ރައީސް އިބްރާހިމް މިފަދައިން ވިދާޅުވީ އެމަނިކުފާނު މިހާރު އަތޮޅުތަކަށް ކުރައްވާ ކެމްޕެއިން ދަތުރުތަކުގެ ތެރެއިން ނ. ވެލިދޫއަށް ވަޑައިގެން ރޭ ބޭއްވި ކެމްޕޭން ޖަލްސާގައި ވާހަކަ ދައްކަވަމުންނެވެ.
ރައީސް އިބްރާހިމް ވިދާޅުވީ ޒުވާނުން ބަލައިގަންނާނެ ފަދަ ރަނގަޅު މަސައްކަތެއް އެމްޑީޕީގެ ސަރުކާރަށް ކުރެވިފައިވާކަމަށާއި ނަމަވެސް އަދިވެސް ކުރަން ހުރި ބައިވަރު ކަންތައްތައް އެބަ ހުރިކަމަށެވެ.
ޒުޥާނުންނަށް ކަނޑައެޅި 8 ސިޔާސަތު:
- – އެމްޕަވާޑް ޒުވާނުން
- – ޒުވާނުންގެ ބޯހިޔާވަހިކަން
- – ޒުވާނުންނަށް ހެލްތް އެންޑް ވެލް ބީންގ
- – ޒުވާނުންނާއި ޓެކްނޮލިޖީ
- – ސްކިލްޑް ޒުވާނުން
- – ޒުވާން އެންޓަޕްރޮނިއާ
- – ޒުވާނުންގެ ބޭނުންތެރި ހުސް ވަގުތު ހޭދަކުރާނެ ގޮތް
- – އެއްވެސް ޒުވާނަކު ބާކީ ނުކުރުން
ރައީސް އިބްރާހިމް ވިދާޅުވީ ރިޔާސީ އިންތިހާބުގައި ވާދަކުރާ އެއްވެސް ކެންޑިދޭޓަކަށް އެމްޑީޕީގެ ސިޔާސަތުތަކާ ވާދަކޮށްލެވޭވަރުގެ ސިޔާސަތުތަކެއް ހުށަނޭޅުއްވޭނެކަމަށެވެ.
”އަޅުގަނޑު ދެކޭގޮތުގައި އަޅުގަނޑުމެންގެ މި ސިޔާސަތުތަކާއި ހަމަހަމަކުރެވޭ ވަރުގެ ސިޔާސަތެއް އަޅުގަނޑުމެންނާ އެކީގައި މިއަދު ވާދަކުރަން ނިކުމެ ތިއްބެވި އެއްވެސް ބޭފުޅަކަށް ހުށަހެޅިގެން ނުދާނެ، ހުށައެއް ނޭޅުއްވޭނެ“ ރައީސް އިބްރާހިމް ވިދާޅުވިއެވެ.
މިފަދައިން ވިދާޅުވެ ރައީސް އިބްރާހިމް ވަނީ ރިޔާސީ އިންތޮހާބުގައި ވާދަކުރައްވާ ބައެއް ކެންޑިޑޭޓުންނަށް މަލާމާތް ރައްދުކުރައްވާފައެވެ.
”ތިބޭފުޅުންނަށް އެނގިވަޑައިގަންނަވާނެ އޭގެ ތެރެއިން ބައެއް ބޭފުޅުންގެ ވިސްނުން ހުރި ގޮތް، އެއް ބޭފުޅަކު ނިކުމެ ވަޑައިގެން ހުންނެވީ އައްޑަނައާ ހަތިޔާރު ކަނޑި ބަޑި ހިއްޕަވައިގެން، އަނެއް ބޭފުޅަކީ ހެނދުނު ތެދުވާގޮތަށް އެއް ސިޔާސަތެއް ހާމަކުރެއްވުމަށްފަހު މެންދުރު އަނެއް ގޮތަށް ބަދަލުވާނެ ރޭގަނޑު އެހެން ވާހަކައެއް ދައްކަވާނީ، އަނެއް ބޭފުޅަކީ. އަޅުގަނޑު އޭގެ ތަފްސީލަކަށް މިރެއަކު ނުދާނަން“ ރައީސް އިބްރާހިމް ވިދާޅުވިއެވެ.
