މިދިޔަ ބުދަ ދުވަހު ހުޅުމާލެއިން ހަލި މަގަށް (ހައިވޭއަށް) އަރަން އޮންނަ މަގުގެ ޓްރެފިކް ބްލޮކްވީ ފުލުހުން ޢަމަލު ކުރި ގޮތުން ކަމަށް ޓެކްސީ ޑްރައިވާސް އެސޯސިއޭޝަނުން ބުނެފިއެވެ.
ޓެކްސީ ޑްރައިވާސް އެސޯސިއޭޝަނުން އެފަދައިން ބުނީ، މިދިޔަ ބުދަ ދުވަހު ޓެކްސީތަކުން ހިންގި މުޒާހަރާއާ ގުޅިގެން، އެ އެސޯސިއޭޝަނުން ރޭ ނެރުނު ބަޔާނެއްގައެވެ.
އެގޮތުން އެ ބަޔާނުގައި އެ އެސޯސިއޭޝަނުން ބުނީ، ބުދަ ދުވަހުގެ ރޭ ހުޅުމާލެ ފަރާތުން ހަލި މަގަށް އަރަން އޮންނަ މަގުގައި ޓްރެފިކް ބޮދުވީ ފުލުހުން އެވަގުތު އަމަލުކުރި ގޮތުގެ ސަބަބުންނެވެ. އަދި ޓެކްސީ ހިދުމަތް ފުރިހަމަ ގޮތުގައި ފޯރުކޮށްދިނުމަށް ޑްރައިވަރުންގެ ފަރާތުން ހުށައަޅާފައިވާ ކަންކަމަށް މި ސަރުކާރުން އިޖާބަ ދީފައިނުވާކަމަށް ވެސް އެ ބަޔާނުގައި އެ އެސޯސިއޭޝަނުން ވަނީ ބުނެފައެވެ.
މީގެ އިތުރުން، އެރޭ ތިރީސް ޓެކްސީއެއް ޓޯވްކޮށް، އެ މުޒާހަރާއާ ގުޅިގެން ތިން މީހަކު ހައްޔަރުކުރުމާ ގުޅިގެން ވެސް އެ އެސޯސިއޭޝަނުން ވަނީ ކަންބޮޑުވުން ފާޅުކޮށްފައެެވެ. އެގޮތުން އެކަމަކީ ޓެކްސީ ޑްރައިވަރުންގެ އާމްދަނީއަށް އެކަމުން އަސަރުކުރާނެެ ކަމެއް ކަމަށާއި، އެކަމަކީ ތަހުޒީބު ޑިމޮކްރެސީއެއްގައި ކޮށްގެންވާނެ ކަމެއް ނޫންކަމުގައި އެ އެސޯސިއޭޝަނުން އެ ބަޔާނުގައި ބުނެފައިވެއެވެ.
އަދި އެ ޓެކްސީތައް ހިފެހެއްޓި ސަބަބެއް ވެސް ފުލުހުން ބަޔާންކޮށްދީފައި ނުވާ ކަމަށާއި، އެ މުޒާހަރާ ފެށުމުގެ ކުރިން ވެސް އެކަމަށް ފުލުހުން ހުރަސް އަޅާފައިވާ ކަމުގައި އެ އެސޯސިއޭޝަނުގެ ބަޔާނުގައި ވެއެވެ.
ޓެކްސީ އެސޯސިއޭޝަނުން އެހެން ބުނި ނަމަވެސް، އެރޭގެ ހާދިސާގެ މަންޒަރުތައް ފެންނަ ގޮތުން، ހުޅުމާލެ ނިރޮޅު މަގުން ހަލި މަގަށް އަރަން އޮންނަ ހިސާބު ބަންދުކޮށް، އެ މަގުން އާންމު ދަތުރުފަތުރުތަކަށް ދަތުރުނުކުރެވޭ ގޮތަށް ކާރު ޕާކުކުރީ ޓެކްސީ ޑްރައިވަރުންނެވެ. ފުލުހުން އެ ޑްރައިވަރުންގެ ކާރުތައް ޓޯކުރީ އެކަމުގެ ސަބަބުން ހަލި މަގަށް އަރަން އޮންނަ ނިރޮޅު މަގުގެ ޓްރެފިކް ވަރަށް ބޮޑުވެ، އާންމު ދަތުރުފަތުރަށް ދަތިވުމާ ގުޅިގެން ކަމަށް ފުލުހުން ވެސް މީގެ ކުރިން ބުނެފައިވެއެވެ.
އެގޮތުން ޓެކްސީތަކުގެ އެ މައްސަލައާ ގުޅިގެން މިހާތަނަށް ތިން މީހަކު ހައްޔަރުކުރި ނަމަވެސް، އޭގެ ތެރެއިން އެކަކު ވަނީ ޝަރުތަކަކާއެކީ ދޫކޮށްލާފައެވެ. ފުލުހުން ބުނި ގޮތުގައި އެ މައްސަލައިގައި މިހާތަނަށް ޓޯވް ކުރީ 22 ކާރެވެ.
