ޢުމުރުން ދުވަސްވާވަރަކަށް ހިތުގެ މައްސަލަތައް ގިނަވާނެއެވެ. ތަފާތު އުނދަގޫތައް ގިނަވާނެއެވެ. އެއީ ނުވެނުދާނެ ކަމެކެވެ. ޞިއްޙީ މާހިރުން ބުނާނީ އެއީ ކައިބޮއި ހެދޭ ތަކެތީގެ ސަބަބުންނާއި މިވެނި އެވެނި ކަންކަން މެދުވެރިވާތީ ކަމަށެވެ.
ކޮންމެއަކަސް ފަހުގެ ދިރާސާތަކުން އެނގެނީ ހަފްތާއަކު 5، ނުވަތަ 6 ގަޑިއިރު ހަށިގަނޑަށް ފައިދާހުރި ކަސްރަތެއް ކުރާނަމަ 2 އަހަރު ތެރޭގައި އޭނާގެ ހިތަށް ވަރަށް ބޮޑު ދުޅަހެޔޮ ކަމެއް ލިބޭނެ ކަމެވެ. އެކަމުގެ ފައިދާ ބަޔާންކުރަމުން ބައެއް ޑޮކްޓަރުން ބުނަނީ ޢުމުރަށްވުރެ 20 އަހަރު ހިތް ޒުވާންކޮށްދޭނެ ކަމަށެވެ. އެއިގެ މާނައަކީ ޢުމުރުގެ 50 އަހަރުގެ މީހެއްގެ ހިތުގެ ޒުވާންކަން 30 އަހަރުގެ މީހަކާއި އެއްފަދަވުމެވެ.
ބައެއް މީހުންނަށް ކަސްރަތުކުރަން ފަސޭހަވަނީ ހަވީރުއެވެ. ނަމަވެސް ހަވީރު ކަސްރަތުކުރާ ގިނަ ބައަކަށް ކުރިމަތިވާ ކަމެއް އޮވެއެވެ. އެއީ ކޮންމެވެސް މުހިންމު ކަމެއް ކުރިމަތިވެ ކަސްރަތުކުރާނެ ވަޤުތު ނުލިބުމެވެ. އެހެންވެ ރާވާ ގޮތަށް ކުރިއަށް ނުގެންދެވުމެވެ.
ގިނަ ޑޮކްޓަރުން އެއްބަސްވާ ގޮތުގައި ކަސްރަތުން ބޮޑަށް ފައިދާކުރަނީވެސް ފަތިހު ނުވަތަ އިރުއަރާތަނުން (ވީހާހެނދުނަކާ) ކަސްރަތުކުރުމުންނެވެ. ހަމައެއާއިއެކު ފަތިހު ކަސްރަތުކުރުމަކީ އާދަވެގެން އެކަންކުރަން އެންމެ ފަސޭހަވާނެ ގޮތެވެ! ދުވަހުގެ މަސައްކަތްތަކަށް ނުފެށޭތީ ކުރިމަތިވާނެ ކަންކަން ވަރަށް މަދުވާނެތީއެވެ.
މިއީ ތަޖުރިބާކާރު ވިދާޅުވެފައިވާ ވާހަކަކޮޅެކެވެ. މިވާހަކަކޮޅުން ޙާޞިލުކުރަންޖެހޭ ފައިދާގެ ތެރޭގައި ޞިއްޙީ ދުޅަހެޔޮކަމަށް ޤަވާޢިދުން ކަސްރަތުކުރަން ޖެހޭކަން ފާހަގަކުރެވެއެވެ. ހަމަ އެޢާއިއެކު ފަތިހު ހޭލައި ފަތިސްނަމާދުކޮށްލައި، ޛިކުރުތައް ކިޔާލައިގެން ކަސްރަތުކުރުމުން ލިބޭ ފައިދާ ބޮޑުވާނެކަންވެސް އެނގިގެންދެއެވެ.
