ބަންގްލަދޭޝްގައި ޔުނިވާސިޓީތަކުގެ ދަރިވަރުންނާއި ބެލެނިވެރިން ކުރަމުންދާ މުޒާހަރާ ހަމައަކަށް އެޅުމުންވެސް ބޮޑު ވަޒީރުގެ އޮފީހާއި މަރުކަޒީ ބޭންކާއި ފުލުހުންގެ ވެބްސައިޓް ހެކްކޮށްފި ކަމަށް ރިޕޯޓްކޮށްފި އެވެ.
ހެކަރުން ވަނީ އެ ވެބްސައިޓްތަކުގެ “ރެޒިސްޓެންސް” މި ލަފްޒު އަރުވާފަ އެވެ. މީގެ އިތުރަށްވެސް ރަތް ކުލައިގެ ފޮންޓެއްގައި “އޮޕަރޭޝަން ހަންޓްޑައުން”، “ސްޓޮޕް ކިލިން ސްޓޫޑެންޓްސް” (ދަރިވަރުން މެރުން ހުއްޓާލާ)، “އިޓްސް ނޮޓް އަ ޕްރޮޓެސްޓް އެނީމޯ، އިޓްސް އަ ވާ ނައު” (މިހިސާބުން މިއީ މުޒާހަރާއެއް ނޫން، މިހާރު މިއީ ހަނގުރާމައެއް)، މި މެސެޖްތައް ލިޔެފައި ވެއެވެ.
ހެކް ކުރި ގްރޫޕުން ރައްދުކުރި މެސެޖްތަކުގައި ވަނީ ސަރުކާރުން ނުބައި ރޭވުމެއްގެ ދަށުން ދަރިވަރުން މެރުމުން ސުލްހަވެރި މުޒާހަރާކުރުމުގެ ބަދަލުގައި އިންސާފާއި މިނިވަންކަމާއި ކުރިމަގަށްޓަަކައި ‘ހަނގުރާމަ’ ކުރާނެ ކަމަށް ވެބްސައިޓްތަކުގައި ބުނެފަ އެވެ.
މީގެ އިތުރަށްވެސް އެ ގްރޫޕުން ވަނީ ކަން ބަލަން ނުހުރެ، ނޫސްވެރިންނާއި އޯއެސްއައިއެންޓީ އިންވެސްޓިގޭޓަރުންނާއި ހެކް ކުރާ މީހުން އެމީހުންގެ ‘ހަނގުރާމަ’ އާއި ގުޅުމަށް ގޮވާލާފަ އެވެ.
ބަންގްލަަދޭޝްގައި މިދިޔަ ހަފްތާއިން ފެށިގެން ކުރަމުންދާ މުޒާހަރާއަކީ އެގައުމުގެ އިދިކޮޅު ޕާޓީން ޒިންމާވާންޖެހޭ މައްސަލައެއް ކަމަށް ބޮޑުވަޒީރު ޝެއިހް ހަސީނާ ވިދާޅުވަމުންދާއިރު އެގައުމުގެ ސިފައިން ހަތިޔާރު ނެތް ދަރިވަރުންގެ ގަޔަށް ބަޑިޖަހާފައިވާ ކަމަށް ހިއުމަން ރައިޓްސް ވޮޗްއިން ބުނެފައި ވެއެވެ. ހަސީނާގެ ވެރިކަމުގައި ހިޔާލުފާޅުކުރުމުގެ މިނިވަންކަން ނެތް ކަމަށް އެމްނެސްޓީފަދަ ބައިނަލްއަގްވާމީ ޖަމިއްޔާތަކުން ދަނީ ފާހަގަކުރަމުން ނެވެ.
މުޒާހަރާ ކުރުން ހުއްޓުނު ނަމަވެސް އަދިވެސް ބަންގްލަދޭޝްގެ މެދުކަނޑާލާފައިވާ އިންޓަނެޓްގެ ހިދުމަތް އަލުން ފޯރުކޮށްދޭނެ އިރެއް ސަރުކާރުން ހާމަކޮށްފައި ނުވެ އެވެ.
ދަރިވަރުން ކުރަމުންދިޔަ މުޒާހަރާގައި 100 އަށްވުރެ ގިނަ މީހުން މަރުވެފައި ވެއެވެ. އިންޓަނެޓްގެ ހިދުމަތް މެދުކެނޑުމުގެ އިތުރުން ބަންގްލަދޭޝް ސަރުކާރުން ވަނީ ސްކޫލުތަކާއި ޔުނިވާސިޓީތައް ބަންދުކޮޮށްފަ އެވެ. މިހާރު އެގައުމުގެ ޕަބްލިކް ޓްރާންސްޕޯޓްގެ ހިދުމަތްވެސް ވަނީ ހުއްޓާލާފަ އެވެ.
ބަންގްލަދޭޝްގައިި އޮންނަ ގާނޫނެއްގެ ދަށުން 1971 ވަނަ އަހަރު ބަންގްލަދޭޝްއާއި ޕާކިސްތާނާއި ދެމެދު ކުރި ހަނގުރާމައިގައި ބަންގްލަދޭޝްގެ ދިފާއުގައި ހަނގުރާމަކުރި މީހުންގެ އާއިލާތަކަށް ސަރުކާރު ވަޒީފާތަކުގެ 30 އިންސައްތަ ރިޒާވް ކުރެވިފައިވެ އެވެ. މި ގާނޫނު ތަންކޮޅެއް ކުރިން އުވާލާފައިވީ ނަމަވެސް ސުޕްރީމް ކޯޓުން ވަނީ އެގާނޫނަށް އަލުން އަމަލުކުރުމަށް ނިންމާފަ އެވެ. އެކަމާއި ގުޅިގެން ޔުނިވާސިޓީތަކުގެ ދަރިވަރުން ވަނީ 27 ސަރަހައްދެއްގައި މުޒާހަރާތައް ކޮށްފަ އެވެ.
ރިޕޯޓްތައް ބުނާގޮތުގައި ޕާކިސްތާނާއި ދެކޮޅަށް ބަންގްލަދޭޝްގައި ހަނގުރާމަ ކުރި ފަރާތްތަކަކީ މިހާރުގެ ސަރުކާރު ހިންގާ ޕާޓީގެ އާއިލީ ބޭފުޅުން ނެވެ. އެހެން ކަމުން މި ގާނޫނަށް އަމަލު ކުރަން ފަށައިފިނަމަ ސިވިލް ސާވިސްގެ ވަޒީފާތައް ނަހަމަ ގޮތެއްގައި ސަރުކާރުގެ އިސް މީހުންގެ އާއިލާ ބޭފުޅުންނަށް ލިބޭނެ ކަމަށް ބުނެ މަސްރަހު ދިރާސާކުރާ ފަރާތްތަކާއި ބަންގްލަދޭޝްގެ އާންމުން ދަނީ ސަރުކާރަށް ފާޑުކިޔަމުން ނެވެ.
ޖަވާބުގައި ހަސީނާ ވަނީ މި ގާނޫނަކީ ގައުމުގެ ދިފާއުގައި މަސައްކަތްކުރެއްވި ފަރާތްތަކުގެ ހައްގުގައި މުހިންމު ގާނޫނެއް ކަމަށް ވިދާޅުވެ، ސަރުކާރުގެ ނިންމުން ދިފާއު ކުރައްވާފަ އެވެ.
މި މައްސަލައާއި ގުޅިގެން ބަންގަލްދޭޝްގައި ހަމަނުޖުހުން ބޮޑުވުމާއި ގުޅިގެން ބަންގްލަދޭޝްގެ ސުޕްރީމް ކޯޓުން ވަނީ ހަނގުރާމަކުރި މީހުންގެ އާއިލާތަކަށް ދައުލަތުގެ ވަޒީފާއިން 30 އިންސައްތަ ކޯޓާ ދިނުން އުވާލަން ނިންމާފަ އެވެ. ބަދަލުގައި އެ އާއިލާތަކަށް ސަރުކާރު ވަޒީފާތަކުގެ 5 އިންސައްތަ ކޯޓާއެއް ހާއްސަ ކުރުމަށް ސުޕްރީމް ކޯޓުން ނިންމި އެވެ.
