ޗައިނާއިން އުޅެނީ ރާއްޖެ ’ދަރަނި ދަންތުރައަކަށް‘ ވައްޓާލަން ނޫން ކަމަށާއި، އެ ގައުމުގެ އެހީގައި ރާއްޖޭގައި ކުރިއަށް ގެންދާ މަޝްރޫއުތަކަކީ ރާއްޖެއިން އެދިގެން ކުރިއަށްގެންދާ މަޝްރޫއުތަކެއް ކަމަށް ޗައިނާ ސަފީރު ވަންގް ލިޒިން މިއަދު ވިދާޅުވެއްޖެއެވެ.
ޗައިނާ ސަފީރު މިފަދައިން ވިދާޅުވީ، ޗައިނާއިން ޖަހަނީ ’ދަރަނި ދަންތުރަތަކެއް‘ ކަމަށާއި އަވައްޓެރި އިންޑިއާއާ އެކު އޮތް ގާތް ގުޅުން ހީނަރުވުމުން، ރާއްޖެ ބަލިކަށިވެއްޖެ ކަމަށް ކުރީގެ ރައީސް މުހައްމަދު ނަޝީދު ސްރީލަންކާގެ ނޫހެއް ކަމަށްވާ ’ދަ މޯނިން’އަށް ދެއްވި އިންޓަވިއުއެއްގައި ވިދާޅުވެފައި ވަނިކޮށެވެ.
ނަޝީދު ވަނީ، ޗައިނާއިން ރާއްޖޭގައި މަޝްރޫއުތައް ކުރިއަށް ގެންދަނީ އެ މީހުންގެ ފައިސާއާއި މުދަލާއި މީހުން ގެނެސްގެން ވިސްނުންތެރިކަމާއެކު ގަސްތުގައި އަގު ބޮޑުކޮށްގެން ކަމަށް ތުހުމަތުކުރައްވައިފައެވެ. ނަޝީދު ގަބޫލުކުރައްވާ ގޮތުގައި އެއީ އަނބުރާ ދެއްކޭނެ ލޯނުތަކެއް ނޫނެވެ.
ޗައިނާ އެމްބަސީން މިއަދު ބޭއްވި ނޫސްވެރިންގެ ބައްދަލުވުމުގައި، ޗައިނާ ސަފީރު ވަނީ އެކަމަށް ވަރުގަދަ ރައްދެއް ދެއްވައިފައެވެ.
އެގޮތުން ސަފީރު ވަނީ، ރާއްޖޭގެ ސަރުކާރަކީ އެފަދަ ދަންތުރައަކަށް ވެއްޓެން ’މޮޔަ‘ ސަރުކާރެއްތޯ ސުވާލު އުފައްދަވާފައެވެ. އަދި އެގޮތަށް އޭނާ ވެސް ގަބޫލުނުކުރައްވާ ކަމަށް ސަފީރު ވިދާޅުވިއެވެ.
ހަމައެއާއެކު ޗައިނާގެ ހިލޭ އެހީގެ ދަށުން ރާއްޖޭގައި ހިންގާ ކޮންމެ މަޝްރޫއަކީ، ނުވަތަ ލޯނެއްގެ ދަށުން ހިންގާ ކޮންމެ މަޝްރޫއަކީ ޗައިނާއިން އަމިއްލައަށް ބޭނުންވެގެން ރާއްޖޭގައި ހިންގާ މަޝްރޫއެއް ނޫން ކަމަށް ސަފީރު ވިދާޅުވިއެވެ.
”އެއިން ކޮންމެ މަޝްރޫއަކީ ރާއްޖޭގެ ސަރުކާރުން އަދި ރާއްޖޭގެ ކުންފުނިތަކުން އެދިގެން ނުވަތަ ބޭނުންވެގެން ޗައިނާގެ އެހީތެރިކަމަށް އެދުމުން ހިންގާ މަޝްރޫއެއް. ޗައިނާގެ އެއްވެސް ބޭނުމެއް ނެތް ރާއްޖެ އެފަދަ ދަންތުރައަކަށް ވައްޓާލުމުގެ،“ ޗައިނާ ސަފީރު ވަންގް ލިޒިން ނޫސްވެރިންނާ ވާހަކަދައްކަވަމުން ވިދާޅުވިއެވެ.
ޗައިނާގެ ރައީސް ޝީ ޖިންޕިންއާ އެކު ރައީސް ޑރ. މުހައްމަދު މުއިއްޒު: ދެ ބޭފުޅުން މިއަދު ވަނީ ބައްދަލުކުރައްވާފައި — ފޮޓޯ/ ރައީސް އޮފީސް
ރައީސް ޑރ. މުޙައްމަދު މުއިއްޒު މިދިޔަ އަހަރު ބޭއްވި ރިޔާސީ އިންތިޚާބު ކާމިޔާބު ކުރެއްވުމާއެކު ބައިނަލްއަގްވާމީ ގިނަ މީޑިއާތަކުން ވަނީ އެއީ ’ޕްރޯ ޗައިނާ‘ ކެންޑިޑޭޓެއްގެ ގޮތުގައި ފާހަގަކުރައްވާފައެވެ.
އެ އަޑުތައް ގަދަވެގެން ދިޔައީ، ވެރިކަމުގެ ހުވާކުރެއްވުމަށް ފަހު، އެހެން ވެރިންނާ ޚިލާފަށް އެމަނިކުފާނު އެންމެ ފުރަތަމަ ވެސް ޗައިނާއަށް ރަސްމީ ދަތުރުފުޅެއްގައި ވަޑައިގެންނެވުމުންނެވެ.
އެ ދަތުރުފުޅުގައި މި ސަރުކާރުން ފަށާފައިވާ ބޯހިޔާވަހިކަމުގެ އެންމެ ބިޔަ މަޝްރޫއު، ފުށިދިއްގަރުފަޅު ތަރައްގީކުރުން ހިމެނޭ ގޮތަށް ޗައިނާއާއެކު 20 އެއްބަސްވުމެއްގައި ސޮއިކޮށްފައިވެއެވެ.
ނަމަވެސް އެކަމަށް އިންކާރު ކުރައްވާ ރައީސް މުއިއްޒު ވިދާޅުވަނީ އެމަނިކުފާނަކީ، ’ޕްރޯ މޯލްޑިވްސް‘ ސިޔާސަތުގެ ބޭފުޅެއް ކަމަށެވެ.
