ކައިވެނީގެ ގުޅުމަށް ދުވަސްވެ، ދިރިއުޅުމުގެ އެކި ކަންކަމުގައި ބިޒީވުމުގެ ސަބަބުން އެކަކު އަނެކަކަށް ވަގުތު ދެވޭ ވަރު މަދުވެ، އޭގެ ސަބަބުން ކަންކަމާމެދު އަރައިރުންވެ ދެބަސްވާން ޖެހޭލެއް ގިނަވުމަކީ ވަރަށް ގިނަ މީހުންނަށް ދިމާވާ ކަމެކެވެ. ކައިވެނި ބާއްޖަވެރިކުރަން ބޭނުންވާނަމަ އެކަކު އަނެކަކަށް އަބަދުވެސް ވަގުތުދީ، އަޅާލައި އޯގާތެރި ވުމަކީ ވަަރަށް މުހިންމު ކަމެކެވެ. މިފަހަރު މި ހިމަނާލަނީ ކައިވެނީގެ ގުޅުމުގައި މައްސަލަތައް މަދުކޮށް ބާއްޖަވެރި އުފާވެރި ދިރިއުޅުމެއް ހޯދުމަށްޓަކައި ކުރަންވީ ބައެއް ކަންކަމެވެ.
ކޮންމެ ދުވަހަކު އެކުގައި ހިނގާލަން ދިއުން
ދިރިއުޅުމުގެ ކަންކަމުގައި ކިތައްމެ އަވަދިނެތި އުޅުނު ކަމުގައިވީނަމަވެސް، ދުވަހުގެ ކޮންމެވެސް ވަގުތެއް ހަޔާތުގެ ބައިވެރިޔާއަށްޓަކައި ހުސްކޮށް އެކުގައި ހިނގާލަން ދިއުމަކީ ކައިވެނި ބާއްޖަވެރި ކުރުމަށްޓަކައި ކުރެވިދާނެ ކަމެކެވެ. މިހެން ކަންތައް ކުރުމުން ދެމީހުން އެކަކު އަނެކަކަށްޓަކައި އެ ހުސްކޮށްލެވޭ ވަގުތުގައި ހިތުގެ ޝުއޫރުތައް ފާޅުކޮށް ވާހަކަތައް ހިއްސާކުރެވޭނެއެވެ. އަދި އޭގެ ސަބަބުން ދެމީހުންގެ ދެމެދުގައިވާ ގުޅުން އިތުރަށް ވަރުގަދަވެއެވެ.
ޑޭޓް ތަކަށް ދިޔުން
ކައިވެންޏަށް ކިތައްމެ ގިނަ ދުވަހެއްވީނަމަވެސް، އެކަކު އަނެކަކަށްޓަކައި ވަގުތު ހުސްކޮށް، ޑޭޓްތަކަށް ދިއުމަކީވެސް ކައިވެނި ބާއްޖަވެރި ކުރުމަށް އެހީވެދޭ ކަމެކެވެ. މިހެން ކަންތައް ކުރުމުން ދިރިއުޅުމުގެ އެހެން ހުރިހާ ވިސްނުންތަކާ ދުރަށްގޮސް އެކަކު އަނެކަކަށްޓަކައި ވަގުތު ހުސް ކުރެވި، އެކުގައި ކޮލިޓީ ވަގުތު ހޭދަކުރެވި، ހަނދާންތައް އުފެއްދޭނެއެވެ. އަދި އޭގެ ސަބަބުން ދެމީހުންގެ ދެމެދުގައި އަރައިރުންތައް މަދުވެ، ދެމީހުންގެ ގުޅުން އިތުރަށް ވަރުގަދަ ވެއެވެ.
ސްކްރީންތަކާއި ދުރުވެ އެކަކު އަނެކަކަށް ވަގުތު ދިނުން
ކޮންމެ ދުވަހަކުވެސް ވަކި ގަޑިއެއް ކަނޑައަޅައި އެ ވަގުތެއްގައި ސްކްރީންތަކާ ދުރުވެ އެކަކު އަނެކަކަށް ވަގުތު ދިނުމަކީވެސް ކައިވެނި ބާއްޖަވެރި ކޮށްދޭ ކަމެކެވެ. މިހެން ކަންތައްކުރުމުން އެއްވެސް އުނދަގުލެއް ނެތި ދެމީހުންނަށް ވެސް އެކަކު އަނެކަކާ ހިއްސާކުރަން ބޭނުންވާ ވާހަކަތައް ހިއްސާކޮށް ވާހަކަ ދެކެވޭނެއެވެ. އަދި އެކަކު އަނެކެއްގެ ޖަޒުބާތުވެސް ރަނގަޅަށް އެނގި ދެމީހުންގެ ދެމެދުގައި އޮންނަ ގުޅުންވެސް އިތުރަށް ވަރުގަދަވާނެއެވެ.
