ހޯމްލޭންޑް ސެކިއުރިޓީ މިނިސްޓަރު އަލީ އިހުސާންގެ އިތުބާރު ނެތް ކަމުގެ މައްސަލަ ރައްޔިތުންގެ މަޖިލީހުގެ ތެރެއިން ފެއިލް ކޮށްލާނެ ކަމަށް ޕީއެންސީގެ ޑެޕިއުޓީ ޕީޖީ ލީޑަރ ވިލިމާލެ ދައިރާގެ މެންބަރު، މުޙައްމަދު އިސްމާއީލް ވިދާޅުވެއްޖެ އެވެ.
ހޯމްލޭންޑް ސެކިއުރިޓީ މިނިސްޓަރު އަލީ އިހުސާންގެ އިތުބާރު ނެތް ކަމުގެ މައްސަލަ އިދިކޮޅު އެމްޑީޕީން ރައްޔިތުންގެ މަޖިލީހަށް ވަނީ ހުށަހަޅާފަ އެވެ.
މިމައްސަލައާއި ގުޅިގެން ޕީއެންސީގެ ޑެޕިއުޓީ ޕީޖީ ލީޑަރު ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު މުހައްމަދު އިސްމާއީލް ވިދާޅުވީ، މިނިސްޓަރު އިހުސާންގެ މައްޗަށް ޕީއެންސީ ޕީޖީ ގުރޫޕުގެ ފުރިހަމަ އިތުބާރު އެބަ އޮތް ކަމަށެވެ.
ރައީސުލްޖުމްހޫރިއްޔާގެ އިތުބާރު މިނިސްޓަރު އިހުސާންގެ މައްޗަށް އޮތްހާ ހިނދަކު މި މައްސަލަ ކުރިއަށް ގެންދަން އެޕާޓީގެ ޕީޖީ ގްރޫޕުން ފުރުސަތު ނުދެއްވާނެ ކަމަށް މުހައްމަދު ވިދާޅުވި އެވެ އަދި ރައްޔިތުންގެ މަޖިލީހުގެ ތެރެއިން ޕީއެންސީގެ ޕީޖީން މި މައްސަލަ ފެއިލްކޮށްލާނެ ކަމަށް އޭނާ ވިދާޅުވި އެވެ.އެމްޑީޕީން އެ މައްސަލަ މަޖިލީހަށް ހުށަހެޅީ 12 މެމްބަރުންގެ ސޮޔާއެކު އެވެ. އެ މައްސަލައިގައި ބުނީ އިހުސާން މަގާމާ ހަވާލުވެވަޑައިގެންނެވި ފަހުން ފާއިތުވި އެއް އަހަރު ތެރޭ، ގާނޫނު އަސާސީއާއި ހިލާފަށް އިހުސާން އެތައް ކަމެއް ކުރައްވާފައިވަ ކަމަށެވެ.ރައްޔިތުންގެ މަޖިލީހަށް މިނިސްޓަރު އިހުސާންގެ އިތުބާރު ނެތް ކަމުގެ މައްސަލަ ހުށަހަޅާފައިވާ އިރު އެމްޑީޕީން ވަނީ ޕީއެންސީއަށް މެމްބަރުން އިތުރުކުރަން ވަގު ފޯމު ހުށަހެޅިކަމަށް ބުނާ މައްސަލަ، އެންޓި ކޮރަޕްޝަން ކޮމިޝަން (އޭސީސީ) އަށާއި ޕްރޮސިކިއުޓާ ޖެނެރަލްގެ އޮފީސް (ޕީޖީ)އަށް ވެސް ހުށަހަޅާފަ އެވެ.
މިކަމާ ގުޅިގެން ޕީއެންސީން ބުނެފައި ވަނީ އެޕާޓީން ކުރިއަށް ގެންދިޔަ ”މެންބަޝިޕް ޑްރައިވް“ގެ ތެރެއިން އިލެކްޝަންސް ކޮމިޝަން އަށް ހުށަހެޅި ފޯމުތަކުގެ ސައްޚަކަން ކަށަވަރުކުރެވޭނެ ގޮތެއް ޕާޓީގައި ނެތް ކަމަށާއި، އެ ފޯމުތަކުގެ ސައްޚަކަން ކަށަވަރުކުރެވެނީ އިލެކްޝަންސް ކޮމިޝަން (އީސީ) އަށް ކަމަށެވެ.
ޕީއެންސީން ބުނީ، އެ ޕާޓީން ކުރިއަށް ގެންދިޔަ މެންބާޝިޕް ޑްރައިވްއަކީ ރާއްޖޭގައި މިހާތަނަށް އެންމެ ގިނަ އަދަދަކަށް ސިޔާސީ ޕާޓީއަކަށް މެންބަރުން ވަނުމަށް ފޯމު ހުށަހެޅި އެއް ހަރަކާތަށް ވެފައި، ޕާޓީގެ އިދާރީ މުވައްޒަފުންގެ ބުރަ މަސައްކަތުން އެ ފޯމުތައް އީސީއަށް ޕޯޓަލް މެދުވެރިކޮށް ހުށަހެޅިކަމަށެވެ.
އަދި އެކަމުގެ ތެރެއިން ވަގު ފޯމުތަކެއް އީސީއަށް ހުށަހެޅިކަން މިހާރު އެ ޕާޓީއަށް ފާހަގަކުރެވިފައިވާ ކަމަށާއި، އެކަމާ ގުޅިގެން އީސީ އާއި ފުލުހުންނަށް މައްސަލަތަކެއް ހުށަހެޅިފައިވާކަން އެ ޕާޓީއަށް އެ އިދާރަތަކުގެ ފަރާތުން އަންގާފައިވާކަމުގައި ވެސް ޕީއެންސީން ބުނެ އެވެ.
އެހެން ނަމަވެސް އެ ފޯމުތަކުގެ ސައްޚަކަން ކަށަވަރުކުރުމުގެ ގާބިލުކަން އެ ޕާޓީގައި ނެތުމުގެ ނަތީޖާއަކީ، ހުށަހެޅޭ ފޯމެއްގެ ސައްޚަކަމާ މެދު ސުވާލެއް އުފެދޭ ހިސާބަކީ އީސީއަށް އެ ފޯމެއް ހުށަހެޅުމުގެ ފަހުގެ މަރުހަލާއެއް ކަމުގައި ވުން ކަމުގައި އެ ބަޔާނުގައި ބުންޏެވެ. އަދި ގިނަ ޕާޓީ އެކުލެވޭ ސިޔާސީ މާހައުލެއް ރާއްޖޭގައި ވުޖޫދުކުރެވުނު ހިސާބުން ފެށިގެން މިއަދާ ހަމައަށް ވެސް ރާއްޖޭގައި ވަސީލަތްތައް ހުރިގޮތުން އެކަމަކީ އެ ޕާޓީއަށް އެކަނި އޮތް ގޮންޖެހުމެއް ނޫންކަމުގައި ވެސް ޕީއެންސީން ބުނެ އެވެ.
