އެމްޑީޕީގެ ޖަލްސާތަކަށް ދިއުން ހުއްޓާލީ ކުރީ ސަފުގައި ބާޣީން ތިބޭތީ މޭނުބައިކުރާވަރުން ކަމަށް އެމްޑީޕީގެ ކުރީގެ ރައީސް އިބްރާހީމް އިސްމާޢީލް (އިބުރާ) ވިދާޅުވެއްޖެއެވެ.
ސޯޝަލް މީޑިޔާގައި ޙިއްސާކުރެއްވި ޕޯސްޓެއްގައި، އެމްޑީޕީގެ ކުރީގެ ރައީސް އިބްރާހީމް އިސްމާޢީލް ވިދާޅުވެފައިވަނީ، އެ ޕާޓީގެ ޖަލްސާތަކަށް ދިއުން ހުއްޓާލެއްވި ސަބަބަކީ، ކުރީ ސަފުގައި އެމަނިކުފާނާއެކު ”ބާޣީން“ ބައިތިއްބަން ފެށުމުންކަމަށެވެ.
މީގެ އިތުރުން، އެފަދަ ފަރާތްތަކުން ޕޯޑިއަމަށް އަރައި ދައްކާ ވާހަކަތައް އަޑުއެހުމަކީ އެމަނިކުފާނުގެ ނަފްސަށް އުނދަގޫވާ ކަމެއްކަމަށް ވިދާޅުވެފައިވެއެވެ.
“އެމް.ޑީ.ޕީ ގެ ޖަލްސާތަކަށް ދިއުން އަހަރެން ހުއްޓާލީ، ކުރީ ގޮނޑިބަރީގައި މަށާއެކު ބާޣީން ބައިތިއްބަން ފެށީމައި. އެމީހުން ޕޯޑިއަމްގައި ތިބެ ދައްކާވާހަކަ އަޑުއަހަން ނަފްސަށް އުނދަގުކުރުވާތީ. މޭނުބައިކުރާވަރުން.” އިބުރާ ވިދާޅުވިއެވެ.
އިބްރާހީމް އިސްމާޢީލް އިތުރަށް ވިދާޅުވެފައިވަނީ، އެމަނިކުފާނުގެ ނަފްސުގެ އަގު ސިޔާސީ ބާރަށްވުރެ ބޮޑުކަމަށެވެ.
މި ބަޔާނުން ދޭހަވަނީ، އަމިއްލަ ޤަދަރާއި ޢިއްޒަތް ހިފެހެއްޓުމަށްޓަކައި، ސިޔާސީ މަޝްރަޙުގައި ވަކި ހުދޫދެއްގައި އުޅުއްވުމަށް އެމަނިކުފާނު ނިންމަވާފައިވާކަމެވެ.
