ތައިލެންޑުގެ ފިހާރައަކަށް އެތެއް ވަދެ، ކާބޯތަކެތި ކައި ހެދި މަންޒަރު ދައްކުވައިދޭ ވީޑިއޯއެއް ސޯޝަލް މީޑިއާގައި ވަރަށް ބޮޑަށް ވައިރަލްވެއްޖެއެވެ.
ހާއޯ ޔައި ނެޝަނަލް ޕާކް ކައިރީގައި ހުރި ފިހާރައަކަށް ވަދެ، ޕްލައި ބިއާން ލެކް ނަމަކަށް ކިޔާ މި އެތް މެޓާ އާއި ޕީނަޓް ފަދަ ތަކެތި ކައި ހެދި މަންޒަރު ސީސީޓީވީ ކެމެރާއަކުން ރެކޯޑުކޮށްފައިވެއެވެ. މި އެތަކީ އެ ސަރަހައްދުން އާންމުކޮށް ފެންނަ އެތެއެކެވެ.
ފިހާރައިގެ ވެރިފަރާތް ކަމްޕްލޮއި ކަކާއޫ ސީއެންއެންއަށް ދިން އިންޓަވިއުގައި ބުނި ގޮތުގައި އެތް ފިހާރައަށް ވަނުމަށްފަހު ދިޔައީ ސީދާ މެޓާ ކައުންޓަރަށް ކަމަށެވެ. އަދި ފްރީޒަރު އެއްފަރާތްކޮށް، މެޓާ ކައުންޓަރަށް ވަދެ، ގާތްގަނޑަކަށް 10 ޕެކެޓްގެ ކާތަކެތި ކެއި ކަމަށް ބުންޏެވެ. މީގެ އިތުރުން ގިނަ އަދަދަކަށް ހިކި ކޭލާއި ޕީނަޓް ވެސް ކެއެވެ.
ވީޑިއޯގައި ފެންނަ ގޮތުގައި އެ އެތުގެ ބޯ ފިހާރައިގެ ސީލިންއާ ހަމައަށް އަރައެވެ. ފިހާރައިގެ ބައެއް ތަންތަނުގައި ހުރި ތަކެތި ތަޅުންގަނޑު މައްޗަށް ވެއްޓިފައި ހުރި ނަމަވެސް އެއްވެސް މީހަކަށް ގެއްލުމެއް ލިބިފައެއް ނުވެއެވެ.
ފިހާރައިގެ ވެރިފަރާތުން އެ އެތް ނެރެން އަމިއްލައަށް މަސައްކަތްކުރި ނަމަވެސް އެކަން ކާމިޔާބެއް ނުވިއެވެ. ގާތްގަނޑަކަށް 10 މިނެޓު ވަންދެން ފިހާރައިގައި ހުރުމަށްފަހު، ޕާކުގެ ރޭންޖަރުން އައިސް އެ އެތް އެތަނުން ނެރުނީއެވެ.
މި ހާދިސާއާ ގުޅިގެން ސޯޝަލް މީޑިއާގައި ގިނަ ބަޔަކު ވަނީ މަޖާ ކޮމެންޓުތަކެއް ކޮށްފައެވެ. އޭގެ ތެރޭގައި ބޭރުތެރެ މާ ބޮޑަށް ހޫނުވުމުން ފިނިކޮށްލަން އެތް ފިހާރައަށް ދިޔައީ ކަމަށް ބުނަމުންދެއެެވެ. އަދި އެ އެތް ދާންވީ ތަނެއް ނޭނގިގެން އުޅޭތީ ބޭނުން ގޮތަކަށް އުޅެން ދޫކޮށްލަންވީ ކަމަށް ބުނާ ކޮމެންޓުތައް ހިމެނެއެވެ.
ވައިލްޑްލައިފް ޕްރޮޓެކްޝަން ގްރޫޕަކުން ވަނީ އެ އެތް ކެއި ތަކެއްޗަށް ފައިސާ ދޭން ހުށަހަޅާފައެވެ.
