ރޭ ފަތިހު ސިޙްޔޫނީން އީރާނަށް ދިން ޖަމަލު ފޮޑި ޙަމަލާގެ ގެއްލުންތައް ވަޒަންކުރުމުގެ މަރުޙަލާ ކުރިއަށްދާތީ، އީރާނާއި އިރާޤުގެ ވައިގެ ސަރަޙައްދު އަދިވެސް ވަނީ މަދަނީ އުދުހުންތަކަށް ބަންދު ކުރެވިފައެވެ. މި ޙަމަލާތައް ދިފާޢުކުރުމުގައި އީރާނުގެ ވައިގެ ދިފާޢީ ނިޒާމުތަކުން ހޯދި ބޮޑު ކާމިޔާބީގެ ސަބަބުން ވަށައިގެން ތިބި ޢަރަބިންނާއި، ހުޅަނގުގެ ޤައުމުތައް ވަނީ ސިހިފަ އެވެ. މި ޙަމަލާގައި ގިނަ ޢަދަދެއްގެ މިސައިލާއި ޑްރޯން ބޭނުންކޮށްފައިވެ އެވެ.
އެމެރިކާއާއި ހުޅަނގުގެ ދިގުލީ ދަތިކުރުމުގެ ފިޔަވަޅުތަކާއެކު، އަމިއްލަ ޓެކްނޮލޮޖީ ފައްކާކޮށް، ޙަމަލާދިނުމާއި، ދިފާޢުވުމަށް ބޭނުންވާ އެންމެ ޒަމާނީ ހަތިޔާރު އީރާނުން ވަނީ އުފައްދާފައި ވެއެވެ. މީގެ ތެރޭގައި އަޑަށްވުރެ 9 ގުނަ ބާރަށް ދަތުރުކުރާ ހައިޕަރސޮނިކް ބަލިސްޓިކް މިސައިލް ހިމެނެ އެވެ. ހައިޕަރސޮނިކް ހަތިޔާރު މުޅި ދުނިޔޭގައިވެސް އަދި ހުރީ ހަތަރު ފަސް ޤައުމެއްގައެވެ. ސިޙްޔޫނީންގެ އަތުގައި އަދި ނެތެވެ.
ލުބުނާނަށް އެއްގަމު މަގުން އަރައިގަންނަން މަސައްކަތް ފެށިތާ ފަންސަވީހަކަށް ދުވަސް ވެފައިވާއިރު، ބޯޑަރު ސަރަޙައްދުގެ ކުދި އަވަށްތަކަށްވުރެ ކުރިއަށް ޖެހުމަށް ސިޙްޔޫނީ ލަޝްކަރުތައް ވަނީ ނުކުޅެދިފައެވެ. މިހާތަނަށް ސިޙްޔޫނީ މެރްކަވާ ޓޭންކުގެ 37 ޓޭންކު ވަނީ ބޭނުން ނުކުރެވޭވަރަށް ގޮއްވާލާފައެވެ. މި ޙަމަލާތަކަށް ލުބުނާނުގެ ހަނގުރާމަވެރިން އެންމެ ގިނައިން ބޭނުންކޮށްފައިވަނީ ކޮނޑުމަތީގައި ބަހައްޓައިގެން ޙަމަލާދެވޭ އަލްމާސް 1 އަދި 2، އަދި ކުދި ޓްރަކުގައި ބަހައްޓައިގެން ހަމަލާދޭ ޒާތުގެ އަލްމާސް 3 ގެ ޒަމާނީ ނިޒާމުތައް. މިއީ މުޅިންވެސް އީރާނުގެ އަމިއްލަ އުފެއްދުންތަކެވެ.
