ކުރީގެ ރައީސް އަބްދުﷲ ޔާމީން އަބްދުލްޤައްޔޫމް، ޖުޑީޝަރީ އާއި ވައްކަމުގެ ވާހަކަ އަދި އަނިޔާވެރިކަމުގެ ވާހަކަދައްކަވާތީ ވަރަށް އަޖައިބުވާ ކަމަށް ވެރިކަން ހިންގާ ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޕާލިމަންޓަރީ ގްރޫޕުގެ ލީޑަރު، އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.
ފަލާހު އެކްސްގައި ރޭ ކުރެއްވި ޕޯސްޓެއްގައި އެހެން ވިދާޅުވެފައިވާ އިރު، ޕީޕަލްސް ނޭޝަނަލް ފްރަންޓް (ޕީއެންއެފް)ގެ ޖަލްސާތަކުގައި ރައީސް ޔާމީން ގެންދަވަނީ ތަކުރާރުކޮށް ފަލާހާއި ސަރުކާރު އަދި ރައްޔިތުންގެ މަޖިލީހަށް ވަރަށް ބޮޑަށް ފާޑުވިދާޅުވަމުންނެވެ. ހާއްސަކޮށް ޖުޑީޝަލް ސާވިސް ކޮމިޝަން (ޖޭއެސްސީ) އިން ސުޕްރީމް ކޯޓުގެ ހަތް ފަނޑިޔާރުންގެ ބެންޗުގައި ހިމެނިވަޑައިގަންނަވާ ފަނޑިޔާރު ހުސްނުއް ސުއޫދު، ފަނޑިޔާރު މަހާޒް އަލީ ޒާހިރު އަދި ފަނޑިޔާރު އަޒްމިރަލްދާ ޒާހިރު ސަސްޕެންޑުކުރުމުން ވެސް ޔާމީން ފާޑުވިދާޅުވިއެވެ.
ފަލާހު ކުރެއްވި ޕޯސްޓުގައި ވިދާޅުވީ މިހާރު ހިނގާ 20 ވަނަ މަޖިލީހަކީ ނަމޫނާ މަޖިލީހެއް ކަމަށާއި އެހެން އެކަންވާ ސަބަބަކީ ސަރުކާރުން މަޖިލީހަަށް ”އަތާއި ފަޔާ ނުބޭނުން“ ކަމަށެވެ. އަދި 18 ވަނަ މަޖިލީހުގެ މެންބަރަކަށް ހުންނެވި އިރު، އޭރުގެ ރައީސް ޔާމީނާއި އެ މަނިކުފާނުގެ އަނބިކަނބަލުން ފާތިމަތު އިބްރާހީމްގެ ”އަތާއި ފައި ވެސް އޮންނަނީ މަޖިލިސް ފުލޯގައި“ ކަމަށް ފަލާހު ވިދާޅުވިއެވެ.
”ޔާމީނުު ޖުޑީޝަރީގެ ވާހަކަ އާއި ކޯޓުތަކުގެ ވާހަކަދައްކާތީ އަދި މާ އަޖައިބުވޭ. ވައްކަމުގެ ވާހަކަ ދައްކާތީ އެއަށްވުރެ އަޖައިބުވޭ. އަނިޔާވެރިކަމުގެ ވާހަކަ ދައްކާތި ބައެއް ފަހަރު ހިތަށް އަރާ މި ވާހަކަތައް އެ ކިޔައިދެނީ ހަމަ އަބްދުﷲ ޔާމީނު ބާއޭ،“ އޭނާ ވިދާޅުވިއެވެ.
ފަލާހު ވިދާޅުވީ މި ގައުމުގެ 15 އަހަރުން މަތީގެ ކޮންމެ ރައްޔިތަކާ ސުވާލުތައް ކޮށްލީމަ ވެސް ލިބޭނީ އެއް ޖަވާބެއް ކަމަށާއި މި ގައުމަށް އެންމެ ބޮޑު ހިޔާނާތެއްވީ ކާކުތޯ އެހުމުންނާއި، މި ގައުމުގައި އެންމެ އަނިޔާވެރި ވެރިކަމެއް ކުރީ ކާކުތޯ އެހިޔަސް، ޖަވާބަކަށް ލިބޭނީ ޔާމީންގެ ނަން ކަމަށެވެ.
”މި ގައުމުގެ ޖުޑީޝަރީ ފުނޑާލައި ކޯޓުތަކުން ޓިނު ނަގައި ކޯޓުތަކަށް އެންމެ ބޮޑު ނުފޫޒެއް ފޯރުވީ ކާކު؟ ޖަވާބު ޔާމީނު. މި ގައުމުގެ ރައްޔިތުންގެ މަޖިލީހުގެ 12 މެމްބަރުން ދެ އަހަރު މަގުމަތިކޮށް މަޖިލީސް މެމްބަރުން މަޖިލީހަށް ވަނަނުދީ އަނިޔާކޮށް މަޖިލީސް ހިސޯރު ކުރީ ކާކު؟ ޖަވާބު ހަމަ ޔާމީނު،“ އޭނާ ވިދާޅުވިއެވެ.
ފަލާހު އިތުރަށް ވިދާޅުވީ މި ގައުމުގެ ބައިތުލްމާލު ދަވާލައި އެތައް ސަތޭކަ މިލިއަން ރުފިޔާ އަމިއްލަ އެކައުންޓުތަކަށް ޖަމާކޮށްލީ ކާކުތޯ އެހިޔަސް ޖަވާބަކަށް ލިބޭނީ ޔާމީންގެ ނަން ކަމަށެވެ.
