މިނިސްޓްރީ އޮފް އިސްލާމިކް އެފެއާޒުން ހިންގަމުންދާ އިމާމުން ތާޒާކުރުމުގެ ޤައުމީ މަޝްރޫޢުގެ ދަށުން އިތުރު 157 އިމާމުންނަށް ސެޓްފިކެޓު ދީފިއެވެ.
މި ސެޓްފިކެޓު ދިނުމުގެ ރަސްމިއްޔާތު ބޭއްވުނީ އޮންލައިންކޮށް މިނިސްޓްރީ އޮފް އިސްލާމިކް އެފެއާޒުގައެވެ.
މި ފަހަރު ސެޓްފިކެޓު ދެވުނީ މި ޕްރޮގްރާމުގެ ތިންވަނަ ބުރުގައި ބައިވެރިވި ވ. އަދި މ. އަތޮޅުގެ އިމާމުންނަށެވެ. މިހާތަނަށް މި ޕްރޮގްރާމުގައި ބައިވެރިވެ ސެޓްފިކެޓު ޙާޞިލްކޮށްފައިވަނީ ޖުމްލަ 157 އިމާމުންނެވެ.
އިމާމުން ތަމްރީނުކުރުން ނުވަތަ ތާޒާކުރުމުގެ ޤައުމީ މަޝްރޫޢަކީ ރާއްޖޭގެ 11 ސަރަޙައްދަކަށް ބަހާލައިގެން ދާއިމީ އިމާމުންނަށް އަމާޒުކޮށްގެން ހިންގާ 3 ދުވަހުގެ ޕްރޮގްރާމެކެވެ. މި ޕްރޮގްރާމުގައި ޖުމްލަ 9 މާއްދާއެއް ކިޔަވައިދެއެވެ. އޭގެ ތެރޭގައި ޤުރްއާނާއި، ތަޖުވީދު، ތަފްސީރު، ފިޤުހު، ޙަދީޘް އަދި އަޤީދާގެ ޢިލްމު ހިމެނެއެވެ.
މި ޕްރޮގްރާމުގެ މަޤްޞަދަކީ އިމާމުންނަށް ބޭނުންވާ މުހިންމު ޢިލްމީ ކަންކަން އުނގަންނައިދީ، މިސްކިތްތައް ބެލެހެއްޓުމުގެ މަސްއޫލިއްޔަތު އަދާކުރެވޭނެ ފެންވަރަށް އިމާމުންގެ ޝަޚްޞިއްޔަތު ބިނާކުރުމެވެ.
މިނިސްޓްރީގެ އަމާޒަކީ 2024 ވަނަ އަހަރު ނިމުމުގެ ކުރިން މި ޕްރޮގްރާމުގެ ދަށުން 700 އިމާމުން ތަމްރީނުކޮށް ނިންމުމެވެ. މިހާތަނަށް ގއ. އަދި ގދ. އަތޮޅުން 77 އިމާމުން، ޏ. އަތޮޅުން 40 އިމާމުން، އަދި މ. އަދި ވ. އަތޮޅުން 40 އިމާމުން ވަނީ މި ޕްރޮގްރާމު ފުރިހަމަކޮށްފައެވެ.
