އޭނާ މިހެން ބުނެފައިވަނީ ސިފައިންގެ ޗީފް އޮފް ސްޓާފްއާއެކު ބޭއްވި އެސެސްމަންޓް ބައްދަލުވުމަކަށް ފަހު ވާހަކަ ދައްކަމުންނެވެ.
އިރާން އިން ދިން މިސައިލް ހަމަލާތަކުގައި އިސްރާއީލުގެ 3 މީހަކު މަރުވެ 10 ވަރަކަށް މީހުން ވަނީ ޒަހަމްވެފައެވެ.
މިއަދު ހެނދުނު އިސްރާއީލުގެ ޑިފެންސް ފޯސްއިން (އައިޑީއެފް) އިއުލާނުކުރި ގޮތުގައި އެ ގައުމުގެ މައިގަނޑު ހަނގުރާމައިގެ މައިދާނަކީ މިހާރު އިރާނެވެ. އަދި ޣައްޒާއަކީ ދެވަނަ ދަރަޖައިގެ މައިދާނެއްގެ ގޮތުގައި ވަނީ ކަނޑައަޅާފައެވެ.
އިސްރާއީލުގެ ވައިގެ ބާރުން ވޭތުވެދިޔަ 24 ގަޑިއިރުގެ ތެރޭގައި އިރާނުގެ 150 އަމާޒަކަށް ހަމަލާ ދީފައިވާ ކަމަށް ސިފައިންގެ މަސްދަރުތަކުން ބުނެއެވެ. އަދި އިރާނުގެ ވެރިރަށް ތެހެރާނަށް ދަތުރުކުރުމަށް ރައްކާތެރި މަގެއް ހެދިފައިވާ ކަމަށާއި، އެ ސަރަހައްދުގެ މަތީގައި މިނިވަންކަމާއެކު އޮޕަރޭޓްކުރެވޭ ކަމަށް ވެސް އައިޑީއެފްއިން ބުނެފައިވެއެވެ.
އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ބުނާ ގޮތުގައި އިރާނުގެ ނިއުކްލިއާ އަދި މިސައިލް ޕްރޮގްރާމްތަކުން ޔަހޫދީ ދައުލަތަށް ނުރައްކަލެއް ކުރިމަތިވެފައިވާތީ، އެމެރިކާގެ އެހީތެރިކަމެއް ނެތި ނަމަވެސް އިރާނަށް ހަމަލާ ދިނުމަށް ވާނީ އަމުރުކޮށްފައެވެ.
މި ބަޔާން ދެއްވީ އިސްރާއީލުން އިރާނުގެ ނިއުކްލިއާ އަދި ސިފައިންގެ މައި މަރުކަޒުތަކަށް ގަދަ ހަމަލާތަކެއް ދިނުމަށްފަހުގައެވެ. މި ހަމަލާތަކުގައި އިރާނުގެ އިސް ޖެނެރަލުންނާއި ސައިންޓިސްޓުން ޝަހީދުވެފައިވެއެވެ.
