ޔަހޫދީންނާ ދެކޮޅަށް އީރާނުން ހަމަލާތައްދިން ވަގުތު ޔަމަނުގެ ހޫތީންވެސް ވަރުގަދަ ރައްދު ހަމަލާތަކެއްދީފިއެވެ.
މިއީ އީރާން-އިސްރާއީލް ހަނގުރާމަ ފެށުނު ފަހުން ހޫތީން އިސްރާއީލަށް ދެވަނަ ފަހަރަށް ދިން ހަމަލާތަކެެވެ.
ހޮނިހިރު ދުވަހުގެ ރޭ ދެ ބުރަކަށް އީރާނުން އިސްރާއީލަށް ވަނީ ހަމަލާތައް ދީފައެވެ. ފުރަތަމަ ބުރުގެ ހަމަލާތައް އިރާން ގަޑިން ރޭގަނޑު 11:45 ހާއިރު ފެށުމަށްފަހު، އިސްލާމިކް ރެވޮލިއުޝަން ގާޑްސް ކޯޕްސް (އައި.އާރް.ޖީ.ސީ) އިން ”އޮޕަރޭޝަން ޓްރޫ ޕްރޮމިސް 3“ ދެވަނަ ބުރު ފަށާފައިވަނީ އީރާން ގަޑިން މެންދަމު 3:34 ހާއިރުއެވެ.
ހޫތީން ދިން ހަމަލާ އަމާޒުކޮށްފައިވަނީ ތެލް އަވީވްގެ ބެން ގޫރިއަން އެއާޕޯޓަށެވެ.
ހޫތީން ހަމަލާތައް ފެށީ އަންގާރަ ދުވަހުއެވެ. އަންގާރަ ދުވަހު އިސްރާއީލަށް ދެ މިސައިލު ހަމަލާ ހޫތީން ދީފައިވާއިރު ޔަހޫދީންވަނީ ޔަމަނުގެ ހުދެއިދާ ބަނދަރަށް ބޮމުން ހަމަލާދީފައެވެ.
ރަތް ކަނޑުން ދަތުރު ކުރާ އިސްރާއީލަށް މުދާ އުފުލާ ބޯޓުފަހަރަށް ހޫތީން ހަމަލާ ދޭން ފެށީ އިސްރާއީލުން ޣައްޒާގައި ހިންގާ ގަތުލުއާންމުތަކަށް ބަދަލު ހިފުމުގެ ގޮތުންނެވެ. ޔަމަނުގެ ބޮޑު ބައެއްގެ މައްޗަށް ވެރިކަން ކުރާ އެ ޖަމާއަތުން ބުނެފައި ވަނީ އިސްރާއީލުން ޣައްޒާއަށް ދޭ ހަމަލާތައް ހުއްޓާލައި އެކަށީގެންވާ އެހީ ޣައްޒާގެ ރައްޔިތުންނަށް ފޯރުކޮށްދިނުމުން ނޫނީ، އިސްރާއީލާ ގުޅުން އޮންނަ އުޅަނދުފަހަރަށް ރަތް ކަނޑު އަމާން ނުވާނެ ކަމަށެވެ.
