ޕްރޮސެކިއުޓާ ޖެނެރަލް (ޕީޖީ) ހުސެއިން ޝަމީމް ވަކިކުރުމުގެ މައްސަލައިގައި ރައްޔިތުންގެ މަޖިލީހުން ކަންކުރި ގޮތުން އިދިކޮޅު މައި ޕާޓީ، އެމްޑީޕީން ނުރުހުން ފާޅުކޮށްފި އެވެ.
ޝަމީމް އިސްތިއުފާ ދެއްވީ، ރައްޔިތުންގެ މަޖިލީހުގެ ޖުޑިޝަރީ ކޮމިޓީން އޭނާ ވަކިކުރުމަށް ނިންމުމާ ގުޅިގެން، އެ ކަން ތަޅުމުން ފާސްކުރަން މިރޭ ޖަލްސާ ފެށުމާއެކުގައެވެ. ނަމަވެސް އިސްތިއުފާ ސިޓީ ރައީސް އޮފީހަށް ނުލިބޭކަން މަޖިލީހަށް ކަށަވަރުވުމުން ވޯޓަށް އަހައި ޝަމީމް ވަކިކުރީ އެވެ.
ޕީޖީ ޝަމީމް ވަކިކުރަން އުޅޭ މައްސަލައިގައި އެމްޑީޕީން ނެރުނު ބަޔާނެއްގައި، ޕީޕީއެމް/ޕީއެންސީ ސަރުކާރުން އޭނާ ވަކިކުރަން އުޅުން ކުށްވެރިކުރަމުން ވަނީ އެ ނިންމުން ބަދަލުކުރަން ގޮވާލާފަ އެވެ.
އެމްޑީޕީން ބުނި ގޮތުގައި މަޖިލިސް ގަވާއިދުގައި އޮންނަ ގޮތުން މަޖިލީހުގެ ކޮމިޓީއަކުން އެ ކޮމިޓީއެއްގެ ބައްދަލުވުމެއް ސިއްރު ބައްދަލުވުމެއްގެ ގޮތުގައި ނިންމޭނީ އެ ގަވާއިދުގައި ބަޔާންކުރާ ސަބަބުތަކުންކުރެ ސަބަބަކަށް އެ ބައްދުލުވުމެއް ފެތޭ ނަމަ އެވެ.
ރައްޔިތުންގެ މަޖިލީހުގެ ކޮމިޓީތަކުން، މިފަދައިން، އިޖުރާއީ އަދުލުވެރިކަމަށް ޖާގަނުދީ، މިނިވަން މުއައްސާތަކުގައި ތިއްބެވި ބޭފުޅުން ވަކިކުރަމުން ގެންދާ ކަމަށްބުނެ، އެމްޑީޕީން ވަނީ ކަންބޮޑުވުން ފާޅުކޮށްފަ އެވެ.
އެމްޑީޕީގެ ބަޔާނުގައިވަނީ ޕީޕީއެމް ޕީއެންސީގެ ސުޕަ މެޖޯރިޓީ އޮންނަ މަޖިލީހުން ޕްރޮސެކިއުޓާ ޖެނަރަލްގެ ޝަމީމު ކުއްލިގޮތަކަށް ވަކިކުރުމަކީ ގާނޫނު އަސާސީއާއި ދިމާ އިދިކޮޅަށް ކޮށްފައިވާ ކަމެއް ކަމަށެވެ. އަދި މަޖިލީހުގެ ގަވާއިދާ ވެސް ހިލާފަށް ކޮށްފައިވާ މަސައްކަތެއް ކަމަށެވެ.
”ޕްރޮސެކިއުޓާ ޖެނަރަލްގެ މައްޗަށް ޕީޕީއެމް/ޕީއެންސީގެ މަޖިލިސް މެމްބަރުން އާއްމުކޮށް ކުރައްވަމުން ގެންދެވި ތުހުމަތުތަކަށް ޖަވާބުދާރީވުމަށް އާއްމުންނަށް ހުޅުވާލައިގެން ކޮމިޓީ ބާއްވައިދިނުމަށް ޕްރޮސެކިއުޓާ ޖެނަރަލް ތަކުރާރުކޮށް އެދިވަޑައިގަތުމުން ވެސް ކުއްލި ގޮތަކަށް ޖުޑިޝަރީ ކޮމިޓީގެ އެ ބައްދަލުވުން ސިއްރުކުރުމަށް މަޖިލީހުގެ ގަވާއިދާ ހިލާފަށް އެ ކޮމިޓީން ނިންމި ނިންމުމަކީ ޑިމޮކްރެޓިކް ހަމަތަކާ ހިލާފަށް، އަދި ޑިއު ޕްރޮސަސްއަށް ޖާގަނުދީ، ބަންދު ކޮޓަރިއެއްގައި އަވަސް އަރުވާލައިގެން ނިންމާފާއިވާ ނިންމުމެއް،“ އެމްޑީޕީން ބުންޏެވެ.
ޖުޑިޝަރީ ކޮމިޓީގެ ނިންމުމާ މެދު ގޮތެއް ނިންމަން މިރޭ ބޭއްވި މަޖިލީހުގެ ޖަލްސާގައި އެމްޑީޕީގެ ޕާލަމެންޓްރީ ގުރޫޕުގެ ލީޑަރު ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ، ޝަމީމް މަގާމުން ވަކިކުރުމުގެ ކަންކަން ހިނގައި ދިޔައީ މަޖިލީހުގެ ގަވާއިދާއި އުސޫލުތަކާ ހިލާފަށް ކަމަށެވެ. ކޮމިޓީގެ މިއަދުގެ ބައްދަލުވުން ސިއްރު ކުރަން ނިންމީ އުސޫލާ ހިލާފަށް ކަމަށް އޭނާ ވިދާޅުވި އެވެ.
ކޮމިޓީގެ ބައްދަލުވުން ސިއްރު ކޮށްގެން ޝަމީމަށް ޖަވާބުދާރީވާން ފުރުސަތު ދިނީ، އެ ބައްދަލުވުން ހުޅުވާލައިގެން ކުރިއަށް ގެންދަން އޭނާ އެދިވަޑައިގެންފައިވަނިކޮށެވެ. ނާޒިލް ވިދާޅުވީ ބައްދަލުވުން ސިއްރު ކުރަން ނިންމީ އެ ކަން ކުރެވޭނެ ކަމަށް ގަވާއިދުގައި ކަމަށް ބަޔާންކުރާ އެއްވެސް ކަމަކަށް ރިއާޔަތް ނުކޮށް ކަމަށެވެ. އެހެންކަމުން ކޮމިޓީގެ ރިޕޯޓްގެ ސައްހަކަމާ މެދު ސުވާލު އުފެދޭ ކަމަށެވެ.
ނާޒިލްގެ އެ ވާހަކަތަކަށް ޖުޑިޝަރީ ކޮމިޓީގެ މުގައްރިރު މަނަދޫ ދާއިރާގެ ޕީއެންސީގެ މެންބަރު ހުސްނީމުބާރަކު ރައްދު ދެއްވި އެވެ. އޭނާ ވިދާޅުވީ ޝަމީމް މަގާމުން ވަކިކުރަން ނިންމި ކޮމިޓީގެ ބައްދަލުވުން ކުރިއަށް ގެންދިޔައީ ގަވައިދާ އެއްގޮތަށް ކަމަށެވެ. ކޮމިޓީ ސިއްރު ކުރީ އެކަމަށް ހުށަހެޅި، އެކަން އަޣުލަބިއްޔަތު ލިބިގެން ކަމަށް ވިދާޅުވި އެވެ.
ހުސްނީ ވިދާޅުވި ގޮތުގައި ކޮމިޓީ ސިއްރު ކުރަން ނިންމީ ޝަމީމް ފަލީހަތް ވެދާނެތީ އެވެ. މީހަކު ފަލީހަތް ވެދާނެ ހާލަތެއްގައި ބައްދަލުވުން ސިއްރު ކުރެވިދާނެ ކަމަށް ގަވައިދުގައި ބަޔާންކުރާ ކަމަށް އޭނާ ވިދާޅުވި އެވެ. ޝަމީމަށް ތުހުމަތު ކުރެވޭ މައްސަލާގައި ވަރަށް ގިނަ ބައެއްގެ ޒާތީ މައުލޫމާތު ވެސް ހިމެނޭ ކަން ހުސްނީ ފާހަގަކުރެއްވި އެވެ.
ފަހުން ވެސް އެމްޑީޕީގެ މެންބަރުން ވަނީ ޝަމީމް އިސްތިއުފާ ދެއްވިކަން ކަށަވަރު ކުރެއްވުމަށް ފަހު ޖަލްސާ ކުރިއަށް ގެންދިއުމަށް އެދިވަޑައިގެންފަ އެވެ.
އެމްޑީޕީ މެންބަރުން ނެންގެވި ނިޒާމީ ނުގުތާ ބަލައިނުގަނެ، ނާޒިމް ވިދާޅުވީ ޖަލްސާ ފެށުމުގެ ކުރިން ޝަމީމުގެ އިސްތިއުފާ ސިޓީ ރައީސް އޮފީހަށް ލިބިފައިވޭތޯ ކަށަވަރު ކުރެއްވި ކަމަށެވެ. އަދި ރައީސް އޮފީހުން އެ ސިޓީ ލިބުނުކަން މަޖިލީހަށް އަންގާފައި ނުވާ ކަމަށް އޭނާ ވިދާޅުވި އެވެ.
އޭގެ ފަހުން ބަހުސް ކުރިއަށް ގެންގޮސް ނިންމާލީ އެވެ. ބަހުސްގައި ސަރުކާރުގެ ޕީއެންސީގެ މެންބަރުން ވަނީ ޝަމީމަށް ވަރަށް ބޮޑަށް ފާޑު ވިދާޅުވެފަ އެވެ. އަދި މާބޮޑު އަސާސެއް ނެތް ގިނަ ތުހުމަތުތައް ވެސް ކުރެއްވި އެވެ. އެ މެންބަރުން ފުރުސަަތުގެ ބޭނުން ހިއްޕެވީ ޝަމީމަށް ފާޑުކިޔުން އަމާޒު ކުރައްވާ އެ މެންބަރުންގެ ހިތްޕުޅުގައި ޝަމީމާމެދު ދެކޭ ގޮތް ހާމަކުރުމަށެވެ.
”ސެކެރެޓަރީ ޖެނެރަލް ލަފާ ދެއްވައިފައި އޮތީ ވޯޓުގެ ރަނގަބީލުގެ ގަޑި ޖެހުނީމަ ވެސް ރައީސް އޮފީހަށް ގުޅައިފައި ސާފުކުރަން ސިޓީ ލިބުނުތޯ ނުވަތަ ނޫންތޯ. އެ ކަން ސާފުކުރައްވައިފި. ސިޓީ ލިބިފަކާއެއް ނެތް،“ މިރޭ ރިޔާސަތުގައި އިންނެވި މަޖިލީހުގެ ނައިބު ރައީސް ނާޒިމް ވިދާޅުވި އެވެ.
އެއާއެކު ޝަމީމް ވަކިކުރަން އެހި ވޯޓުގައި 65 މެމްބަރުން ވޯޓު ދެއްވިއިރު ނުވަ މެމްބަރަކުވަނީ ވަކިކުރުމާ ދެކޮޅަށް ވޯޓު ދެއްވައިފަ އެވެ.
އެމްޑީޕީގެ ސުޕަ މެޖޯރިޓީ އޮތް 19 ވަނަ މަޖިލީހުން ޑިސެމްބަރު 2019ގައި ޝަމީމް އެ މަގާމަށް އައްޔަންކުރަން ފާސްކޮށްފައި ވަނީ 74 މެންބަރުންގެ ވޯޓާ އެކު އެވެ. ފަސް އަހަރު ދުވަހަށް އައްޔަން ކުރާ އެ މަގާމުގައި ޝަމީމުގެ ދައުރު ހަމަވާން ދެން ބާކީ އޮތީ ތިން މަހެއްހާ ދުވަހެވެ.
ޝަމީމް ވަކިކުރުމާއެކު 30 ދުވަސް ތެރޭ އާ ޕީޖީއަކު އައްޔަންކުރަން ޖެހޭނެއެވެ. ނަމަވެސް މަޖިލިސް މިރެއިން ފެށިގެން ޗުއްޓީއަށް ދާތީ އާ ޕީޖީއަކު އައްޔަންކުރަން ޖަލްސާ ބާއްވާނީ ދައުރުން ބޭރުންކަމަށް ނާޒިމް މިރޭ ވިދާޅުވި އެވެ.
