ރީތި އާދަތައް އިޔާދަ ނުކުރާ ނަމަ، ހަގީގަތުގައި ގައުމެއް ނެތް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އދ. މަހިބަދޫގެ ރައްޔިތުންނާ ވާހަކަދައްކަވަމުން ރައީސް ވިދާޅުވީ، އެމަނިކުފާނު ހުވާ ކުރެއްވި ދުވަހު ވެސް ވިދާޅުވި ބީދާއިން ގައުމަށް ގެނެވޭނީ ދެ ވައްތަރެއްގެ ތަރައްގީ ކަމަށާއި އެއީ އުމްރާނީ ތަރައްގީ އާއި ފިކުރީ ގޮތުން އިންސާނާއަށް ގެނެވޭ ތަރައްގީކަމަށެވެ. އެގޮތުން އެ ދެ ތަރައްގީ އެއް ވެގެން މެނުވީ، ގައުމަކަށް މާނަވީ ތަރައްގީއެއް ނާންނާނެ ކަމުގައި ރައީސް ވިދާޅުވިއެވެ.
ރައީސް ވިދާޅުވީ އެގޮތުން ފިކުރީ ގޮތުން ގެނެވޭ ތަރައްގީ އަކީ ވަރަށް މުހިންމު ކަމެއް ކަމަށާއި، އެކަމުގެ ސަބަބުން ގައުމުގެ މުޖްތަމައު ތަރައްގީވެ، ގައުމުން ނެތިގެންދާ ރީތި އާދަތައް އަނބުރާ ގެނެވޭނެ ކަމަށެވެ.
ފިކުރީ ގޮތުން އަންނަ ޑެވެލޮޕްމަންޓް ވަރަށް މުހިންމު. އެއީ ކޮންކަމެއްތޯ. އެއީ ގައުމުގެ މުޖްތަމައުއަށް އަންނަ ތަރައްގީ. އަޅުގަނޑުމެންގެ ތެރެއިން ނެތިގެންދާ އާދަތައް ރީތި އާދަތައް އަނބުރާ ގެނައުމުގެ ތަރައްގީ. އިސްލާމީ ރީތި އުސޫލުތަކާއި އަޚްލާގީ މިންގަނޑުތައް އަނބުރައި ގެނައުމުގެ ތަރައްގީ، – ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ރައީސް ވިދާޅުވީ، މިއަދު ސިޔާސީ އަވައިގައި ޖެހި ގައުމުގައި ހުރި ރީތި އާދަތައް ގަސްދުގައި ނޫން ނަމަވެސް ގެއްލޭ ކަމަށާއި، އެކަންކަން އިޔާދަކުރަން ޖެހޭ ކަމަށެވެ. އެހެން ނޫން ނަމަ، ހަގީގަތުގައި ގައުމެއް ނެތް ކަމަށް ރައީސް ވިދާޅުވިއެވެ.
އަޅުގަނޑުމެން ތެރޭގައި ވަރަށް ބޮޑަށް ނެތިގެން އެބަދޭ އަމުދުން މި ފަހަކަށް އައިސް ސިޔާސީ މައިދާން ފުޅާވެގެން ގޮއްސަ، ތަގައްޔަރުވަމުންދާ ވަރަކަށް. އޭގެ ތެރޭގައި، އެ އަވައިގައި ޖެހިގެން އަޅުގަނޑުމެންގެ ތެރޭ ހުރި ވަރަށް ގިނަ ރީތި އާދަތަކެއް ގަސްތުގައި ނޫނަސް އެބަ ގެއްލޭ. އެހެންވީމާ އެކަންކަން އެބަ ޖެހޭ އިޔާދަ ކުރަން. އެހެންނޫނީ ހަގީގަތުގައި ގައުމެއް ނެތް. އަޅުގަނޑުމެންގެ ތެރޭގައި މީހުންނަށް އިޙްތިރާމްކުރުން. ރީތި ބަހުން ވާހަކަ ދެއްކުން. މިހެން ގޮސް ބައިވަރު ކަންކަން. މި ކަންކަން އިޔާދަކުރުމަކީ އަޅުގަނޑު ގަބޫލުކުރާ ގޮތުގައި ކޮންމެހެން ކުރަންޖެހޭ ކަމެއް، – ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު
ރައީސް ވިދާޅުވީ، ބިނާކުރާ އިމާރަތްތަކާ އެއްވަރަށް ދިވެހީންގެ ރީތި އާދަތައް ކުރިއަށް އޮތް ޖީލުތަކަށް ފޯރުކޮށްދޭން ޖެހޭ ކަމަށެވެ. އޭގެ މިސާލެއްގެ ގޮތުގައި ވޭޕް ނަންގަވަމުން ރައީސް ވިދާޅުވީ، ވޭޕް ވެސް މަނާކުރީ ގައުމު ސަލާމަތްކުރުމަށް ކަމަށާއި، އެކަން ކުރީ ރައްޔިތުން އެކަން ކުރަން ބޭނުުންވެފައި ތިބުމުން ވެސް ކަމަށެވެ. އަދި އެ ފިޔަވަޅަކީ ވެސް އާ ޖީލުތަކުގެ ދުޅަހެޔޮކަން ކަށަވަރުކުރުމުގެ މަގުސަދުގައި އެޅި ފިޔަވަޅެއް ކަމުގައި ރައީސް ވިދާޅުވިއެވެ.
