ޒުވާނުންގެ ތެރޭގައި ގިނައީ ގާނޫނުތަކަށް ތަބާވާ މީހުން ކަމަށް ފުލުހުންގެ ތަރުޖަމާނު އަހްމަދު ޝިފާން ވިދާޅުވެއްޖެ އެވެ.
ޝިފާން ”އެކްސް“ގައި ކުރެއްވި ޕޯސްޓެއްގައި ވިދާޅުވީ ޒުވާނުންގެ ތެރޭގައި ގިނައީ ގާނޫނުތަކަށް ތަބާވާ އުފެއްދުންތެރި މީހުން ކަމަށާއި އެގޮތުން އުމުރުން 15 އަހަރާއި 35 އަހަރާ ދެމެދު މީހުންގެ ތެރެއިން ކުށުގެ ވެށީގައި އުޅެނީ ޒުވާނުންގެ އެންމެ ދެ ޕަސެންޓް ކަމަށެވެ.
ޒުވާނުން ކަންކަމުގައި ބައިވެރިކުރުން އިތުރުކޮށްފިނަމަ ކުށުގެ ވެށީގައި އުޅޭ ޒުވާނުންގެ ޕަސެންޓް މިއަށް ވުރެ ވެސް ދަށް ކުރެވޭނެ ކަމަށް ޝިފާން ވިދާޅުވި އެވެ.
ޝިފާން މިހެން ވިދާޅުވި އިރު، ޒުވާނުން ސިފައިންގެ އާއި ފުލުހަށް ވެއްދުމަށް ރާއްޖޭގެ ގައުމީ ހިދުމަތުގެ ޕްރޮގްރާމްގެ ނަމުގައި އަންނަ އަހަރުން ފެށިގެން ގައުމީ ޕްރޮގްރާމެއް ފެށުމަށް ނިންމާފައިވާކަން ރައީސް ޑރ. މުހައްމަދު މުއިއްޒު ދާދިފަހުން ވަނީ އިއުލާން ކުރައްވާފަ އެވެ. މި ޕްރޮގްރާމްގައި އުމުރުން 16 އަހަރުވުމަށް ފަހު ތައުލީމު ހާސިލުކުރަން މައްޗަށް ދިޔުމަށް ފުރުސަތު ނުލިބޭ ކުދިންނާއި އަދި ވަޒީފާއެއް ވެސް ނުލިބޭ ކުދިން ބައިވެރިވާންޖެހޭނެ ކަމަށް ރައީސް ވިދާޅުވި އެވެ.
މި ޕްރޮގްރާމްގެ ނަތީޖާއެއްގެ ގޮތުން ސިފައިންގެއަށް 4،000 އޮފިސަރުން އަދި ފުލުހުންގެ ހިދުމަތަށް 1،000 އޮފިސަރުން އިތުރުވެގެންދާނެ ކަމަށް ރައީސް ވިދާޅުވި އެވެ.
