އީރާނުން މިއަދު ހެނދުނު ދިން ވަރުގަދަ ހަމަލާއަށް ފަހު އިސްރާއިލުގެ ވެރިރަށް، ތެލްއަވީވްގެ އިމާރާތްތަކުގެ ބައިތައް ވެއްޓިދާނެ ކަމުގެ ބިރު އޮތުމުން އެ އިމާރާތްތަކަށް ނުވަދެވޭނެހެން ކޯޑައުން ކޮށްފައިވާ ކަމަށް މީޑިއާ ރިޕޯޓްތައް ބުނެފިއެެވެ.
މިއަދު ހެނދުނު އީރާނުން ދިން މިސައިލް ހަމަލާއަކީ ހަނގުރާމަ ފެށުނީއްސުރެ އީރާނުގެ އެންމެ ބާރުގަދަ މިސައިލް ހަމަލާ ކަމަށްވެއެވެ.
އީރާން މީޑިއާތައް ބުނާގޮތުގައި އީރާނުން މައިގަނޑު ގޮތަކަށް ހަމަލާ އަމާޒުކޮށްފައިވަނީ އިސްރާއީލް އަސްކަރިއްޔާގެ ކޮމާންޑް އެންޑް އިންޓެލިޖެންސްގެ ހެޑްކުއާޓާޒް އަށެވެ.
އަލްޖަޒީރާއިން ރިޕޯޓްކޮށްފައިވާގޮތުގައި، މި ހަަމަލާގައި އަނިޔާވި ހަ މީހެއްގެ ހާލު ސީރިއަސް އެވެ.
އަދި މިއަދު ހެނދުނު ހަމަލާ އަމާޒުވި ސްޓޮކް އެކްސްޗޭންޖް ކައިރީގައި ހުންނަ ތެލްއަވީވްގައި އިމާރާތްތައް ހުސްކުރަނީ އިމާރާތްތަކުން ބައިތައް ވެއްޓިދާނެ ކަމުގެ ބިރު އޮތުމުންނެވެ. ތެލްއަވީވްގެ ދެކުނުގައި އޮންނަ ހޮލޯންގައި ސީދާ ހަމަލާއެއް އަމާޒުވުމުގެ ސަބަބުން އެ އިމާރާތައް ބޮޑެތި ގެއްލުންތައް ލިބި ވެއްޓިފައިވާ ކަމަށް ބުނެފައި ވެއެވެ.
އަދި އިސްރާއީލުގެ ދެކުނުގައި ހުންނަ ސޮރޯކާ ހޮސްޕިޓަލް ކައިރީގައި ދިން މިސައިލް ހަމަލާއެއްގައި އެ ހޮސްޕިޓަލަށް ވެސް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓުތައް ބުނެއެވެ.
މިއަދު ހެނދުނުގެ ހަމަލާގައި އީރާނުން ބޭނުންކޮށްފައިވަނީ ކްލަސްޓާ ވޯހެޑެއް ހިމެނޭ މިސައިލެއް ކަމަށް އިން އިސްރާއީލުގެ އަސްކަރިއްޔާއިން ލަފާކޮށްފައި ވެއެވެ.
