމަކީ ލާމަރުކަޒީ ގާނޫނުގެ މަގްސަދާވެސް ޚިލާފު ކަމެއް ކަމަށެވެ.
އިކޮނޮމިކް މިނިސްޓްރީން އިއްޔެ ގެޒެޓުކޮށްފައިވާ ”އިގްތިސާދީ ބޭނުންތަކަށް ތަރައްގީކުރުމަށް ފަޅުރަށްރަށް ކުއްޔަށް ދިނުމާބެހޭ ގަވާއިދު“ ގައިވާ ގޮތުން ފަޅު ރަށެއްގައި އިގްތިސާދީ މަސައްކަތެއް ކުރުމަށް އެ ރަށަކީ އިންޑަސްޓްރިއަލް ރަށެއްގެ ގޮތުގައި ކަނޑައަޅާނީ އިކޮނޮމިކް ކައުންސިލުގެ ލަފާގެ މަތިން ރައީސުލްޖުމްހޫރިއްޔާ ކަމަށެވެ.
އެފަދަ މަސައްކަތްތަކަށް ކަނޑައަޅާ ފަޅުރަށަކީ މީހުން ދިރިއުޅޭ ރަށެއްގެ ނުވަތަ ސިޓީއެއްގެ އިހްތިސާސްގައި ހިމެނޭ ރަށެއް ނަމަ އެ ފަޅު ރަށް އިހްތިސާސުން ވަކިކުރަންވާނެ ކަމަށް ގަވާއިދުގައިވާއިރު، އިންޑަސްޓްރިއަލް ބޭނުމަށް ރައީސް ކަނޑައަޅާ ރަށްތައް ކުއްޔަށް ދޫކުރުމަށް ހަމަޖެހިފައި ވަނީ:
- – ބީލަމުގެ އުސޫލުން އާންމުކޮށް އިއުލާނުކުރުމުން އެންމެ ރަނގަޅު ބިޑެއް ހުށަހަޅާ ފަރާތަކަށް ރަށް ދޫކުރުން.
- – ބިޑަކާ ނުލައި ދެވޭ ސަރުކާރުގެ ”އަންސޮލިސިޓަޑް ޕްރޮޕޯސަލް ޕޮލިސީ“ގެ ދަށުން އެ ރަށެއްގައި ކުރަން ބޭނުންވާ ކަމަކާ ބެހޭ ގޮތުން ތަފްސީލީ ޕްރޮޕޯސަލެއް ހުށަހެޅުމުން، އެ ޕޮލިސީގެ ދަށުން ހުއްދަދެވޭ ހުށަހެޅުމެއް ހުށަހަޅާ ފަރާތަކަށް ރަށް ދޫކުރުން.
އެގަވާއިދުގައި ބުނާގޮތުން ބިޑަކާ ނުލައި ދޫކުރާ ރަށްރަށުގައި، ކުރަން އުޅޭ މަސައްކަތާއި ސިނާއަތަށް ބެލުމަށްފަހު އެކަށީގެންވާ އިކިއުޒިޝަން ފީއެއް ސަރުކާރަށް ނެގިދާނެ އެވެ. އަދި ރަށުގެ ކުލި ކަނޑައަޅަން ޖެހޭނީ އަކަފޫޓަކަށް އަހަރަކަށް 10 ލާރިއަށް ވުރެ ދަށް ނުވާނެ ގޮތަކަށެވެ.
މީގެ އިތުރުން އެ ގަވާއިދު ބުނާ ގޮތުން ސަރުކާރުން އެކި މަޝްރޫއު ހިންގާ ރަށްރަށާއި ދައުލަތުގެ ބޭނުންތަކަށް ކަނޑައެޅިފައިވާ ރަށްތަކާއި ސަރުކާރު ކުންފުނިތަކުގެ އެކިއެކި މަސައްކަތް ހިންގާ ރަށްރަށާއި ރާއްޖެއިން ބޭރުގެ ފަރާތްތަކާ ގުޅިގެން ސަރުކާރުން އެކި މަސައްކަތް ހިންގާ ރަށްރަށް އެފަދަ މަސައްކަތްތަކަށް ކުއްޔަށް ދޫކުރުމުން އިސްތިސްނާ ވާނެ އެވެ. އަދި މި ގަވާއިދު، ޓޫރިޒަމްއަށް ދޫކުރާ ރަށްރަށާއި މަސްވެރިކަމާއި ދަނޑުވެރިކަމަށް ދޫކުރާ ރަށްރަށް އަދި ވަރުވާއަށް ލިޔެދޭ ރަށްތަކުގެ މައްޗަށް ނުހިނގާނެ އެވެ.
އިގްތިސާދީ ބޭނުމަށް 21 އަހަރުގެ މުއްދަތަކަށް ރަށެއް ދެވިދާނެ ކަމަށް މިގަވާއިދު ބުނާއިރު، މުއްދަތު ހަމަވާން ކައިރިވުމުން އިތުރު ކުރަން އެދިއްޖެ ނަމަ 50 އަހަރަށް ވުރެ ދިގުނުވާނެ މުއްދަތަކަށް އިތުރު ކުރުމުގެ ބާރު މިނިސްޓްރީއަށް ލިބިގެންވެ އެވެ. އަދި އެގޮތަށް ދޫކުރާ ރަށެއްގައި ކުރާ އިންވެސްޓްމެންޓް ވިއްކާލާ ނަމަ ނުވަތަ ދެވަނަ ފަރާތަަކަށް ކުއްޔަށް ދޭ ނަމަ ފުރިހަމަ ކުރަން ޖެހޭ ކަންތައްތައް ވެސް ގަވާއިދުގައި ވަނީ ބަޔާންކޮށްފަ އެވެ.
