މާލޭގެ އިމާރާތަކުން ވެއްޓުނު ހައްވާ ޔުމްނު ރަޝީދުގެ ބަހެއް ހޯދަން އޭނާގެ އާއިލާއަށް ގުޅުމުން ފޯނު ކަނޑާލި ކަމަށް ރައީސް ޑރ. މުހައްމަދު މުއިއްޒު އުފެއްދެވި ރިޔާސީ ކޮމިޝަނުން ނެރުނު ރިޕޯޓުގައި ބުނެފިއެވެ.
އެ ރިޕޯޓުގައި ބުނީ ޔުމްނުގެ ބަހެއް ހޯދަން ކޮމިޝަނުން ކުރި މަސައްކަތް ކާމިޔާބު ނުވި ކަމަށެވެ. އާއިލާއިން ފޯނު ކަނޑާލުމަށްފަހު އަދި އޭގެފަހުން ޔުމްނުގެ ޅިއަނެއް ކަމަށްވާ މުހައްމަދު މުއުމިން ކޮމިޝަނަށް ގުޅައި ޔުމްނުގެ މަންމައަށް ނުގުޅުމަށާއި އާއިލާއިން ކޮމިޝަނާ ބައްދަލުކުރަން ބޭނުން ނުވާ ކަމަށް ބުނެފައިވާ ކަން ކޮމިޝަންގެ ރިޕޯޓުގައި ވަނީ ފާހަގަކޮށްފައެވެ.
ޔުމްނުގެ ފަރާތުން މައުލޫމާތު ސާފުކުރަން ބޭނުންވާތީ، ކޮމިޝަންގެ މެންބަރަކު މެލޭޝިއާއަށް ގޮސްގެން ނޫނީ ވީޑިއޯ ކޮންފަރެންސް މެދުވެރިކޮށް އެ ފުރުސަތު ހަމަޖައްސައިދޭން އެދި އާއިލާގެ ކިބައިން އެދުނު ކަމަށާއި ނަމަވެސް، އެ ސިޓީއަށް އާއިލާއިން ޖަވާބެއް ނުދިން ކަމަށް ކޮމިޝަނުން ބުންޏެވެ.
އޭގެފަހުން ވެސް އާއިލާގެ އެކި މެންބަރުންނަށް ގުޅައިގެން ކުރި މަސައްކަތުން ވެސް ޔުމްނުގެ ބަހެއް ކޮމިޝަނަށް ލިބޭނެ ގޮތެއް ހަމަނުޖެހުނު ކަމަށް ރިޕޯޓްގައި ބުންޏެވެ.
ރިޕޯޓްގައި ބުނީ ޔުމްނުއަށް އިންސާފު ހޯދުމަށް އާއިލާއިން އެދޭއިރު، އިންސާފު ހޯދަން ޔުމްނުގެ ބަސް މުހިންމު ކަމަށެވެ. ނަމަވެސް ކޮމިޝަނުން ކުރި ތަހުގީގުން ލިބުނު ހެއްކާއި ގަރީނާތަކަށް ބަލާއިރު، ޔުމްނުގެ ބަހެއް ނުލިބުމަކީ ތަހުގީގުގެ ނަތީޖާއަށް އަސަރުކުރާނެ ކަމެއް ކަމަކަށް ނުދެކޭ ކަމަށް ރިޕޯޓުގައި ވަނީ ބުނެފައެވެ.
