މީ މި ރޯދަމަހުގެ ވިހި ވަނަދުވަހެވެ.
އަޅުގަނޑުމެން ގުނަން މި ފެށީ ބަރަކާތުން ފުރިގެންވާ ދުވަސްތަކެކެވެ. މުޅި އަހަރުގައިވެސް އަންނާނެ އެންމެ މާތް ރޭތަކެވެ. އާދެ ރަމަޟާން މަހުގެ ފަހު ދިހައިގެ ދުވަސްތަކެވެ. މާތް ވެގެންވާ ލައިލަތުލް ޤަދްރި ވިލޭރޭ ވަނީ މިއިން ރެއެއްގައެވެ.
މިހާރުންސުރެ ރޯދަ މަސް ނިންމާނުލާށެވެ. އަޅުކަމުގައި ހިވާގިވެ ރޭ އަޅުކަމާއި ސޮދަގާތްކުރުމާއި ގްރުއާން ކިޔެވުމުގައި ވަގުތުތައް ހޭދަ ކުރައްވާށެވެ. މާތް ވެގެންވާ ލައިލަތުލް ޤަދްރި ވިލޭރޭ ހޯދުމަށް ގަދަ އަޅާ މަސައްކަތް ކުރާށެވެ. އަޅުކަން އިތުރުކޮށް، ކުރެވިފައިވާ އަމަލުތަކާއި މެދު ވިސްނާ ފާފަފުއްސެވުމަށް އެދި ދުއާކުރުން އިތުރުކުރާށެވެ.
ފަހު ދިހަރޭގެ މުހިންމުކަން:
މީ މުޅި އަހަރުގައިވެސް އަންނަނާނެ އެންމެ ބަރާކާތްތެރި ރޭތަކެވެ. ކީރިތި ގުރުއާން ބާއްވާލެވުނީ ލައިލަތުލް ގަދުރިވިލޭރެއެވެ. އެއީ އެރެއެއްގެ ހެޔޮކަން އެއްހާސް މަހަށްވުރެ ގިނަ ވެގެންވާ ރެއެވެ.
އާއިޝާ ރަޟިޔަ ﷲ އަންހާ ވިދާޅުވިއެވެ. ކީރިތި ރަސޫލާ صلى الله عليه وسلم ރޯދަ މަހުގެ ފަހުދިހަ އައުމުން އެރޭތައް އިހްޔާކުރައްވައެވެ. އަދި އެކަލޭގެފާނުގެ ގެކޮޅުގެ އަހުލުވެރިން ހޭލައްވައެވެ. އަދި ގަދައަޅުވައި ހެޔޮކަމުގައި މަޝްއޫލުވެލައްވައެވެ. އަދި ކަމަރު ބަދެލައްވައެވެ.
ލައިލަތުލް ޤަދްރު ހޯދުން:
1000 މަހަކީ 83 އަހަރަށް ވުރެ ދިގު މުއްދަތަކެވެ. އަހަރުންމެން ތެރެއިން މީހެއްގެ އުމުރަށްވުރެވެސް ދިގެވެ. އާއްމުކޮށް 83 އަހަރު ފުރެންދެން ދުނިޔޭގައި ހުރުމަކީ ވަރަށް ދުރު އަދި މަދު މީހަކު ނުނީ އެ މުއްދަތަށް ދުނިޔޭގައި ނުހުރެވެ. އެހެން ނަމަވެސް ﷲ ސުބްހާނަހޫ ވަތައާލާގެ ރަޙްމަތްފުޅު 83 އަހަރަށް ވުރެ ގިނަދުވަހު ހެޔޮ ކަންކަން ކުރުމުގެ ފުރުސަތު އެންމެ ރެއަކުން އަޅަމެންނަށް ދެއްވާފައެވެ. އެކަލާންގެ އެވަނީ އެރޭ ހޯދި މީހަކަށް ސަވާބާއި ދަރުމަ ދެއްވާނެކަން އަންގަވާފައެވެ. އެހެންކަމުން އެރީ ހޯދަން ހިތްވަރާއި ޖޯޝާއި އެކު މަސައްކަތް ނުކުރަންވީ ސަބަބެއް އެބައޮތް ހެއްޔެވެ.
އަޅުކަންކުރުމުގައި އިހުނަށްވުރެ ގަދައަޅައި މަސައްކަތްކުރުން
މި 10 ރެއަކީ ނަމާދާއި ގުރުއާން ކިޔެވުމާއި ފާފަ ފުއްސެވުން ފަދަ އަޅުކަމުގައި އަމަލުތައް އިތުރުކުރަންވީ ވަގުތެވެ. ފަރުޟު ފަސް ނަމާދު ޖަމާއަތުގައި އަދާކުރާށެވެ. ރަވާތިބު ސުންނަތެއްވެސް ދޫކޮށް ނުލާ ސުންނަތް ނަމާދުތައް އިތުރުކުރާށެވެ. ދުއާކުރުމާއި ރޭ އަޅުކަމުގައި ވަގުތުތައް ހޭދަކުރާށެވެ. ގިޔާމުއްލައިލު ނުވަތަ ތަރާވީހު ނަމާދަށް ފަރުވާ ކުޑަ ނުކުރައްވާށެވެ. ދަމު ނަމާދު ކުރުމުގައި ހީވާގި ވެލާށެވެ. ދަމު ނަމާދުގެ ވަގުތުގައި ގިނަގިނައިން ދުއާކުރާށެވެ. ދަމު ނަމާދުގެ ވަގުތަކީ ރަހްމާންވަންތަ ރަސްކަލާނގެ ދުނިޔޭގެ އުޑަށް ފައިބާވޮޑިގަންނަވާ ވަގުތެވެ. އެވަގުތުގައި ކުރެވޭ ދުއާ އިޖާބަކުރެވޭނެއެވެ. ރައްދު ނުކުރެވޭ ހުއްޓެވެ.
އިއުތިކާފް:
ގިނަ މުސްލިމުން މި ރޭތަކުގައި މިސްކިތެއްގައި އިތިކާފް ކުރުން އިހްތިޔާރުކުރަނީ އަޅުކަމާއި ވިސްނުމަށް ސަމާލުކަން ދިނުމަށެވެ. އަހަރުމެންނަށްވެސް މި ފުރުސަތު އެބައޮތެވެ. މި ދުނިޔެ ދޫކުރުމަށްފަހު ދެން ކުރރިމަތިލާން އޮތް ކަންކަން ފަސޭހަކަމާއި އަމާންކަމާއި އެކު ކުރިޔަށްދާން މި ދިހަ ރޭ އިއުތިކާފުގައި އެކަނި އިނދެ ހެއްދެވި ފަރާތަށް އަޅުކަމަށް ހުސްކޮށް ނުލާވީ ކީއްވެ ހެއްޔެވެ.
ފާފަ ފުއްސެވުން އެދުމާއި މާފުކުރުން އިތުރު ކުރޭ
ތިމާގެ ހަޔާތް މިހާތަނަށް ވޭތުކުރެވުނު ގޮތްތަކާއި މެދު ވިސްނާލަން މީ އެންމެ ރަނގަޅު 10 ރެއެވެ. ތިމާގެ އަމަލުތަކާއި މެދު ވިސްނާ ފިކުރުކޮށް ފާފަތައް ފުއްސެވުން އެދި ދުއާކުރާށެވެ. ރަނގަޅު މުސްލިމެއްގެ ގޮތުގައި މި ދުނިޔޭ ދުކުރުމަށް މަސައްކަތް ކުރަންވީ ވަގުތަކީ މިއެވެ. ހަމަ އެހެންމެ އަމިއްލަ ފާފަތައް ފުއްސެވުން އެދޭ ހާލު އެހެން މީހުންނަށް ތިމާވެސް އެހެން މީހުންނަށް މާފުކުރާށެވެ.
އެހެން މީހުންނަށް މާފުކޮށް ހިތް ހެޔޮކުރާ މީހުން ދެކެ الله ތައާލާ ލޯބިވެވޮޑިގަންނަވައެވެ. އަދި އެކަމުގެ ސަބަބުން ތިމާގެ ފާފަތައް الله ތަޢާލާ ފުއްސަވައިދެއްވެވުމަށް މަގުފަހިވެގެންދެއެވެ.
ކޮން ދުއާއެއް ކުރާނީ
ލައިލަތުލް ގަދުރި ވިލރޭ ކުރަން އަަހަރުންމެން މުސްލިމުންނަށް އަހަރެންމެން މާތް ނަބިއްޔާ މުހައްމަދު ސައްލައްﷲ އަލައިހި ވައްސަލަމް އެންމެ ހާއްސަކުރެވި ދުއާއަކީ މިއެވެ.
اللَّهُمَّ إِنَّكَ عَفُوٌ تُحِبُّ الْعَفْوَ فَاعْفُ عَنِّي
މާނައީ: އޭ ﷲ އެވެ! އިބަ ﷲ އީ ގިނަގިނައިން އަފޫކުރައްވާ، އަފޫކުރެއްވުމަށް ލޯބިކުރައްވާ އިލާހެވެ. މި އަޅާއަށް އަފޫކޮށްދެއްވާނދޭއެވެ.
މައުލޫމާތު: މުފްތީ މެންކުގެ ދަރުސަކުން
