އެކަނިވެރި ދިިރިއުޅެމެއްގައި އުޅެމުންދާ ފިރިހެނުންނަށް އޮޅުވާލައި، އެމީހުންގެ ގެއިން ފައިސާ އާއި ގަހަނާ ވަގަށް ނެގުމުގެ ރެކެޓެއް ހިންގަމުން ދަނިކޮށް އިންޑިއާގެ އުއްތަރްޕްރަދޭޝްއަށް ނިސްބަތްވާ ދެ އަންހެނަކާއި ގިނަ އަދަދެއްގެ ފިރިހެނުން ހައްޔަރުކޮށްފިއެވެ.
ފުލުހުން ބުނި ގޮތުގައި އިންޑިއާގައި މި ރެކެޓް ހިންގަމުން ގޮސްފައި ވަނީ ޕޫނަމް ނަމަކަށް ކިޔާ އަންހެން މީހާ އަނބިމީހާގެ ގޮތުގައި އަދި ސަންޖަނާ ގުޕްތާ އޭނާގެ މަންމަގެ ގޮތުގައި ހެދިގެންނެވެ. ވިމަލޭޝް ވަރްމާ އާއި ދަރުމެންދުރަ ޕްރަޖާޕަތީ ނަމަކަށް ކިޔާ މި ދެ މީހުން ޓާގެޓްތައް ދެނެގަނެ ޕޫނަމް އަށް މީހުން ހޯދާ ދެއެވެ. އަދި މެޗް ހެދުމަށް ފައިސާ ދެއްކުމަށް ޓާގެޓްތަކަށް އަންގަމުން ގޮސްފައި ވެއެވެ. އަދި ކޯޓުގައި ކައިވެނި ކުރުމަށް ފަހު ޕޫނަމް ދާނީ ފިރިހެން މީހާގެ ގެއަށެވެ. އަދި ފުރުސަތެއް ލިބުމާއެކު ފިރިހެން މީހާގެ ގެއިން ގަހަނާއާއި ފައިސާ ވަގަށް ނަގައި ފިލާނެއެވެ.
ފުލުހުން ބުނީ މައްސަލަ ހުށަހެޅި ޝަންކަރް އުޕާދްޔާ އެ މަޅީގައި ޖެއްސުމުގެ އެގޮތަށް ހަ މީހުންނާއި ކައިވެނިކޮށްގެން ޕޫނަމް ފިލާފައިވާ ކަމަށެވެ. މައްސަލަ ހުށަހެޅި މީހާ ބުނީ އޭނާ އަކީ ކައިވެނިކޮށްފައިނުވާ މީހެއް ކަމަށާއި ކައިވެނި ކުރާނެ މީހަކު ހޯދަމުން ދިޔަ ކަމަށެވެ. ވިމަލޭޝް އޭނާގެ ގާތަށް ގޮސް ކައިވެނި ކުރާނެ އަންހެނަކު ހޯދައިދޭނެ ކަމަށް ބުނެ ގާތްގަނޑަކަށް 1.5 ލައްކަ ރުޕީސް އަށް ޑިމާންޑް ކުރިއެވެ. އުޕާދްޔާ ވަނީ އެކަމަށް އެއްބަސްވެފައެވެ.
މިދިޔަ ހޮނިހިރު ދުވަހު ވިމަލޭޝް އޭނާ ކޯޓަށް ގެންގޮސްދިން އިރު، ޕޫނަމްއަށް ތައާރަފްކޮށްދިން ކަމަށް މައްސަލަ ހުށަހެޅި މީހާ ބުންޏެވެ. އެއަށްފަހު އެމީހުން އެދުނީ 1.5 ލައްކަ ރުޕީސް އަށެވެ. އުޕާދްޔާ އަށް މިކަމުގައި ގޯހެއް އުޅޭކަން އެނގުމުން، ޕޫނަމް އާއި ސަންޖަނާގެ އައިޑީ ކާޑު ދެއްކުމަށް އެންގިއެވެ.
”އެމީހުން އުޅުނު ގޮތުން އެނގުނީ އެމީހުން އަހަރެންނަށް އޮޅުވާލަން އުޅޭކަން، އަހަރެން ކައިވެންޏަށް ދެކޮޅު ހެދުމުން އެމީހުން އިންޒާރު ދިނީ އަހަރެން މަރާލައި ދޮގު މައްސަލަތަކުގައި ފްރޭމް ކޮށްލާނެ ކަމަށް. ވިސްނަން ވަގުތު ބޭނުންވާ ކަމަށް ބުނުމުން އެތަނުން އަހަރެން ނުކުތީ،“. އުޕާދްޔާ ފުލުހަށް ހުށަހެޅި މައްސަލައިގައި ބުނެފައި ވެއެވެ.
މި މައްސަލައިގައި މިހާތަނަށް 4 މީހަކު ވަނީ ހައްޔަރު ކޮށްފައެވެ.
