ޓެސްލާ އަދި ސްޕޭސްއެކްސްގެ ސީއީއޯ އީލޮން މަސްކްގެ ސާފު މުދަލުގެ އަގު 400 ބިލިއަން ޑޮލަރަށްވުރެ މައްޗަށް އަރައިފިއެވެ.
ފޯބްސް މަޖައްލާގެ ރިއަލްޓައިމް ބިލިއަނެއަރުންގެ ލިސްޓުން ދައްކާގޮތުގައި ބުރާސްފަތި ދުވަހު މަސްކްގެ މުދަލުގެ އަގު މިހާ މައްޗަށް ގޮސްފައިވަނީ މިއަހަރު ޓެސްލާގެ ހިއްސާގެ އަގު 71 އިންސައްތަ އިތުރުވެ، އަދި ސްޕޭސްއެކްސްގެ އަގުވެސް މައްޗަށް ދިއުމާ ގުޅިގެންނެވެ.
މަސްކަކީ ޓެސްލާގެ އެންމެ ބޮޑު ހިއްސާދާރެވެ. އޭނާގެ އަތުގައި ކުންފުނީގެ 13 އިންސައްތަ ހިއްސާ އެބައޮތެވެ. ނޮވެމްބަރު 5 ގައި ބޭއްވުނު އިންތިޚާބަށްފަހު ޓެސްލާގެ ހިއްސާގެ އަގު މައްޗަށް ދިއުން ފެށި، ބުދަ ދުވަހު ހިއްސާގެ އަގު ރެކޯޑު އަގެއްކަމުގައިވާ 424.9 ޑޮލަރަށް އަރާފައިވެއެވެ.
މީގެ އިތުރުން، މަސްކްގެ މުދަލުގެ އަގު މައްޗަށް ދިއުމަށް ސްޕޭސްއެކްސްގެ އިންސައިޑަރ ހިއްސާ ވިއްކާލުމުންވެސް މަގުފަހިވިއެވެ. ބްލޫމްބާގް ނިއުސްއިން ރިޕޯޓުކުރި ގޮތުގައި ސްޕޭސްއެކްސް އާއި އިންވެސްޓަރުން 1.25 ބިލިއަން ޑޮލަރުގެ ކޮމަން ހިއްސާ ގަތުމަށް އެއްބަސްވެފައިވެއެވެ.
މި ރިޕޯޓާ ގުޅޭގޮތުން އެކްސް (ކުރީގެ ޓްވިޓަރ) ގައި ޖަވާބުދެމުން މަސްކް ބުނެފައިވަނީ 350 ބިލިއަން ޑޮލަރުގެ އަގެއްގައިވެސް ގިނަ އިންވެސްޓަރުން ހިއްސާ ވިއްކާލަން ބޭނުން ނުވިކަމަށެވެ. އަދި އާ އިންވެސްޓަރުންނަށް ޖާގަ ދިނުމަށްޓަކައި މުވައްޒަފުންގެ އަތުން އަނބުރާ ގަންނަ ހިއްސާގެ އަދަދު މަދުކޮށްފައިވާ ކަމަށްވެސް އޭނާ ބުނެފައިވެއެވެ.
ޓެސްލާގެ އިންވެސްޓަރުން އުންމީދުކުރަނީ އަލަށް އިންތިޚާބުވި ރިޕަބްލިކަން ސަރުކާރުގެ ސިޔާސަތުތައް އެކުލަވާލުމުގައި މަސްކްގެ ދައުރު އޮތުމުން ޓެސްލާއަށް ފައިދާވާނެ ކަމަށެވެ. ޓެސްލާގެ އިތުރުން މަސްކް ހިންގާ ނިއުރަލިންކް އަދި ސްޕޭސްއެކްސްއަކީވެސް ސަރުކާރުގެ ގަވާއިދުތަކާއި ސިޔާސަތުތަކަށް ބަރޯސާވާ ކުންފުނިތަކަކަށްވާތީ، ވިޔަފާރިއަށް ފަހި ސަރުކާރަކުން މި ކުންފުނިތަކަށް ފައިދާވާނެ ކަމަށް ބެލެވެއެވެ.
