ގެދޮރުވެރިކުރުމުގެ ސްކީމްގެ ދަށުން 4،000 ފުލެޓު ދިނުމަށް އިޢުލާނުކުރި ލިސްޓުގައި ގިނަ މައްސަލަތަކެއް ހުރިކަމަށް އިމާރާތްކުރުމާއި ގެދޮރުވެރިކަމާއި ބިނާވެއްޓާ ބެހޭ ވަޒީރު، ޑރ. ޢަބްދުﷲ މުއްޠަލިބް މިއަދު ހާމަކުރައްވައިފިއެވެ.
އެގޮތުން ވެރިކަން ބަދަލުވުމުގެ ދެ ދުވަސް ކުރިން 15 ނޮވެމްބަރުގައި އިޢުލާނުކުރި ލިސްޓަށް 17 އަދި 18 ނޮވެމްބަރުގައި ވެސް ފުލެޓު ކޮމިޓީގެ މެންބަރުން އެކްސެސްވެފައިވާކަން ސާބިތުކުރެވޭ ކަމަށް ވަޒީރު ވަނީ ވިދާޅުވެފައެވެ.
މުއްތަލިބު މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ. ފްލެޓް ލިސްޓު އިޢުލާނުކުރުމާއެކު އެއްބަސްވުމެއް ދެ ދުވަހުގެ ތެރޭގައި ހުރިހާ ފަރާތްތަކާއެކު ވެފައިވާ ކަމަށް ވެސް ވަނީ ވިދާޅުވެފައެވެ.
ވަޒީރު ފާހަގަކުރެއްވި މައްސަލަތަކުގެ ތެރޭގައި:
ކުންފުނި ރަޖިސްޓްރީކުރި ތާރީޚަށްވުރެ ކުރިން އެ ކުންފުނީގައި މަސައްކަތްކުރި ކަމަށް ދޮގު ލިޔުން ދީފައިވުން
ބޮޑު ކޮންސްޓްރަކްޝަން ކުންފުންޏަކުން މަސްވެރި ދޯންޏެއްގެ ކެޔޮޅަކަށް މާލޭގައި ދާއިމީ ވަޒީފާއެއްގައި މަސައްކަތްކުރާ ކަމަށް ލިޔުން ދީފައިވުން
އެއް ގެއެއްގެ ފަސް މީހަކަށް ކައުންސިލުން ލިޔުން ދީގެން ފުލެޓު ލިސްޓަށް އަރުވާފައިވުން
ފުލެޓު ކޮމިޓީގެ މެންބަރަކު އަމިއްލައަށް އޭނާގެ ފޯމު އިވެލުއޭޓްކޮށްގެން ލިސްޓުގައި ހިމަނާފައިވޭ
މީގެ އިތުރުން، މާލޭގައި 15 އަހަރު ދިރިއުޅުނުކަން ސާބިތުކުރުމަށް އައިޑީ ކާޑުގެ އެއް ފުށް އަޕްލޯޑްކޮށްފައިވާ ފަރާތްތަކަށް ވެސް ފުލެޓު ލިބޭ ލިސްޓުގައި ހިމަނާފައިވާ ކަމަށް ވަޒީރު ވިދާޅުވިއެވެ.
”މި ހުރިހާ މައްސަލަތަކެއް ހުރުމާއެކު، މި ލިސްޓު އަލުން މުރާޖަޢާކޮށް، ޙައްޤުވެރިންނަށް ފުލެޓު ލިބޭނެ ގޮތް ހަދަން ޖެހޭ،“ ވަޒީރު ވިދާޅުވިއެވެ.
ވަޒީރު ވިދާޅުވީ ކުރީގެ ސަރުކާރުން މި ލިސްޓު އެކުލަވާލުމުގައި ޢަމަލުކޮށްފައިވާ ގޮތާމެދު ސުވާލު އުފެދި، އާންމުންގެ ފަރާތުން ފާޑުކިޔުންތައް އަމާޒުވަމުންދާކަން ފާހަގަކުރެވޭ ކަމަށެވެ.
