މި ސަރުކާރަކީ ރައްޔިތުންގެ ސަރުކާރެއް ކަމަށާއި، ރައްޔިތުންގެ ފަޅީގައި ތިބެގެން މަސައްކަތް ކުރާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ހުޅުމާލޭ ފޭސް 2 ގައި އައު ޕެޓް ކެއަރ ފެސިލިޓީއެއް ހުޅުވުމުގެ ރަސްމިއްޔާތުގައި، ރައީސް މުއިއްޒު އިތުރަށް ވިދާޅުވީ ސަރުކާރުން ރައްޔިތުންގެ ކަންބޮޑުވުންތައް ހައްލުކޮށްދޭން މަސައްކަތް ކުރާނެ ކަމަށެވެ.
މިހާރުވެސް ސަރުކާރުގެ މަސައްކަތްތައް ބައްޓަންކޮށްފައިވަނީ އެ މަގުން ކަމަށް އެމަނިކުފާނު ވިދާޅުވިއެވެ. ”ރައްޔިތުންގެ އިހުސާސްތަކަކީ ކޮބައިތޯ ބަލާ ރައްޔިތުންނަށްޓަކައި ކަންތައްތައް ނިންމަމުން މިދަނީ“ ރައީސް ވިދާޅުވިއެވެ.
ލާމަރުކަޒީ ނިޒާމު ހަރުދަނާކުރުމަށް ސަރުކާރުން ކުރަމުންދާ މަސައްކަތްތަކުގެ ވާހަކަވެސް ރައީސް ދެއްކެވިއެވެ. އެގޮތުން 160 ކައުންސިލާ ބައްދަލުކޮށް، އެ ކައުންސިލްތަކުން ފާހަގަކުރި ގިނަ ކަންތައްތައް ތަންފީޒުކުރަމުންދާ ކަމަށް ރައީސް ވިދާޅުވިއެވެ. މީގެ އިތުރުން ބްލޮކް ގްރާންޓްގެ 5 ޕަސަންޓު ކައުންސިލްތަކަށް ލިބޭނެ ކަމަށާއި، ޓޫރިޒަމްގެ ތެރެއިން ލިބޭ ޓެކްސްގެ ވަކި ޕަސަންޓެއް ކައުންސިލްތަކަށް ޖަމާކޮށްދޭން ނިންމާފައިވާ ކަމަށްވެސް ރައީސް ވިދާޅުވިއެވެ.
ރައީސް މުއިއްޒު ވިދާޅުވީ މި ސަރުކާރަކީ ވާ ވައުދުތައް ފުއްދާ، ލާމަރުކަޒީ ނިޒާމުގެ ތެރެއިން ކަންތައްތައް ކުރުމަށް އިސްކަންދޭ ސަރުކާރެއް ކަމަށެވެ. އަދި ކައުންސިލްތަކުގެ އިމާރާތްތައް މަރާމާތު ކުރުމުގެ މަސައްކަތަކީވެސް މި އަހަރު ފެށޭނެ މަޝްރޫއެއް ކަމަށް ރައީސް ފާހަގަކުރެއްވިއެވެ. ރައީސް ވިދާޅުވީ ކައުންސިލްތައް ބާރުވެރިކުރުވައިގެން ކަންތައްތައް ކުރުމުގައި އަމަލާއި ބަހާ ދިމާވާ ކަމަށެވެ.
