ކުރީގެ ރައީސް މުހައްމަދު ނަޝީދު އެމްޑީޕީއަށް ސޮއި ކުރަން މިރޭ ބޭއްވުމަށް ހަމަޖެހިފައިވާ ޖަލްސާގައި ބައިވެރިނުވާން ކުރީގެ ރައީސް އިބްރާހިމް މުހައްމަދު ސޯލިހް (އިބޫ) ސަޕޯޓަރުންގެ ކިބައިން އެދިއްޖެއެވެ. އިބޫގެ ބައެއް ސަޕޯޓަރުން ކަށަވަރުކޮށްދިން ގޮތުގައި ޖަލްސާގައި ބައިވެރިނުވާން އިބޫ ސަޕޯޓަރުންގެ ކިބައިން އެދިފައި ވާތީ މިރޭގެ ޖަލްސާގައި އިބޫގެ ސަޕޯޓަރުން ބައިވެރިއެއް ނުވާނެއެވެ.
މައުލޫމާތު ދިން ސަޕޯޓަރު ބުނީ އިބޫގެ ސަޕޯޓަރުން ނަޝީދު ސޮއި ކުރާ ޖަލްސާގައި ބައިވެރި ނުވާން އިބޫ އެދިފައިވާކަން ސަޕޯޓަރުންނަށް ފޯނުން ގުޅައިގެން އަންގަމުން ގެންދަނީ އިބޫ ފެކްޝަންގައި އިސްކޮށް މަސައްކަތް ކުރާ ބައެއް ބޭފުޅުންނެވެ.
”އިބޫ ބޭނުމެއް ނުވޭ މިރޭގެ ޖަލްސާ މާކުލަގަދަކޮށް ކުރިއަށް ގެންދާކަށް. މާގިނައިން މީހުން އެއްވެ، ނަޝީދު އެމްޑީޕީއަށް އައުން އެއީ ބޮޑު އުފަލެއްގެ ގޮތުގައި ފާހަގަ ކުރާކަށް އިބޫ ބޭނުމެއް ނުވޭ. ބޭނުންވަނީ ވީހާވެސް މަދުން މީހުން ބައިވެރިވެ މިހާރު އެމްޑީޕީގައި ނަޝީދުގެ ސަޕޯޓް ނެތްކަން ދައްކަން.“ މައުލޫމާތު ދިން މީހާ ބުންޏެވެ.
ދެން އޮންނަ ރިޔާސީ އިންތިޚާބެއްގައި ނަޝީދު ވާދަކުރާނެކަން މިރޭ އިއުލާން ކުރާނެކަމަށް ބެލެވޭތީ އިބޫ ވަނީ ރިޔާސީ އިންތިހާބުގައި ވާދަކުރާނެކަން ރޭ އިއުލާން ކޮށްފައެވެ. އިބޫ ރައީސްކަމަށް ކުރިމަތިލާން ނިންމިކަން އިއުލާން ކުރީ ރޭ އިބޫގެ ފެކްޝަނުން މާލޭގައި ބޭއްވި ބައްދަލުވުމެއްގައެވެ. އިބޫ ރައީސް ކަމަށް ކުރިމަތިލާކަން އިއުލާން ކުރެއްވީ އަލިފުށީ ދާއިރާގެ ކުރީގެ މެމްބަރު މުހައްމަދު ރަޝީދު ހުސެއިން (ބިގޭ) އެވެ. ރޭގެ ބައްދަލުވުމުގައި އިބޫ ބައިވެރިއެއް ނުވެއެވެ. މައުލޫމާތު ލިބިފައިވާ ގޮތުގައި ނަޝީދު ސޮއި ކުރަން މިރޭ ބާއްވާ ޖަލްސާގައި ވެސް އިބޫ ބައިވެރިއެއް ނުވާނެއެވެ.
ރިޔާސީ އިންތިޚާބުގައި ވާދަކުރާނެކަން ބިގޭ މެދުވެރިކޮށް އިބޫ ރޭ އިއުލާން ކުރިނަމަވެސް ރިޔާސީ އިންތިޚާބުގައި ވާދަކުރަން ނިންމާ އިބޫ އެކަމުގެ މަޝްވަރާތައް އެކި ފަރާތްތަކާއިއެކު ކުރަމުން އަންނަތާ މިހާރު އަހަރަކަށް ވުރެ ވެސް ގިނަ ދުވަސް ވެއްޖެއެވެ.
