ރާއްޖޭގެ ހޯމް މިނިސްޓަރު އަލީ އިހުސާންގެ މަސައްކަތްތަކާ މެދު ރައްޔިތުންގެ އިތުބާރު އޮތް މިންވަރާ މެދު އެއްވެސް މީހަކު ޝައްކެއް ނުކުރާނެ އެވެ. ރާއްޖޭގައި ޒަމާނުއްސުރެ ހުރި ބޮޑެތި މައްސަލަތަކެއް ހައްލު ކުރުމަށް މިނިސްޓަރު އިހުސާންގެ ބެލުމުގެ ދަށުން ހޯމް މިނިސްޓްރީންނާއި އެ މިނިސްޓްރީގެ ދަށުން މަސައްކަތް ކުރާ އިދާރާތަކުން އަންނަނީ ކުރަމުންނެވެ. މިނިސްޓަރު އިހުސާނަށް އޮތް އިތުބާރުވެސް ދަނީ އިތުރުވަމުންނެވެ.
ހޯމް މިނިސްޓްރީއާއި އެ މިނިސްޓްރީގެ ދަށުން ހިންގަމުން އަންނަ އިދާރާތަކުން ކުރަމުންދާ މަސައްކަތްތަކުގެ ތެރޭގައި:
އިމިގްރޭޝަންއާއި ފުލުހުން ގުޅިގެން ރާއްޖޭގައި ގަވައިދާ ޚިލާފަށް އުޅޭ ބިދޭސީންނާ ދެކޮޅަށް ގިނަ ރެއިޑްތަކެއް ކުރުމާއި، އެފަދަ ބިދޭސީން އިމިގްރޭޝަންގެ ބެލުމުގެ ދަށަށް ގެނައުން.
ގަވައިދާ ޚިލާފަށް ރާއްޖޭގައި އުޅޭ ބިދޭސީން ޑީޕޯޓް ކުރުން. މިގޮތުން މިދިޔަ އަހަރު ނިމުނު އިރު 5،600 އަށް ވުރެ ގިނަ ބިދޭސީން ވަނީ ޑީޕޯޓްކޮށްފައެވެ.
ރާއްޖޭގައި އުޅޭ ބިދޭސީންގެ މަޢުލޫމާތުތަކާއި ބަޔޯމެޓްރިކްސް ޑޭޓާ ނެގުމުގެ މަސައްކަތް ކުރިއަށް ގެންދިއުން.
މަސްތުވާތަކެއްޗާ ދެކޮޅަށް ބޮޑެތި އޮޕަރޭޝަންތަކެއް ހިންގުން. މިގޮތުން ކަސްޓަމްސްއާއި ފުލުހުން ވަނީ ގިނަ އަދަދެއްގެ މަސްތުވާތަކެތި އަތުލައިގަނެ، މަސްތުވާތަކެތީގެ ވިޔަފާރި ކުރާ އެތައް ބަޔަކު ހައްޔަރުކޮށްފައެވެ.
މަސްތުވާތަކެތީގެ ޤާނޫނަށް ބޮޑެތި އިޞްލާޙުތަކެއް ގެނައުމަށް ހުށަހެޅުން. މި އިޞްލާޙުތަކުގެ ތެރޭގައި އަލަށް ކޮންޓްރޯލް ކުރަންޖެހޭ މަސްތުވާތަކެތި ކޮންޓްރޯލް ކުރެވޭނެ ނިޒާމެއް ތަޢާރަފުކުރުމާއި، މަސްތުވާތަކެއްޗާ ގުޅޭ އިތުރު ކުށާއި އަދަބު ކަނޑައެޅުން ހިމެނެއެވެ.
ރާއްޖޭގައި ހިންގާ ސްކޭމްތައް ހުއްޓުވުމަށް މަސައްކަތްކުރުން.
މި ހުރިހާ މަސައްކަތްތަކަކީ ރާއްޖޭގެ ރައްޔިތުންގެ ސަލާމަތާއި ރައްކާތެރިކަމަށް ކުރެވޭ މުހިންމު މަސައްކަތްތަކެކެވެ. މިފަދަ ބޮޑެތި މައްސަލަތަކެއް ހައްލު ކުރެއްވުމަށް މިނިސްޓަރު އިހުސާން ކުރައްވަމުން ގެންދަވާ މަސައްކަތްތަކުގެ ސަބަބުން، ރައްޔިތުންގެ އިތުބާރު އެ މަނިކުފާނަށް އޮތްކަން ޔަގީނެވެ.
އެހެންކަމުން އިދިކޮޅު އެމްޑީޕީން މިނިސްޓަރު އިހުސާންގެ އިތުބާރު ނެތްކަމަށް ބުނެ އެ މައްސަލަ ރައްޔިތުންގެ މަޖިލީހަށް ވެއްދުމަކީ ސިޔާސީ މަގުސަދެއް ހާސިލް ކުރުމަށް ކުރިކަމެއްކަމަށް ބެލެވިދާނެ އެވެ. މި މައްސަލަ މަޖިލީހަށް ހުށަހެޅި ނަމަވެސް ރައްޔިތުންގެ އިތުބާރު މިނިސްޓަރަށް އޮތުމުން މަޖިލީހުގެ ތެރެއިން އެ މައްސަލަ ފާސް ނުވާނެކަމަށް ޕީއެންސީގެ ޕާލިމްންޓްރީ ގްރޫޕުން ވަނީ ބުނެފަ އެވެ.
ޕީއެންސީގެ ޕީޖީ ލީޑަރު އިބްރާހިމް ފަލާޙު ވިދާޅުވީ އެމްޑީޕީން އިތުބާރު ނެތްކަމުގެ މައްސަލަ މަޖިލީހަށް ހުށަހެޅި ނަމަވެސް، ރައްޔިތުންގެ އިތުބާރު މިނިސްޓަރު އިހުސާނަށް އޮތްކަމަށެވެ. އަދި އެ މައްސަލަ މަޖިލީހުން ފާސް ނުވާނެ ކަމުގެ ޔަޤީންކަން ފަލާހު ދެއްވި އެވެ. މިއީ ރައްޔިތުންގެ މެދުގައި މިނިސްޓަރު އިހުސާންގެ މަސައްކަތްތަކާ މެދު އޮތް ހެޔޮ ނަޒަރުގެ ސަބަބުން ޕީއެންސީން ނިންމާ ނިންމުމެއްކަމަށް ފަލާހް ވިދާޅުވި އެވެ.
މިނިސްޓަރު އިހުސާނާ ދެކޮޅަށް ހުށަހަޅާފައިވާ އިތުބާރު ނެތްކަމުގެ މައްސަލައަކީ މިނިސްޓަރާ ދެކޮޅަށް ކުރެވޭ ބައެއް ތުހުމަތުތަކުގެ ސަބަބުން ހުށަހެޅުނު މައްސަލަ އެކެވެ. އޭގެ ތެރޭގައި ވެރިކަން ކުރާ ޕީއެންސީއަށް މެންބަރުން ވެއްދުމަށް ހޯމް މިނިސްޓްރީއާއި އެ މިނިސްޓްރީގެ ދަށުން ހިންގަމުން އަންނަ ޑިޕާޓްމެންޓް އޮފް ނެޝަނަލް ރެޖިސްޓްރޭޝަންގެ މުދަލާއި މީހުން ބޭނުންކޮށްފައިވާކޮށްފައިވާކަމަށް ކުރެވޭ ތުހުމަތުތައް ހިމެނެ އެވެ. އަދި ބައެއް މީހުންނަށް ނޭނގި ޕީއެންސީއަށް ވެއްދިކަމަށްވެސް ތުހުމަތު ކުރެވިފައިވެ އެވެ.
ނަމަވެސް، މިފަދަ ކަމެއްގައި މިނިސްޓަރު އިހުސާން ބައިވެރިވި ކަމުގެ އެއްވެސް ހެއްކެއް ލިބިފައެއް ނުވެ އެވެ. މިނިސްޓަރު އިހުސާން ޑީއެންއާރު އޮފީހުގައި ހުންނެވި ފޮޓޯއެއް ދައުރުވި ނަމަވެސް، އެއީ ޑީއެންއާރުގެ މުވައްޒަފުން ޕިއްޒާ ކާތީ އެތަނަށް އެއްޗެއް ކާން ދިއުމަށް އެދުމުން ދިޔަ ދުވަހެއްގައި ނަގާފައިވާ ފޮޓޯއެއްކަމަށް މިނިސްޓަރު އިހުސާން ވަނީ ވިދާޅުވެފަ އެވެ.
އެމްޑީޕީން މަސައްކަތް ކުރަމުން ދަނީ އަދުގެ ސަރުކާރުން ރައްޔިތުންގެ ހައްގުގައި ކުރަމުން އަންނަ ބޮޑެތި މަސައްކަތްތަކެއް މަޑުޖައްސާލުމަށެވެ. ނަމަވެސް އެފަދަ ހުއްޓުމަށް ސަރުކާރަށް ގެނައުމުގެ ފުރުސަތެއް ރައްޔިތުންވެސް އަދި ވެރިކަން ކުރާ ޕީއެންސީންވެސް ނުދޭނެކަން ޔަގީނެވެ.
