ދަނޑުވެރިން ލޯނަށް ހުށަހެޅުމުގެ ފުރުސަތު ހުޅުވާލައިފި
ދެންމެ | 18 މާރޗް 2025

ކުދި އަދި މެދުފަންތީގެ ދަނޑުވެރިކަމުގެ މަޝްރޫއުތަކަށް ލޯނު ހޯދުމަށް އެދި ހުށަހެޅުމުގެ ފުރުސަތު ކޮމަން ފަންޑް ފޯ ކޮމޮޑިޓީސް (ސީއެފްސީ) އިން ހުޅުވާލައިފިއެވެ.

އެގްރިކަލްޗަ މިނިސްޓްރީން މިކަން އިއުލާނުކުރަމުން ބުނެފައިވަނީ މި ލޯނުގެ ފުރުސަތަކީ ދިވެހި ދަނޑުވެރިންގެ ވިޔަފާރިތައް ފުޅާކުރުމަށް ލިބޭ ރަނގަޅު ފުރުސަތެއް ކަމަށެވެ. މި ފުރުސަތު ފައިދާ ހުރި ގޮތުގައި ބޭނުންކުރުމަށް ދިވެހި ދަނޑުވެރިންނަށް ހިތްވަރުދެއެވެ.

އެގްރިކަލްޗަ މިނިސްޓްރީން އިތުރަށް ބުނެފައިވަނީ ލޯނު ދިނުމުގައި އަންހެން ދަނޑުވެރިންނަށް ސީއެފްސީއިން އިސްކަން ދޭނެކަމަށެވެ. މީގެއިތުރުން، އިޖާދީ ވަސީލަތްތަކުގެ އެހީގައި ދަނޑުވެރިކަން ކުރުމަށް ހުށަހަޅާ ފަރާތްތަކަށްވެސް ޕްރޮޕޯސަލްތައް ބަލައިގަތުމުގައި އިސްކަން ދެވޭނެކަމަށް ސީއެފްސީއިން ބުނެފައިވެއެވެ.

މި ލޯނަށް ޕްރޮޕޯސަލް ހުށަހެޅުމުގެ ފުރުސަތު ވަނީ އެޕްރީލް 1 ވަނަ ދުވަހުގެ ނިޔަލަށް ހުޅުވާލާފައެވެ. އެހެންކަމުން، މި ފުރުސަތުގެ ބޭނުން ހިފުމަށް ޝައުގުވެރިވާ ދަނޑުވެރިން ލޯނަށް އެދި ހުށަހަޅާ ޕްރޮޕޯސަލްތައް އެޕްރީލް 1 ގެ ކުރިން ހުށަހެޅުމަށް އެގްރިކަލްޗަ މިނިސްޓްރީން އެދިފައިވެއެވެ.

ގުޅުންހުރި ލިޔުންތައް

މި ލިޔުމަށް 48 ގަޑި އިރު ވެފައިވާތީ ކޮމެންޓުކުރުމުގެ ފުރުސަތެއް ނެތް. މާފުކުރައްވާ!