ރައްޔިތުންގެ މަޖިލީހުގެ މެންބަރުން އިންތިޚާބުވި ޕާޓީ ބަދަލުކޮށްފި ނަމަ، ގޮނޑި ގެއްލޭ ގޮތަށް ގާނޫނު އަސާސީ އަށް ހުށަހެޅި އިސްލާހު ރައީސުލްޖުމްހޫރިއްޔާ ތަސްދީގު ކުރައްވައިފި އެވެ.
މި އިސްލާހުތައް މަޖިލިހުން ފާސްކޮސްފައިވަނީ 78 މެމްބަރުންގެ ވޯޓާއެކުގައެވެ. މި އިސްލާހުތައް ބަލައިނުގަންނަން 13 މެމްބަރަކު ވޯޓު ދެއްވިއެވެ. ވޯޓުގައި 91 މެމްބަރުން ބައިވެފައިވެއެވެ.
ބިލު ހުށަހެޅުއްވީ މުޅި މަޖިލީހުގެ ކޮމިޓީން ފާސްކުރިގޮތަށް އެއްވެސް ބަދަލެއް ގެނައުމަކާ ނުލައެވެ. މި ބިލަކީ ހުޅުދޫ ދާއިރާގެ މެމްބަރު މުހައްމަދު ޝާހިދު ހުށަހަޅުއްވާފައިވާ ބިލެކެވެ.
ގާނޫނު އަސާސީއަށް އިސްލާހު ގެނައުމަށް ހަތަރު އިސްލާހެއް ވަނީ ހުށަހަޅާފައެވެ. އެއީ ރާއްޖޭގެ ސަރަހައްދަށް ބަދަލެއް ގެނައުމުގެ ކުރިން ރައްޔިތުންގެ މަޖިލީހުގެ ތިންބައިކުޅަ ދެބައިގެ ރުހުން ހޯދަންޖެހޭ ގޮތަށް ބަދަލު ގެނައުމާއި ގޮނޑި ގެއްލޭނެ އައު ދެ ހާލަތު ހިމެނުމާއި ދައުލަތުގެ މައިގަނޑު ސިޔާސަތުތައް ކަނޑައެޅުމާއި ސަރުކާރުގެ އިދާރާތަކަށް އިރުޝާދު ދިނުމާއި ގައުމީ ތަރައްގީގެ ޕްލޭންތަކާއި ތަސައްވުރުތައް އެކަށައެޅުން ރައީސްއަށް ލިބިދޭ ގޮތަށް ބަދަލުކުރުމާއި އަސްކަރީ ބޭނުމަކަށް ބޭރުގެ ސިފައިން ތިބެވޭނީ މަޖިލީހުގެ އަގުލަބިއްޔަތު ލިބިގެން ކަމަށް ހިމެނުން ހިމެނެއެވެ.
ރައްޔިތުންގެ މަޖިލީހުގެ މެމްބަރުންގެ ގޮނޑި ގެއްލޭ ގޮތަށް އެންމެ ފުރަތަމަ ގާނޫނެއް އެކުލަވާލީ ކުރީގެ ރައީސް އަބްދުﷲ ޔާމީންގެ ވެރިކަމުގައެވެ. އެހެން ނަމަވެސް އެމްޑީޕީން ކޮންޓްރޯލްކުރި އެގާނޫނު ވަނީ އުވާލާފައެވެ. އެހެންނަމަވެސް އެ ދައުރު ނިމެން ދަނިކޮށް އަނެއްކާވެސް އެމްޑީޕީން ވަނީ މި ގާނުނޫ ފާސްކޮށްފައެވެ.
